ఫిడే ఆన్లైన్ చెస్ ఒలింపియాడ్లో పసిడి సాధించడం ఓ అద్భుతమని అభిప్రాయపడ్డారు భారత దిగ్గజ ఆటగాడు విశ్వనాథన్ ఆనంద్. తొలిసారి ఒలింపియాడ్ పతకం సొంతం చేసుకున్న ఆనంద్.. సోమవారం ఆన్లైన్ మీడియా సమావేశంలో మాట్లాడారు.
"ఈ టోర్నీ ఓ కలలా అనిపిస్తోంది. ఈ స్వర్ణం నాకెంతో ప్రత్యేకమైంది. యువ ప్లేయర్లకూ ఇదో గొప్ప విజయం. పసిడి గెలవడం ఓ అద్భుతమైన సందర్భం. ఈ పతకాన్ని అపురూపంగా దాచుకుంటా. ఈ విజయాన్ని ఊహించలేదు. సర్వర్‌ డౌన్‌ కావడం వల్ల మా తప్పు లేదని బలంగా వాదన వినిపించాం. నిబంధనల ప్రకారం ఇలాంటి సమస్య కారణంతో ఓటమి ఎదురైతే ఆ జట్టు ఆట నుంచి తప్పుకోవాల్సిందే. కానీ మా విషయంలో మాత్రం తప్పు మాది కాదని ఫిడే త్వరగానే గ్రహించి మాకు అనుకూలంగా నిర్ణయం ప్రకటించింది. ఈ విజయంతో భారత్‌లో చెస్‌కు ఆదరణ మరింత పెరుగుతుందని అనుకుంటున్నా. ప్రభుత్వం కూడా ఆ దిశగా చొరవ తీసుకుంటుందనే నమ్మకం ఉంది. ఇప్పుడీ గెలుపుతో తిరిగి క్రీడా అవార్డుల కోసం చెస్ ప్లేయర్లను పరిగణిస్తారని అనుకుంటున్నా"
విశ్వనాథన్ ఆనంద్, భారత దిగ్గజ చెస్ ప్లేయర్
ఆనంద్తో పాటు విదిత్‌, హరికృష్ణ, హంపి, హారిక, సరీన్‌, ప్రజ్ఞానంద, దివ్య తదితర ప్లేయర్లతో కూడిన భారత జట్టు.. ఆగస్టు 30న జరిగిన టోర్నీలో రష్యాతో సంయుక్త విజేతగా నిలిచింది. ఫలితంగా 93 ఏళ్ల ఫిడే ఆన్లైన్ చెస్ ఒలింపియాడ్ చరిత్రలో భారత్ తొలిసారి స్వర్ణం సాధించింది.
