టోక్యో ఒలింపిక్స్లో 12వ రోజు(ఆగస్టు 4) భారత బృందానికి అంతగా కలిసిరాలేదు. ఎన్నో ఆశలతో సెమీస్లో బరిలో దిగిన మనోళ్లు బోల్తా పడ్డారు. కానీ ఓ పతకం ఖాయం అవ్వడం వల్ల క్రీడాభిమానులు కాస్త సంతృప్తిపడ్డారు. మొత్తంగా ఐదు ఈవెంట్లలో భారత అథ్లెట్లు పాల్గొన్నారు. హాకీ, బాక్సింగ్ సెమీస్లో చేతులెత్తేయగా.. జావెలిన్ త్రో, గోల్ఫ్, రెజ్లింగ్లో మిశ్రమ ఫలితాలు వచ్చాయి. ఓ సారి మన క్రీడాకారులు ఎలాంటి ప్రదర్శన చేశారో చూద్దాం..
పసిడి ఆశలు ఆవిరి
హాకీ ఇండియా.. సరికొత్త చరిత్రకు అడుగు దూరంలో మహిళల జట్టు బోల్తా పడింది. స్వర్ణమే లక్ష్యంగా ముందుకు సాగిన రాణి రాంపాల్ సేనకు సెమీస్లో అర్జెంటీనా చేతిలో భంగపాటు తప్పలేదు. 1-2తో ప్రత్యర్థి చేతిలో పరాజయం చవిచూసింది. కాంస్య పోరులో గ్రేట్ బ్రిటన్పై నెగ్గి పతకం సాధిస్తారో లేదో చూడాలి.
లవ్లీనా చరిత్ర సృష్టించింది కానీ..
భారత బాక్సర్ లవ్లీనా బొర్గొహెయిన్‌(Lovlina Borgohain) ఒలింపిక్స్లో పతకం సాధించిన భారత మూడో బాక్సర్గా చరిత్ర సృష్టించింది. కానీ ఆమె స్వర్ణం సాధిస్తుందని అంతా ఆశపడ్డారు. బుధవారం జరిగిన సెమీస్లో 69కేజీల విభాగంలో ఆమె 0-5 తేడాతో ఓటమి పాలైంది. వరుసగా మూడు రౌండ్లలో సుర్మెనెలి ఆకట్టుకుంది. తొలి రౌండ్లో లవ్లీనా కొన్ని పంచులు బాగానే విసిరినప్పటికీ వాటిని ప్రత్యర్థి తన డిఫెన్స్‌తో అడ్డుకొంది. దాంతో 50-45తో సుర్మెనెలి మొదటి రౌండ్‌ గెలుచుకుంది. రెండో రౌండ్లో ఆమె మరింత రెచ్చిపోగా లవ్లీనా రక్షణాత్మక ధోరణి కనబరిచింది. చివరి రౌండ్లో ఆమె మరింత తేలిపోయింది. ఆఖరికి 30-26, 30-26, 30-25, 20-25, 30-25 టర్కీ బాక్సర్ ఘన విజయం అందుకుంది.
రెజ్లింగ్ మిశ్రమ ఫలితాలు
రెజ్లింగ్లో భారత్కు మిశ్రమ ఫలితాలు వచ్చాయి. ఎన్నో ఆశలు పెట్టుకున్న దీపక్ పూనియా(86కిలోలు) సెమీస్లో నిరాశపరచగా.. రవికుమార్(57 కిలోలు) ఫైనల్కు దూసుకెళ్లాడు. దీంతో దేశానికి మరో పతకాన్ని ఖాయం చేశాడు రవి.
మహిళల రెజ్లింగ్లో 57 కిలోల విభాగంలో అన్షు మాలిక్‌ నిరాశపరిచింది. కనీసం క్వార్టర్‌ ఫైనల్కు అర్హత సాధించలేకపోయింది. బెనారస్‌ రెజ్లర్‌ చేతిలో 8-2తో ఓటమి పాలైంది.
జావెలిన్ త్రో
పురుషుల జావెలిన్ త్రో క్వాలిఫికేషన్ గ్రూప్-ఏలో నీరజ్ చోప్రా అదరగొట్టాడు. మొదటి ప్రయత్నంలోనే ఫైనల్కు ఎంపికయ్యాడు. ఈ ఒలింపిక్స్లో అతడు కచ్చితంగా పతకం గెలుస్తాడనే నమ్మకంతో ఉన్నారు క్రీడాభిమానులు. అయితే శివపాల్ సింగ్ మాత్రం ఫైనల్కు ఆర్హత సాధించలేకపోయాడు.
ఇదీ చూడండి: Tokyo Olympics: హాకీ సెమీస్లో భారత మహిళా జట్టు ఓటమి
