నేషనల్ బాస్కెట్బాల్ అసోసియేషన్(ఎన్బీఏ) ఈ రోజు నుంచే ప్రారంభం కానుంది. ఈ ప్రతిష్టాత్మక టోర్నీకి భారత్ తొలిసారి ఆతిథ్యమివ్వనుంది. ఇందులో రిలయన్స్ ఫౌండేషన్ ఛైర్పర్సన్ నీతా అంబానీ ప్రత్యేక గౌరవాన్ని అందుకోనున్నారు. ఇండియానా పేసర్స్ - శాక్రమెంటో కింగ్స్ మధ్య జరగనున్న ప్రారంభ గేమ్కు మ్యాచ్ బాల్ అందించనున్నారు.
ఈ లీగ్తో రిలయన్స్ ఫౌండేషన్కు ఆరేళ్ల భాగస్వామ్యం ఉంది. జూనియర్ ప్రోగ్రాం ద్వారా వేడుకలా చేయనుంది రిలయన్స్ ఫౌండేషన్. ముంబైలోని నేషనల్ స్పోర్ట్స్ క్లబ్ ఆఫ్ ఇండియాలో జరుగనున్న తొలి మ్యాచ్ వీక్షించేందుకు చిన్నారులను తీసుకురానుంది.
"ఎన్బీఏ భారత్కు తీసుకురావడాన్ని రిలయన్స్ ఫౌండేషన్ గర్వంగా భావిస్తోంది. తొలిమ్యాచ్ను ప్రత్యక్షంగా చూసే అవకాశం ఈ చిన్నారులకు లభిస్తోంది. ఎన్బీఏతో మా ప్రయాణంలో ఇదో కీలక పరిణామం. ఈ మజిలీలో మాతో భాగస్వామ్యమైనందుకు ఎన్బీఏకు కృతజ్ఞతలు. విభిన్న రకాల క్రీడల్లో భారత్ రాణిస్తోంది. 25ఏళ్ల లోపు యువకులు భారత్లో 60 కోట్ల మంది ఉన్నారు. క్రీడల్లో భారత భవిష్యత్తు మరింత వెలుగొందుతుందని అనుకుంటున్నా" - నీతాఅంబానీ, రిలయన్స్ ఫౌండేషన్ ఛైర్పర్సన్.
20 రాష్ట్రాల్లోని 34 పట్టణాలకు చెందిన 1.1 కోట్ల మంది పిల్లలకు ఈ గేమ్‌ను పరిచయం చేయడం ద్వారా ప్రపంచంలోనే అతిపెద్ద జూనియర్ ఎన్బీఏ ప్రోగ్రామ్‌గా పేరు తెచ్చుకోవడం మరో విశేషం. ఫిజికల్ ఎడ్యుకేషన్‌లో బాస్కెట్ బాల్‌ను చేర్చడం ద్వారా యువత ఆరోగ్యకరమైన, చురుకైన జీవితాన్ని పొందేందుకు ఈ కార్యక్రమం ఉపయోగపడుతోంది.
ఇదీ చదవండి: చదరంగం: ప్రపంచ 3వ ర్యాంకులో కోనేరు హంపి
