రెండుసార్లు ఒలింపిక్స్ మెడల్ విజేత, బ్యాడ్మింటన్ స్టార్ పీవీ సింధు తన కోచ్ పార్క్ టే సాంగ్తో తెగతెంపులు చేసుకుంది. నాలుగేళ్ల పాటు పార్క్ కోచింగ్లో శిక్షణ పొందిన ఆమె.. ప్రస్తుతం కొత్త కోచ్ కోసం వెతుకులాటలో పడింది. ఈ విషయాన్ని పార్క్ స్పష్టం చేశాడు. ఈ ఏడాది సీజన్ గొప్పగా ప్రారంభించని నేపథ్యంలో సింధు నిర్ణయాన్ని గౌరవిస్తూ తానే స్వయంగా తప్పుకుంటున్నట్లు తెలిపాడు.
2019 వరల్డ్ ఛాంపియన్‌షిప్స్ నుంచి పార్క్ టే సాంగ్ - సింధు ప్రయాణం మొదలైంది. మొదట్లో అతడిని మెన్స్ సింగిల్స్ కోచ్గా బ్యాడ్మింటన్ అసోసియేషన్ ఆఫ్ ఇండియా నియమించినా.. తర్వాత సింధు పర్సనల్ కోచ్గా మారాడు. పార్క్ కోచింగ్ శిక్షణలో సింధు ప్రపంచ ఛాంపియన్‌షిప్స్ స్వర్ణం, టోక్యో ఒలింపిక్స్లో కాంస్య పతకం, కామన్వెల్త్ గేమ్స్లో గోల్డ్ మెడల్ను ముద్దాడింది. కానీ కొంత కాలంగా సింధు వరుస పరాజయాలను అందుకుంటోంది. గతేడాది మడమ గాయం కారణంగా చాలా కాలం పాటు బ్యాడ్మింటన్ కోర్టుకు దూరంగా ఉన్న ఆమె.. టోక్యోలో జరిగిన వరల్డ్ ఛాంపియన్‌షిప్లోనూ పాల్గొనలేదు. ఈ ఏడాది మలేషియా ఓపెన్, ఇండియా ఓపెన్లలో తొలి రౌండ్లలోనే వెనుదిరిగింది. బ్యాడ్మింటన్ ఏషియా మిక్స్‌డ్ టీమ్ ఛాంపియన్‌షిప్లోనూ సెమీఫైనల్లో ఓడిపోయింది.
ఈ నేపథ్యంలోనే తాజాగా.. సింధు కోచ్గా బాధ్యతల నుంచి తప్పుకుంటున్నట్లు చెబుతూ పార్క్ ఓ ఎమోషనల్ పోస్ట్ చేశాడు. సింధు వైఫల్యాలకు కోచ్గా తానే బాధ్యత వహిస్తున్నట్లు స్పష్టం చేశాడు. సింధు మార్పు కోసం ఎదురు చూస్తోందని, ఓ కొత్త కోచ్ వేటలో ఉన్నట్లు తెలిపాడు. ఆమె నిర్ణయాన్ని గౌరవిస్తూ తాను తప్పుకుంటున్నట్లు పేర్కొన్నాడు.
ఇదీ చూడండి: కొత్త అల్ట్రా లగ్జరీ విల్లా కొన్న విరుష్క.. ఎన్ని కోట్లంటే?
