No Basic Facilities in villages : కనీస అవసరాలకు దూరంగా నేటికీ ఎన్నో పల్లెలు ఉన్నాయి. ఆస్పత్రి, మంచినీరు, మందులు ఇలా ఏం కావాలన్నా కూడా రాళ్ల మీది నుంచి నడవాల్సిందే. రాష్ట్రంలోని అటవీ ప్రాంతాల్లో ప్రజలు నేటికీ కనీస సౌకర్యాలకు దూరంగా మగ్గిపోతున్నారు. రోడ్లు, తాగునీటి వసతికి సంబంధించిన ప్రతిపాదనలున్నా, అమలు కాకపోవడంతో ఏళ్ల తరబడి ప్రజలకు కష్టాలే మిగిలాయి. ఉమ్మడి ఆదిలాబాద్‌, ఖమ్మం, వరంగల్‌, మహబూబ్‌నగర్‌ జిల్లాల్లో అనేక పల్లెల ప్రజలు అభివృద్ధికి దూరంగా బతుకులు వెళ్లదీస్తున్నారు.
అంబులెన్సు కూడా వెళ్లని దుస్థితిలో..
గిరిజన గ్రామాల్లో దారులు బాగా లేక బస్సులొచ్చే ప్రశ్నే లేదు. ఆపద సమయంలోనైనా 108 అంబులెన్సు కూడా రాలేనంత దుర్భరంగా ఉన్నాయి రహదారులు. ప్రజలు ఎడ్లబండ్లను కిరాయికి తీసుకుని బాహ్యప్రపంచానికి రాకపోకలు సాగించాల్సిన దుస్థితి. నిత్యావసరాలు, పంట విక్రయాలు, అంగన్‌వాడీ కేంద్రాలకు సరకుల రవాణా..ఇలా అన్నిటికీ ఆ బండ్లే ఆధారం. గర్భిణులు వైద్య పరీక్షలు, ప్రసవానికి వెళ్లాలంటే కాలినడకే శరణ్యం. తండాలు, గిరిజన గూడేలను ప్రభుత్వం పంచాయతీలుగా మార్చాక కొంతమేరకు నిధుల వెసులుబాటు కలిగినా, రహదారులు, వంతెనల నిర్మాణం లాంటి శాశ్వత సమస్యలు పరిష్కరించాలంటే భారీగా నిధులు కావాలి. మారుమూల ప్రాంతాలు కావడంతో సమస్యలను ఉన్నతాధికారుల దృష్టికి తీసుకెళ్లేవారు లేరని స్థానికులు చెబుతున్నారు.
* ఉమ్మడి ఆదిలాబాద్‌ జిల్లాలో సుమారు 425 గ్రామాలకు రహదారులు లేవు. ప్రధానంగా జైనూరు మండలంలో కిషన్‌నాయక్‌ తండా, చింతకర్ర, లొద్దిగూడ గ్రామాల ప్రజలు బండరాళ్ల రోడ్డులో ఎనిమిది కిలోమీటర్లు నడవాల్సిందే. నార్నూర్‌, సిర్పూర్‌ యు మండలంలోనూ ఇదే దుస్థితి. తిర్యాణి మండల కేంద్రం నుంచి 50 కి.మీ. దూరంలో ఉన్న ఎర్రబండ, తాటిగూడ, గీసిగూడ, గోబెర, సమతులగుండం గ్రామాల ప్రజలు ఏళ్ల తరబడి కాలినడకనే రాకపోకలు సాగిస్తున్నారు.
* ములుగు, జయశంకర్‌ భూపాలపల్లి జిల్లాల్లోనూ చాలా గ్రామాలకు రవాణా సౌకర్యాలు లేవు. తాడ్వాయి మండలంలో బంధాల, నర్సాపురం, బొల్లేపల్లి గ్రామాలకు కనీసం రోడ్డు లేదు. వాజేడు మండలంలోనూ చాలా గ్రామాలది ఇదే దుస్థితి. కన్నాయిగూడెం, పలిమెల మండలాల్లోనూ మట్టిరోడ్లే ఉన్నాయి.
* కామారెడ్డి జిల్లా మద్నూరు మండలం లింబారువాడికి రహదారి సౌకర్యం లేదు.
* మహబూబాబాద్‌ జిల్లాలో పాకాల, కొత్తగూడ, గంగారం మండలాల్లో దాదాపు పది గ్రామాలు, గూడూరు మండలంలో ఒక గ్రామానికి సరైన దారి కరవైంది.
* భద్రాద్రి కొత్తగూడెం జిల్లాలో గుండాల, ఆళ్లపల్లి, పినపాక, లక్ష్మీదేవిపల్లి మండలాల్లో వర్షాకాలం వస్తే కనీసం అడుగు కూడా వేయలేని స్థితిలో రోడ్లున్నాయి. వాగులపై వంతెనలు లేవు.
* నాగర్‌కర్నూల్‌ జిల్లా అమ్రాబాద్‌ మండలంలో అప్పాపూర్‌, రాంపూర్‌, మల్లాపూర్‌, ఫర్హాబాద్‌తోపాటు పది చెంచుగ్రామాలకు రోడ్డు లేదు.
పోరాడి సాధించుకున్న కుండి షేకుగూడ
ఏళ్ల తరబడి సమస్యలతో తల్లడిల్లిన ఆదిలాబాద్‌ జిల్లా గాదిగూడ మండలం కుండి షేకుగూడ ఆదివాసీలు పోరాడి ఇటీవల విజయం సాధించారు. ఆ ఊరి ప్రజలంతా ఇళ్లకు తాళాలు వేసి.. ఈ నెల ఏడో తేదీన 68 కిలోమీటర్లు కాలినడకన జిల్లా కేంద్రానికి తరలి వచ్చి 14వ తేదీ వరకు ఉద్యమించారు. రాష్ట్రవ్యాప్తంగా చర్చనీయాంశమైన ఈ సంఘటనతో కొన్ని సమస్యల పరిష్కారానికి మార్గం సుగమమైంది. రోడ్డు, తాగునీరు వెంటనే కావాలని పట్టు పట్టడంతో చివరికి ఐటీడీఏ, మిషన్‌ భగీరథ విభాగాలు మూడు బోర్లు వేసి నల్లాలతో తాగునీరు ఇచ్చాయి. గ్రామంలో రూ.4.30 లక్షలు సీసీరోడ్డుకు, ఏడు కిలోమీటర్ల ప్రధాన రహదారి నిర్మాణానికి అధికారులు హామీ ఇచ్చారు. దీంతో గ్రామస్థులు పోరాటం విరమించి గ్రామానికి తిరిగి వెళ్లారు. వారి పట్టుదలతో మారుతిగూడ, కొలంగూడ, చిన్నకుండి గ్రామాలకు కూడా రోడ్డు మార్గం ఏర్పడనుంది.
ఇదీ చదవండి: CC Cameras: ఠాణాల్లో అత్యాధునిక కెమెరాలు.. ఏం చేసినా కనిపిస్తుంది..
