Satwiksairaj Reddy Guinness Record : భారత స్టార్ షట్లర్ సాత్విక్ సాయిరాజ్ తాజాగా ఓ అరుదైన ఘనతను తన ఖాతాలోకి వేసుకున్నాడు. 22 ఏళ్ల ఈ యంగ్ షట్లర్.. బ్యాడ్మింటన్‌లో అత్యంత వేగంగా షాట్ కొట్టిన పురుష క్రీడాకారుడిగా గిన్నిస్ ప్రపంచ రికార్డును నెలకొల్పాడు. గంటకు 565 కిమీ వేగంతో షాట్ కొట్టి ఈ రికార్డును తన పేరిట లిఖించుకున్నాడు.
తన బ్యాడ్మింటన్ పార్ట్నర్ చిరాగ్ శెట్టితో కలిసి ఇటీవల ఇండోనేషియా ఓపెన్ సూపర్ 1000ను గెలుచుకున్న సాత్విక్.. మలేషియాకు చెందిన టాన్ బూన్ హీయోంగ్ 2013లో నెలకొల్పిన రికార్డును బద్దలు కొట్టాడు. మలేషియా ప్లేయర్ అప్పట్లో గంటకు 493 కిమీ వేగంతో ఆ స్క్వాష్ కొట్టి చరిత్రకెక్కాడు. సాధారణంగా ఓ రేసింగ్ కార్ 372.6 km/h గరిష్ట వేగంతో ప్రయాణిస్తుంది. అయితే సాత్విక్ కొట్టిన స్మాష్ ఫార్ములా 1 కారు టాప్ స్పీడ్ కంటే ఎక్కువ ఉండటం విశేషం.
మరోవైపు మలేషియాకు చెందిన టాన్ పెర్లీ 438 కిమీ/గం వేగంతో.. అత్యంత వేగవంతమైన మహిళా బ్యాడ్మింటన్ ప్లేయర్గా గిన్నిస్ ప్రపంచ రికార్డును నెలకొల్పింది. ఈ క్రమంలో ఈ విషయాన్ని ప్రముఖ స్పోర్ట్స్ ఎక్విప్మెంట్ తయారీ సంస్థ యోనెక్స్ ఓ ప్రకటనలో వెల్లడించింది.
"యోనెక్స్ బ్యాడ్మింటన్ అథ్లెట్లు, సాత్విక్‌సాయిరాజ్ రాంకిరెడ్డి, టాన్ పెర్లీ అత్యంత వేగవంతమైన బ్యాడ్మింటన్ హిట్లతో కొత్త గిన్నిస్ ప్రపంచ రికార్డులను నెలకొల్పారని ప్రకటించడం గర్వంగా ఉంది" అని యోనెక్స్ తెలిపింది.
ఇండోనేసియా
తాజాగా సాత్విక్ సాయిరాజ్ -చిరాగ్ శెట్టి చరిత్ర సృష్టించారు. ఇండోనేషియా ఓపెన్ డబుల్స్‌ టైటిల్ నెగ్గిన ఈ యువ ప్లేయర్స్ ఈ ఘనత సాధించిన తొలి డబుల్స్‌ ప్లేయర్లుగా నయా రికార్డును నెలకొల్పారు. బీడబ్ల్యూఎఫ్ ప్రపంచ టూర్-1000 టోర్నీ పురుషుల డబుల్స్‌ ఫైనల్లో 21-17, 21-18తో ఆరోన్‌ చియా-సో వుయిక్‌ (మలేషియా) ద్వయంపై సాత్విక్ ద్వయం విజయం సాధించింది.
సెమీస్లో 17-21, 21-19, 21-18 తేడాతో సౌత్ కొరియాకు చెందిన కాంగ్‌ మిన్‌ హిక్‌–సియో సెంగ్‌ జె జోడీని ఓడించి టైటిల్ పోరుకు అర్హ‌త సాధించింది. ఫలితంగా బీడబ్ల్యూఎఫ్ వరల్డ్ టూర్ సూపర్ 1000 ఈవెంట్లో ఫైనల్కు చేరిన మొద‌టి భారత జోడీగా రికార్డు సృష్టించింది. క్వార్టర్స్లో 21-13, 21-13 తేడాతో టాప్ సీడ్‌ ఫజర్‌ అల్ఫియాన్‌- మహమ్మద్‌ రియాన్‌ (ఇండోనేసియా)పై విజయాన్ని అందుకుంది. మంచి స్మాష్‌లు, డ్రాప్‌లు, క్రాస్‌కోర్టు షాట్లతో విజృంభించిన ఈ ద్వయం 41 నిమిషాల్లోనే ప్రత్యర్థిని మట్టికరిపించింది. ఇక ఈ సీజన్‌లో ఈ జోడీ.. స్విస్‌ ఓపెన్, ఆసియా ఛాంపియన్‌షిప్‌లో గెలుపొంది గోల్డ్ మెడల్స్ను ముద్దాడగా.. మలేసియా ఓపెన్‌లో సెమీఫైనల్‌ చేరింది.
