91వ విజయంతో ఎఫ్‌1 దిగ్గజం మైకెల్‌ షుమాకర్‌ పేరిట ఉన్న ప్రపంచ రికార్డును సమం చేయాలనుకున్న లూయిస్‌ హామిల్టన్ (మెర్సీడెజ్‌)కు నిరాశ తప్పలేదు. అతడి జట్టుకే చెందిన వాల్టెరి బొటాస్ రష్యన్ గ్రాండ్ ప్రిని ఎగరేసుకుపోయాడు.
ఆదివారం ఫేవరెట్‌గా, పోల్ పోజిషన్‌ నుంచి రేసును ఆరంభించిన హామిల్టన్ రేసును మూడో స్థానంతో ముగించాడు. టైమ్‌ పెనాల్టీల కారణంగా అతడు దెబ్బతిన్నాడు. మ్యాక్స్‌ వెర్‌స్టాపెన్‌ (రెడ్‌బుల్‌) రెండో స్థానం సాధించాడు. ఈ రేసులో గెలవకున్నా ఛాంపియన్‌షిప్‌ రేసులో హామిల్టన్ మంచి ఆధిక్యంతో అగ్రస్థానంలో కొనసాగుతున్నాడు. సీజన్‌లో మరో ఏడు రేసులు మిగిలి ఉండగా రెండో స్థానంలో ఉన్న బొటాస్ కన్నా హామిల్టన్ 44 పాయింట్ల ఆధిక్యంలో ఉన్నాడు.
