బ్రిటన్కు చెందిన అథ్లెట్ మో ఫరా(Mo Farah).. తన సుదూర పరుగుతో ఎన్నో రికార్డులు, ఘనతలూ సాధించాడు. చివరగా రియో ఒలింపిక్స్లో రెండు స్వర్ణాలతో పాటు మొత్తంగా నాలుగుసార్లు ఒలింపిక్స్ ఛాంపియన్గా నిలిచాడు. కానీ ఈ ఏడాది టోక్యోలో జరగనున్న విశ్వ క్రీడల(Tokyo Olympics)కు కనీసం అర్హత సాధించలేకపోయాడు. ఒలింపిక్స్ క్వాలిఫయర్స్లో భాగంగా బ్రిటీష్ అథ్లెటిక్స్ ఛాంపియన్షిప్లో 27ని.28 సెకండ్ల కనీస అర్హత సమయాన్ని అందుకోలేకపోయాడు. దీంతో ఈసారి మెగాక్రీడలకు దూరమయ్యాడు.
2012 లండన్, 2016 రియో ఒలింపిక్స్లో స్వర్ణాలతో సత్తాచాటిన మో ఫరా క్రీడాలోకానికి స్ఫూర్తిగా నిలిచాడు. కానీ బ్రిటీష్ అథ్లెటిక్స్ ఛాంపియన్షిప్లో చివరి మూడున్నర కిలోమీటర్లు చాలా ఇబ్బంది పడిన ఇతడు 27.47.04 సమయంలో తన పరుగును పూర్తి చేశాడు. దీంతో 20 సెకండ్ల వ్యవధిలో ఒలింపిక్స్ అర్హతను కోల్పోయాడు.
ఫరా రికార్డులు..
ఇతడి అసలు పేరు మహ్మద్ ముక్తార్ జమా ఫరా. 1999 నుంచి వివిధ అంతర్జాతీయ, యురోపియన్ యూనియన్ ఈవెంట్లలో రికార్డు టైమింగ్‌తో సత్తాచాటాడు. కానీ.. బీజింగ్ ఒలింపిక్స్లో మాత్రం నిరాశే ఎదురైంది. లండన్ ఒలింపిక్స్లో 10వేల మీటర్ల పరుగులో, 5వేల మీటర్ల పరుగులో స్వర్ణాలు సాధించి బ్రిటన్ తరపున లాంగ్ డిస్టెన్స్ రన్నింగ్‌లో తొలి స్వర్ణం అందుకున్న అథ్లెట్‌గా రికార్డు సృష్టించాడు. ఆ తర్వాత మాస్కోలో జరిగిన ప్రపంచ ఛాంపియన్షిప్‌లోనూ స్వర్ణం సాధించాడు. 2015లో యూరో, ప్రపంచ ఛాంపియన్‌షిప్‌లలో డబుల్ గోల్డ్‌మెడల్తో రికార్డు సృష్టించాడు.
