ఒలింపిక్స్ ప్రారంభానికి మరి కొద్ది రోజుల సమయం మాత్రమే ఉంది. ఇప్పటికే ఆయా దేశాల అథ్లెట్లు టోక్యోలోని ఒలింపిక్ గ్రామానికి చేరుకున్నారు. భారత్ నుంచి వందకుపైగా మంది ఆటగాళ్లు జపాన్లో అడుగుపెట్టారు. ఈ నేపథ్యంలో క్రీడాకారులకు ఎలాంటి ఆహారాన్ని ఇస్తున్నారు? ఆయా సదుపాయాల పరిస్థితి ఏంటనే దానిపై ఓ లుక్కేద్దాం.
భారత అథ్లెట్లు ఒక్కొక్కరుగా టోక్యోకు చేరుకుంటున్నారు. అయితే ఇప్పటికే అక్కడికి చేరుకున్న వారికి ఆహారం విషయంలో ఎలాంటి ఇబ్బందులు లేవట. కానీ హౌస్ కీపింగ్, వేడి నీళ్ల విషయంలోనే కొంత అసౌకర్యానికి లోనవుతున్నారు. ఉదయాన్నే వేడి నీళ్లు తాగేందుకు ఆటగాళ్లందరికీ సరిపడా ఎలక్ట్రిక్ కెటిల్స్ అందుబాటులో లేక అవస్థలు పడుతున్నారు. ఈ విషయాన్ని భారత ఎంబసీ దృష్టికి తీసుకెళ్లారు.
"భారత అథ్లెట్లు రోజూ ఉదయాన్నే వేడి నీరు తాగడానికి కెటిళ్లు కావాలంటూ వినతులు వచ్చాయి. మేము ఈ విషయమై భారతీయ ఎంబసీని అభ్యర్థించాం. త్వరలోనే వారికి కెటిళ్లను అందజేస్తాం", అని ఓ అధికారి వెల్లడించారు.
వసతి సదుపాయాలు బాగున్నప్పటికీ రూమ్లను రోజూ శుభ్రపర్చడం లేదని అథ్లెట్లు అసంతృప్తి వ్యక్తం చేశారు. కరోనా సమయంలో ఇది మంచి విషయం కాదంటున్నారు.
ఆహారం, శిక్షణకు సంబంధించి ఎలాంటి ఇబ్బందులు లేవని భారతీయ అథ్లెట్ సాథియన్ తెలిపాడు. భారతీయ వంటకాలతో పాటు ప్రపంచంలోని వివిధ రకాల వంటకాలను వడ్డిస్తున్నట్లు పేర్కొన్నాడు.
ఇదీ చదవండి: Olympics: రెజ్లర్లపై భారీ అంచనాలు.. పతకాలు సాధిస్తారా?
