'క్రికెట్ ముందు నా విజయం ఓడిపోయింది'

ఇటీవలే ఇటలీలోని నేపిల్స్​లో జరిగిన వరల్డ్​ యూనివర్సీటీ గేమ్స్​లో బంగారు పతకాన్ని సాధించింది ద్యుతీ చంద్. ఈ ఘనత సాధించిన తొలి భారతీయురాలిగా రికార్డు సృష్టించింది. ప్రస్తుతం టోక్యో ఒలింపిక్సే​ తన లక్ష్యమని ఈటీవీ భారత్​ ప్రత్యేక ముఖాముఖిలో చెప్పింది ద్యుతి.

ఒడిశాలోని ఓ మారుమూల గ్రామంలో జన్మించిన ద్యుతీ చంద్.. పీటీ ఉష తర్వాత ఒలింపిక్స్​కు(2016 రియో) అర్హత సాధించిన తొలి స్ప్రింటర్​గా ఘనత కెక్కింది. ఇటీవలే నేపిల్స్​లో జరిగిన వరల్డ్ వర్సీటీ గేమ్స్​లో సత్తాచాటింది 100 మీటర్ల పరుగులో స్వర్ణపతకాన్ని కైవసం చేసుకుని వరల్డ్​ యూనివర్సిటీ గేమ్స్​లో ఈ ఘనత సాధించిన తొలి భారతీయురాలిగా రికార్డు సృష్టించింది. ఈ విజయం అంత సులభంగా దక్కలేదని అంటోంది ద్యుతీ. దీని వెనుక ఉన్న కృషిని ఈటీవీ భారత్​తో పంచుకుంది. ఆ విశేషాలు ఆమె మాటల్లోనే....

భయం భయంగానే ఫైనల్లో..

ఈ విజయం అంత సులువుగా రాలేదు. వరల్డ్​ వర్సిటీ గేమ్స్​ ఫైనల్లో కొంచెం భయమేసింది. ఎందుకంటే 100 మీటర్ల విభాగంలో నాతో తలపడిన ఐరోపా క్రీడాకారులందరికీ నా కంటే మంచి రికార్డు ఉంది.

విజయం ఒడిశా ప్రభుత్వానికి అంకితం..

100 మీటర్ల పరుగులో నెగ్గిన ఈ స్వర్ణాన్ని ఒడిషా ప్రభుత్వానికి, నా స్పాన్సర్లకు, శ్రేయోభిలాషులకు అంకితమిస్తున్నా. ఎందుకంటే నేను కఠిన పరిస్థితులను ఎదుర్కొంటున్నప్పుడు వారే నాకు అండగా నిలిచారు. వాళ్ల మద్దతు లేకుంటే నాకు ఈ విజయం దక్కేది కాదు.

టోక్యో ఒలింపిక్సే లక్ష్యం..

ప్రస్తుతం నా దృష్టి 2020 టోక్యో ఒలింపిక్స్​పైనే ఉంది. విశ్వక్రీడల్లో దేశానికి స్వర్ణం నెగ్గాలనేది నా ఆశయం. ఇందుకు విదేశాల్లో సాధన చేయాలనుకుంటున్నా. అక్కడ పరిస్థితులకు అలవాటు పడాలి. కేంద్ర, రాష్ట్ర ప్రభుత్వాలు ఇందుకోసం ప్రోత్సాహం అందించాలని కోరుతున్నా.

కేరీర్​ ఆరంభంలో సోదరి చేయూత..

నా కెరీర్ ప్రారంభంలో చాలా కష్టాలు పడ్డాను. ముఖ్యంగా ఆర్థిక సమస్యలు వెంటాడాయి. ఆ సమయంలో నా సోదరి అండగా నిలిచింది. అనంతరం నా విజయాలు చూసి ప్రభుత్వం సాయం చేసింది.

ఇటీవలే ఓ మహిళతో సహజీవనం చేస్తున్నానని చెప్పింది ద్యుతీ చంద్. దీనిపై ఆమె కుటుంబ సభ్యులు, శ్రేయోభిలాషుల నుంచి వ్యతిరేకత వచ్చింది. అయితే వరల్డ్ వర్సిటీ గేమ్స్​లో విజయం తర్వాత అంతా బాగానే ఉందని, తన కుటుంబంతో ఎలాంటి గొడవల్లేవని చెప్పుకొచ్చిందీ అథ్లెట్.

మా మధ్య ఎలాంటి గొడవల్లేవు..

నా కుటుంబంతో నాకు ఎలాంటి మనస్పర్థలు లేవు. 100 మీటర్ల పరుగులో ఎండ్​లైన్ దాటిన మరుక్షణమే.. ఇక్కడ మా వాళ్లంతా మిఠాయిలు పంచి పెట్టి నా విజయాన్ని వేడుకలా చేసుకున్నారు. కుటుంబం నుంచి ఒకరిని వేరు చేయడం అంత సులభం కాదు.

క్రికెట్​ను పట్టించుకున్నట్టు ఇతర క్రీడలను చూడట్లేదు..

నా ఫైనల్ జరిగిన రోజే భారత్ ప్రపంచకప్ సెమీస్​లో ఓడి టోర్నీ నుంచి నిష్క్రమించింది. ఆ బాధలో ప్రజలు నన్ను మర్చిపోయారు. మీడియా కూడా క్రికెట్​ను పట్టించుకున్నట్టు ఇతర క్రీడలను కవర్ చేయలేదు. క్రికెట్​ను ప్రైవేటీకరించిన తర్వాత ఇది మరీ ఎక్కువైంది.

ఇది చదవండి:ఓడిపోయినా బెట్టింగ్ డబ్బు ​తిరిగొచ్చింది!