భారత్ గర్విస్తోంది.. హాకీ ఆటగాళ్లకు మోదీ సందేశం

ఒలింపిక్స్​ సెమీస్​లో పురుషుల హాకీ జట్టు ఓటమిపై నిరాశ చెందాల్సిన అవసరం లేదన్నారు ప్రధాని నరేంద్ర మోదీ. అత్యుత్తమ ఆటతీరు కనబర్చారని, అదే ముఖ్యమని ఆటగాళ్లలో స్ఫూర్తి నింపారు.

టోక్యో ఒలింపిక్స్​ సెమీస్​లో పురుషుల హాకీ జట్టు ఓటమిపై నిరాశచెందాల్సిన పనిలేదని ప్రధాని నరేంద్ర మోదీ వ్యాఖ్యానించారు. గెలుపోటములు.. జీవితంలో భాగమన్నారు. భారత జట్టు ఉత్తమ ఆటతీరు కనబరిచిందని.. అదే లెక్కలోకి వస్తుందని మోదీ స్పష్టం చేశారు.

మోదీ ట్వీట్

తదుపరి మ్యాచ్‌లో.. భారత హాకీ జట్టు విజయం సాధించాలని ప్రధాని ఆకాంక్షించారు. మన ఆటగాళ్లను చూసి భారత్ గర్విస్తోందని.. ప్రధాని ట్వీట్ చేశారు. అంతకుముందు మ్యాచ్‌ జరుగుతున్న సమయంలో.. తాను కూడా టీవీలో చూస్తున్నట్లు ప్రధాని సామాజిక మాధ్యమాల ద్వారా తెలియజేశారు.

అనురాగ్ ట్వీట్

ఓటమి బాధలో ఉన్న టీమ్​ఇండియాను ఉత్సాహపరిచారు కేంద్ర క్రీడాశాఖ మంత్రి అనురాగ్ ఠాకూర్. "బాయ్స్​.. మీరు బాగా ఆడారు. అత్యుత్తమ ప్రదర్శన చేశారు. మేము మీ వెన్నంటే ఉన్నాం. మనకు ఇంకో అవకాశం(మ్యాచ్) ఉంది" అని ట్వీట్ చేశారు.

ఇదీ చూడండి: Tokyo Olympics Live: సెమీస్​లో టీమ్ఇండియా ఓటమి.. సోనమ్​కూ నిరాశే