ఒలింపిక్స్, పారాలింపిక్స్ క్రీడాకారులకు శుభవార్త

ఒలింపియన్లు, పారాలింపియన్లను కోచ్​లు, సహాయక కోచ్​ పదవుల కోసం తీసుకోనుంది భారత క్రీడా ప్రాధికార సంస్థ. ఈ మేరకు గురువారం ఓ ప్రకటన విడుదల చేసింది.

ఒలింపియన్లు, పారాలింపియన్లను జాతీయ శిక్షణా కేంద్రాల్లో కోచ్​లు, సహాయ కోచ్​లుగా నియమించనుంది భారత క్రీడా ప్రాధికార సంస్థ (సాయ్). ఇప్పటికే ప్రారంభమైన ఈ నియామక ప్రక్రియలో భాగంగా 23 నుంచి అసిస్టెంట్ కోచ్​లు, నలుగురు కోచ్​లను తీసుకోనున్నారు. ఈ మేరకు సాయ్ ఓ ప్రకటనను విడుదల చేసింది.

ఇదీ విధానం..

ఒలింపిక్స్, పారాలింపిక్స్ క్రీడాకారులు సహాయ కోచ్​ పదవికి, పతక విజేతలు నేరుగా కోచ్​ పదవికి దరఖాస్తు చేసుకోవచ్చు. ఇప్పటికీ ఆడుతున్న అథ్లెట్లు, కోచ్​లుగా ఎంపికైనవారు.. అంతర్జాతీయ స్థాయిలో సమర్థవంతంగా ఆడినంతకాలం తమ కెరీర్​ను కొనసాగించవచ్చని సాయ్ స్పష్టం చేసింది. కోచ్​లుగా నియామకం అయినవాళ్లు.. ఎన్​ఎస్​ఎన్​ఐఎస్​ నిర్వహించే క్రీడా శిక్షణలో డిప్లొమా చేయాల్సి ఉంటుందని చెప్పింది.

క్రీడాకారుల విజయాలను గుర్తించడానికి క్రీడామంత్రిత్వ శాఖ, సాయ్​ నిరంతరం కృషిచేస్తాయని కేంద్ర మంత్రి కిరణ్ రిజుజు చెప్పారు. "ఒలింపియన్లు, పారాలింపియన్లను కోచ్​లుగా నియమించడం వారి సేవలను ప్రభుత్వం గుర్తించడమే. శిక్షణ ఇచ్చేందుకు నాణ్యమైన ఆటగాళ్లను తీసుకోవాలనే ఉద్దేశమూ ఉంది. శిక్షణ వ్యవస్థకు కోచులే కీలకం. అత్యుత్తమ ఆటగాళ్లను కోచ్​లుగా నియమించాల్సిన అవసరం ఉంది" అని రిజుజు అన్నారు.

ఇదీ చూడండి: ఒలింపిక్స్​పై చెరో మాట.. సందిగ్ధంలో టోర్నీ!