రెజ్లర్ సుశీల్ కుమార్(Wrestler Sushil kumar) నేర స్వభావ ఘటనలు ఒక్కొక్కటిగా బయటపడుతున్నాయి. స్టేడియంలోనే కాకుండా బయటా అతడి ప్రవర్తన కటువుగానే ఉండేదని సమాచారం. బాకీ పడ్డ రూ.4లక్షల సొమ్మును చెల్లించాలని కోరగా ఓ దుకాణాదారుడిని అతడు తీవ్రంగా కొట్టాడని తెలుస్తోంది. భయపడ్డ అతడు అప్పట్నుంచి డబ్బులు అడగడం మానేశాడట.
చాలాకాలంగా ఛత్రసాల్‌ స్టేడియంలోనే(Chatrasal Stadium) సుశీల్ కుమార్ సాధన చేస్తున్నాడు. అక్కడ శిక్షణ తీసుకొనే రెజ్లర్లకు సమీపంలోని ఓ దుకాణాదారు నిత్యావసరాలు సరఫరా చేస్తుండేవారు. తర్వాత డబ్బులు తీసుకొనేవారు. ఈ క్రమంలోనే సుశీల్ కుమార్‌కు ఆయన నిత్యావసరాలు, ఎండు ఫలాలు సరఫరా చేశాడు. అతడు డబ్బులు చెల్లించకపోవడం వల్ల రూ.4 లక్షల వరకు బాకీ పడ్డాడు. డబ్బులు చెల్లించాలని కోరగా సుశీల్ తనపై దాడి చేశాడని సదరు దుకాణాదారు మీడియాకు చెప్పాడు. ఆ తర్వాత అతడి మిత్రులూ బెదిరించేవారని వెల్లడించాడు. భయపడ్డ అతడు రెండు నెలల తర్వాత ఫిర్యాదు చేయగా పోలీసులు కేసు నమోదు చేసేందుకు నిరాకరించారని తెలపడం గమనార్హం.
సాగర్ రాణా హత్య కేసులో సుశీల్‌పై ఉచ్చు బిగుస్తోంది. ప్రత్యక్ష సాక్షులు అతడికి వ్యతిరేకంగా వాంగ్మూలాలు ఇచ్చారని తెలిసింది. అలాగే గ్యాంగ్‌స్టర్లతో అతడి సంబంధాలను వెలికి తీస్తున్నారు. అతడితో సహా తొమ్మిది మందిని అరెస్టు చేశారు. మరో ముగ్గురి కోసం వెతుకుతున్నారు. వేగంగా దర్యాప్తు చేస్తున్నారు.
ఇదీ చూడండి sushil kumar: అప్రూవర్‌గా సుశీల్ ప్రాణ మిత్రుడు!
