కజకిస్థాన్లోని నూర్-సుల్తాన్ వేదికగా జరిగిన డేవిస్‌కప్‌లో భారత్ తిరుగులేని ప్రదర్శనతో ఆకట్టుకుంది. సీనియర్‌ ఆటగాడు లియాండర్ పేస్‌ మెరిసిన వేళ భారత బృందం 4-0తో పాకిస్థాన్‌ను చిత్తు చేసింది. ఐదు మ్యాచ్ల్లో 4-0 తేడాతో గెలుపొంది డేవిస్ కప్ క్వాలిఫయర్స్కు అర్హత సాధించింది.
వయసు పెరిగినా ఆట తగ్గలేదు...
శనివారం జరిగిన డబుల్స్‌ పోరులో లియాండర్-జీవన్‌ జోడీ మహ్మద్ షోయబ్-అబ్దుల్ రెహ్మన్ను చిత్తు చేసింది. 6-1, 6-3 తేడాతో గెలిచింది భారత జట్టు. 46 ఏళ్ల పేస్‌ ఆట రెండోరోజు హైలైట్‌గా నిలిచింది. 53 నిమిషాల్లో ముగిసిన ఈ మ్యాచ్‌లో పేస్‌, జీవన్‌ ధాటికి పాక్ జోడీ నిలవలేకపోయింది.
తొలి సెట్లో ఆరంభంలోనే ప్రత్యర్థి సర్వీస్‌ బ్రేక్ చేసి 5-1 తేడాతో ఆధిక్యంలో నిలిచిన పేస్‌ ద్వయం.. ఆ తర్వాత 6-1తో సెట్‌ గెలుచుకుంది. రెండో సెట్లో ప్రత్యర్థి కాస్త మెరుగ్గా ఆడి 3-3తో నిలిచినా.. ఎనిమిదో గేమ్‌లో పాక్ జోడీ సర్వీస్‌ బ్రేక్ చేసిన లియాండర్ ద్వయం.. 5-3తో ఆధిక్యంలోకి దూసుకెళ్లింది. చివరికి సర్వీస్‌ నిలబెట్టుకుని 6-3తో సెట్‌తో పాటు మ్యాచ్ నెగ్గింది.
డేవిస్‌కప్‌లో గతేడాది 43వ డబుల్స్‌ మ్యాచ్ గెలిచి.. ఈ టోర్నీలో అత్యధిక డబుల్స్‌ విజయాలు సాధించిన ఆటగాడిగా నికోలా పీట్రాంజెలి రికార్డు బ్రేక్ చేశాడు పేస్‌. తాజా విజయంతో తన రికార్డును తానే సవరిస్తూ 44వ విజయం ఖాతాలో వేసుకున్నాడు.
"డేవిస్ కబ్‌ డబుల్స్‌లో నాకిది 44వ విజయమైనా.. తొలి గెలుపులాగే అనిపిస్తోంది. ఏ విజయానికదే ప్రత్యేకం. భారత్ పేరుని రికార్డు పుస్తకాల్లోకి చేర్చడాన్ని గొప్పగా భావిస్తున్నా".
-లియాండర్ పేస్‌, టెన్నిస్ క్రీడాకారుడు
డేవిస్‌కప్‌లో పేస్‌ 92 మ్యాచ్లు గెలిచాడు. ఇందులో 44 డబుల్స్‌, 48 సింగిల్స్ విజయాలు ఉన్నాయి.
సింగిల్స్లోనూ...
శనివారం జరిగిన రివర్స్ సింగిల్స్ మ్యాచ్‌లో భారత ఆటగాడు సుమిత్ నగాల్ 6-1, 6-0 తేడాతో యూసెఫ్‌ ఖలీల్‌ను ఓడించి భారత్‌కు మరో విజయాన్ని అందించాడు. ఫలితంగా భారత బృందం 4-0 ఆధిక్యంతో గెలిచింది. వచ్చే ఏడాది మార్చి 6, 7 తేదీల్లో జరిగే ప్రపంచ గ్రూప్‌ క్వాలిఫయర్స్ పోరులో భారత్.. క్రొయేషియాతో తలపడనుంది.
