Uber cup quarter finals: ఉబెర్ కప్ నుంచి భారత మహిళ జట్టు వెనుదిరిగింది. ఒలింపిక్ పతక విజేత, ప్రపంచ నం.7 పీవీ సింధు సారథ్యంలోని మహిళల జట్టు థాయ్లాండ్ చేతిలో 0-3 తేడాతో ఓడిపోయింది. తొలి మ్యాచ్లో సింధు.. ప్రపంచ నం.8 ర్యాంకర్ రాచనోక్ ఇంటనాన్ చేతిలో 21-18 17-21 12-21 తేడాతో పోరాడి పరాజయం పొందింది. ఈ మ్యాచ్ 59 నిమిషాల పాటు సాగింది. ఇంటనాన్తో ఇప్పటివరకు 11 మ్యాచ్లు ఆడిన సింధు.. నాలుగు మ్యాచుల్లోనే విజయం సాధించింది. 7 విజయాలతో ఇంటనాన్ పైచేయి సాధించింది.
Badminton News: అనంతరం మహిళల డబుల్స్ మ్యాచ్లో శ్రుతి మిశ్ర, సిమ్రన్ సింఘి జోడి 16-21 13-21 తేడాతో జాంగ్కోల్పాన్, రవిండ ప్రజోంగ్జాయ్ చేతిలో ఓడిపోయింది. మూడో మ్యాచ్లో ఆకర్షి కశ్యప్ కూడా 16-21 11-21 తేడాతో చోచువాంగ్ చేతిలో పరాజయం పొందింది. దీంతో థాయ్లాండ్ 3-0 తో తిరుగులేని ఆధిక్యాన్ని సాధించింది. ఫలితంగా మరో రెండు మ్యాచ్లు ఆడాల్సిన అవసరం లేకుండానే థాయ్లాండ్ సెమీస్లోకి దూసుకెళ్లింది.
PV Sindhu News: బుధవారం జరిగిన నామమాత్రపు గ్రూప్ డీ చివరి మ్యాచ్లో కూడా సింధు జట్టు కొరియా చేతిలో 0-5తేడాతో ఓడిపోయింది. అయితే అప్పటికే రెండు విజయాలతో క్వార్టర్ పైనల్స్ చేరడం వల్ల ఫలితంపై ప్రభావం లేదు. కానీ గురువారం జరిగిన క్వార్టర్ ఫైనల్స్లో కూడా భారత జట్టు పరాజయ పరంపర కొనసాగించి టోర్నీ నుంచి నిష్క్రమించింది. మరోవైపు ఇవాళే జరిగే థామస్ కప్ క్వార్టర్ ఫైనల్స్లో భారత పురుషుల జట్టు మలేషియాతో తలపడనుంది.
ఇదీ చదవండి: 100 మీటర్ల హర్డిల్స్లో 'తెలుగమ్మాయి' జాతీయ రికార్డు
