ప్రాణం తీసిన సరదా... ఈతకు వెళ్లి విద్యార్థి మృతి

ఆదివారం నాడు సరదాగా స్నేహితులతో గడుపుదామనుకున్న విద్యార్థికి అదే చివరి రోజైంది. ఆదిలాబాద్ జిల్లా ఉట్నూరు మండలం కన్నాపూర్​కు చెందిన గోపాల్​ అనే పదోతరగతి విద్యార్థి ఈత కోసం వెళ్లి వాగులో గల్లంతయ్యాడు. సోమవారం నాడు శవమై కనిపించాడు.

ఆదిలాబాద్ జిల్లా ఉట్నూరు మండలం కన్నాపూర్​లో విషాదం చోటుచేసుకుంది. ఆదివారం నాడు గోపాల్​ అనే విద్యార్థి ఐదుగురు స్నేహితులతో కన్నాపూర్​ వాగు సమీపంలో ఓ ఆహ్లాదకరమైన ప్రదేశానికి విహారయాత్రకు వెళ్లారు.వెంట తీసుకెళ్లిన అల్పాహారాన్ని తిని... వాగులో ఈత కొట్టేందుకు దిగారు. సరదాగా ఆడుకుంటుండగా... గోపాల్​ గల్లంతయ్యాడు. గమనించని స్నేహితులు ఇంటికి పరుగులు తీశారు.

రాత్రికి కూడా గోపాల్​ ఇంటికి రాలేదని తల్లిదండ్రులు ఆరా తీశారు. ఎక్కడా కనిపించకపోగా... స్నేహితులతో కలిసి కన్నాపూర్​ వాగు వైపు వెళ్లినట్లు తెలిసింది. రాత్రంతా గాలించినా ఆచూకీ లభించలేదు. సోమవారం ఉదయం గ్రామస్థులతో కలిసి వాగులో వెతకగా... గోపాల్​ శవమై కనిపించాడు. పోలీసులు మృతదేహాన్ని ఉట్నూరు ఆసుపత్రికి తరలించి... పోస్టుమార్టం నిర్వహించి కుటుంబసభ్యులకు అప్పగించారు. తల్లిదండ్రుల ఫిర్యాదుతో పోలీసులు కేసు నమోదు చేసుకొని దర్యాప్తు ప్రారంభించారు. గోపాల్​ లిటిల్​ ఫ్లవర్​ స్కూలులో పదోదరగతి చదువుతున్నాడు.

ఇదీ చూడండి: 'ఆర్టీసీ సమ్మెపై 2 వారాల్లో నిర్ణయం తీసుకోవాలి'