"నేను సరైన నిర్ణయం తీసుకున్నాను, భారత్ తరఫున మిక్స్డ్ మార్షల్ ఆర్ట్స్(ఎమ్ఎమ్ఏ)లో ఓ ఛాంపియన్ ఉండాలనేదే నా లక్ష్యం. అందుకే రెజ్లింగ్ నుంచి ఈ క్రీడలోకి అడుగుపెట్టాను" అని భారత మహిళా రెజ్లర్ రీతూ ఫొగాట్ చెప్పింది. అసలు ఎందుకు ఎమ్ఎమ్ఏలోకి అరంగేట్రం చేసింది? దీనిపై ఆసక్తి ఎలా కలిగింది? ఛాంపియన్గా అవతరించేందుకు ఎంతలా కష్టపడుతోంది? సహ పలు విషయాల గురించి 'ఈటీవీ భారత్'తో ప్రత్యేకంగా ముచ్చటించింది రీతూ. ఆ సంగతులు ఆమె మాటల్లోనే..
మిక్స్డ్ మార్షల్ ఆర్ట్స్లో మీ రెజ్లింగ్ అనుభవం ఉపయోగపడుతుందా?
రెజ్లింగ్ నేపథ్యం నుంచి వచ్చిన వారు ఎమ్ఎమ్ఏలో బాగా రాణించగలరు. వారికి మంచి భవిష్యత్తు, లాభం ఉంటుంది. ప్రస్తుతం ఇందులో ఉన్న చాలా మంది పోరాట యోధులు మల్లయుద్ధం నేపథ్యం నుంచి వచ్చినవారే.
ఈ నిర్ణయంపై మీ నాన్న మహవీర్ ఎలా స్పందించారు?
నేను యూట్యూబ్లో మిక్స్డ్ మార్షల్ ఆర్ట్స్ బాగా చూసేదానిని. అలా దానిపై అమితమైన ఇష్టం పెరిగింది. రష్యా మాజీ పోరాట యోధుడు ఖబీబ్ వీడియోలు ఎక్కువగా చూసి ఆశ్చర్యపోయేదాన్ని. మార్షల్ ఆర్ట్స్లో భారత్ తరఫున ఆడేవారు ఒక్కరూ ఎందుకు లేరని అనుకుని, మనకు ఓ ఛాంఫియన్ ఉండాలని నిశ్చయించుకున్నాను. కానీ శిక్షణ శిబిరాలు ఎక్కడ ఉన్నాయో తెలీదు. ఎలా ఆడాలో అవగాహన లేదు.
అప్పుడే ఆసియాలోనే అతి పెద్ద జిమ్ నుంచి ఓ అవకాశం లభించింది. నాకు ఆసక్తి ఉంటే శిక్షణ ఇస్తానని చెప్పారు. అప్పటికే రెజ్లింగ్లో మంచి ఫామ్లో ఉన్నాను. 2020 టోక్యో ఒలింపిక్స్కు సన్నద్ధమవుతున్నాను. అదే సమయంలో ఎమ్ఎమ్ఏలోకి ప్రవేశం చేయాలనే నా ఉద్దేశం గురించి మొదటగా మా సోదరీమణులతో చర్చించాను. ఆ తర్వాత మా నాన్నకు చెప్పాను. అయితే మా కుటుంబం కాస్త ఆందోళనపడ్డారు. కానీ తర్వాత బాగా ప్రోత్సాహించారు. రెజ్లింగ్ లేదా ఎమ్ఎమ్ఏ.. ఈ రెండింటిలో దేనిపై దృష్టి పెట్టిన మంచి పేరు తీసుకురావాలని నాన్న చెప్పారు.
భవిష్యతులో ఏ ఫైటర్ను ఢీకొట్టాలనుకుంటున్నారు?
52 కేజీల విభాగంలో తలపడటం నాకు కొంచెం కష్టంగా ఉంది. ఈ విభాగంలోని ప్రత్యర్థులను ఎదుర్కోవడం సవాలే. ప్రత్యర్థి ఎవరైనా సరే వారితో తలపడటానికి ఎప్పుడూ సిద్ధమే. అందుకోసం బాగా శ్రమిస్తాను.
ఒక్క ఛాంపియన్షిప్లోని నాలుగు బౌట్స్లో గెలిచారు. భవిష్యత్తులో ఆడే బౌట్స్కు, ఎమ్ఎమ్ఏ ప్రపంచ ఛాంపియన్షిప్ కోసం ఎలా సిద్ధమవుతున్నారు?
ఈ నాలుగు బౌట్స్ నుంచి చాలా నేర్చుకున్నాను. ఎప్పటికప్పుడు మెరుగవుతూ వచ్చాను. నాలుగో బౌట్ గెలిచిన తర్వాత ఆత్మవిశ్వాసం బాగా పెరిగింది. లక్ష్యాన్ని చేరుకోవడానికి ఒక్కో మెట్టు ఎక్కుతూ వెళ్తున్నాను. నైపుణ్యాలను పెంచేందుకు నా కోచ్ మంచి శిక్షణ ఇస్తున్నారు. నాలో ఉన్న బలహీనతలపై దృష్టి పెట్టి, వాటిని అధిగమించి మరింత బలంగా తయారు కావడానికి శ్రమిస్తున్నాను. ఛాంపియన్గా నిలిచి నా దేశ కీర్తి ప్రతిష్టలను పెంచుతాను.
ఇదీ చూడండి : ఖేల్రత్నకు ఎంపికైన రెజ్లర్కు కరోనా
