కరోనా మహమ్మారి క్రీడల పోటీలకు ఇబ్బందులు కలిగిస్తోంది. ఎక్కువగా జట్లు, క్రీడాకారులు, సిబ్బంది పాల్గొనే టోర్నీలపై ప్రభావం చూపిస్తూ, సవ్యంగా సాగనివ్వడం లేదు. పాజిటివ్ కేసులు రావడం వల్ల ఇప్పటికే ఐపీఎల్ నిరవధికంగా వాయిదా పడింది. అలానే ఒలింపిక్స్‌కు కొవిడ్ ముప్పు తప్పేలా కనిపించట్లేదు. బహుశా మెగా క్రీడలు కూడా వాయిదా పడే అవకాశాలు ఎక్కువగా ఉన్నట్టు తెలుస్తోంది.
షెడ్యూల్ ప్రకారం ఒలింపిక్స్ గతే సంవత్సరమే జరగాలి. కానీ కరోనా కారణంగా ఏడాది వాయిదా పడింది. ఈ ఏడాది జులైలో నిర్వహించేందుకు అన్నీ ఏర్పాటు చేస్తున్నారు. ఈ సమయంలో జపాన్లోని నగరాల్లో కొవిడ్ ఉద్ధృతి పెరుగుతుండటం వల్ల ప్రభుత్వం కరోనా అత్యయిక స్థితిని పొడగించనుందని సమాచారం. కేసులు పెరగడం వల్ల క్రీడలు జరగాల్సిన టోక్యో, ఒసాక, క్యోటో, హ్యోగో ప్రాంతాల్లో మే 11 వరకు అత్యయిక స్థితిని పొడగిస్తారని స్థానిక మీడియాలో వార్తలు వస్తున్నాయి.
కొన్ని రోజుల క్రితం నుంచి ఒలింపిక్స్‌కు అభిమానులను అనుమతించాలా.. వద్దా? అన్న విషయంపై అక్కడి ప్రభుత్వం చర్చలు జరుపుతోంది. ఈ నెలలోనే నిర్ణయం తీసుకోవాలని భావించింది. ప్రస్తుత పరిస్థితుల రీత్యా ఆ నిర్ణయాన్ని జూన్‌కు వాయిదా వేశారని తెలిసింది. జపాన్‌లో కరోనా అత్యయిక స్థితి పొడగింపు నిర్ణయం తీసుకొనేందుకు ప్రధాని యోషిహిడె సుగా.. సీనియర్‌ మంత్రులు, అధికారులతో బుధవారం చర్చించనున్నారు. అత్యయిక స్థితిలో మద్యం దుకాణాలు, రెస్టారెంట్లు, థియేటర్లు, భారీ షాపింగ్‌ మాల్స్‌, క్రీడా మైదానాలను మూసివేస్తారు.
ఇదీ చూడండి: ఒలింపిక్స్ టార్చ్ రిలేను కలవరపెడుతున్న కరోనా
