నీరజ్ చోప్రా స్వర్ణంతో టోక్యో ఒలింపిక్స్ను ఘనంగా ముగించింది భారత్. అలాగే విశ్వక్రీడల చరిత్రలో ఎక్కువ పతకాలు సాధించింది ఇండియా. మొత్తం ఏడు పతకాలు దక్కించుకుంది. కానీ కరోనా కారణంగా వచ్చే ఒలింపిక్స్ మూడేళ్లలోనే జరగనున్నాయి. గతేడాది జరగాల్సిన టోక్యో క్రీడలు ఏడాది వాయిదపడటమే ఇందుకు కారణం. తాజాగా ఈ విషయంపై స్పందించిన భారత ఒలింపిక్ స్వర్ణ పతక విజేత అభినవ్ బింద్రా.. వచ్చే పోటీలు కాస్త కష్టతరంగా ఉండబోతున్నాయని తెలిపాడు.
"టోక్యో ఒలింపిక్స్లో ఏడు పతకాలతో భారత్ మంచి ప్రదర్శన చేసింది. భవిష్యత్లోనూ ఇదే స్ఫూర్తి కొనసాగుతుంది. కానీ వచ్చే ఒలింపిక్ సైకిల్ కాస్త కష్టతరంగా ఉండబోతుంది. తక్కువ సమయం ఉండటమే ఇందుకు కారణం. సాధారణంగా ఒలింపిక్స్ ముగిశాక విశ్రాంతి, రికవరీ కోసం ఆటగాళ్లకు ఏడాది అవసరమవుతుంది. అయితే ఈసారి విశ్వక్రీడలు తొందరగా జరగబోతున్నాయి."
-అభినవ్ బింద్రా, షూటర్
కరోనా కారణంగా 2020లో జరగాల్సిన టోక్యో ఒలింపిక్స్ ఈ ఏడాది జరిగాయి. అలాగే 2024లో పారిస్ ఒలింపిక్స్లో జరగబోతున్నాయి. దీంతో క్రీడాకారులకు మూడేళ్ల సమయమే లభించనుంది. అందువల్ల వారు వీలైనంత తొందరగా మళ్లీ విశ్వక్రీడల కోసం ప్రాక్టీస్ మొదలుపెట్టాల్సి ఉంటుంది. అలాగే క్వాలిఫికేషన్ పోటీలు, కోటా కూడా తగ్గే అవకాశం ఉంది.
క్రీడల్లో మరింత పురోగతి సాధించేందుకు కింది స్థాయి నుంచి మంచి వాతావరణాన్ని ఏర్పాటు చేయాల్సిన అవసరం ఉందన్నాడు బింద్రా.
"అథ్లెట్లకు ట్రైనింగ్లో సైన్స్, టెక్నాలజీ, ఇంజినీరింగ్, విశ్లేషణ వంటి సామర్థ్యాలు పెంపొందించాలి. జాతీయ స్థాయిలోనే కాక జూనియర్ స్థాయిలోనూ వారికి సంపూర్ణ శిక్షణ అందించాలి. అలాగే దేశంలో కళాశాల స్థాయిలో క్రీడా వ్యవస్థ బలోపేతం కావాలి" అని వెల్లడించాడు బింద్రా.
