శ్రీశాంత్ టు సుశీల్.. జైలుకెళ్లిన భారత ఆటగాళ్లు!

స్టార్ రెజ్లర్ సుశీల్ కుమార్ అరెస్టు దేశవ్యాప్తంగా సంచలనమైంది. అయితే అంతర్జాతీయ గుర్తింపు ఉన్న భారత ఆటగాళ్లు కొందరు.. పలు సందర్భాల్లో వివిధ ఆరోపణలతో గతంలో జైలుశిక్ష అనుభవించారు. వారి గురించే ఈ స్టోరీ.

స్టార్ రెజ్లర్ సుశీల్ కుమార్ యాదవ్​.. ఓ హత్య కేసులో భాగంగా ఇటీవల అరెస్టయ్యాడు. మన దేశానికి చెందిన ఆటగాళ్లు ఇలా జైలుపాలవడం ఇదేం తొలిసారి కాదు. గతంలోనూ చాలా సందర్భాల్లో పలువురు భారతీయ క్రీడాకారులు అరెస్ట్ అయ్యారు. కొన్నేళ్లపాటు జైలుశిక్ష అనుభవించారు. ఇంతకీ వాళ్లు ఎవరు? ఏ కారణంతో జైలుకు వెళ్లారు?

శ్రీశాంత్-క్రికెటర్

2012లో ఐపీఎల్​ స్పాట్ ఫిక్సింగ్ కుంభకోణంలో భాగంగా రాజస్థాన్ రాయల్స్ బౌలర్ శ్రీశాంత్​ను దిల్లీ పోలీసులు అరెస్టు చేశారు. ఆ తర్వాత తప్పు ఒప్పుకోవడం వల్ల ఇతడిపై బీసీసీఐ జీవితకాల నిషేధం విధించింది. 2018లో బ్యాన్ ఎత్తివేసి, ఇంగ్లాండ్ దేశవాళీ క్రికెట్​ ఆడేందుకు అతడికి అనుమతిచ్చింది. 2020లో అతడిపై భారత బోర్డు విధించిన ఏడేళ్ల నిషేధం పూర్తయింది. దీంతో గతేడాది సయ్యద్ ముస్తాక్ అలీ టోర్నీలో కేరళ తరఫున ఆడాడు.

శ్రీశాంత్

నవజ్యోత్ సింగ్ సిద్ధు- క్రికెటర్

పాటియాలాకు చెందిన ఓ వ్యక్తిని గాయపర్చడం సహా అతడి మృతికి కారణమయ్యాడనే ఆరోపణలతో టీమ్​ఇండియా మాజీ క్రికెటర్ నవజ్యోత్ సింగ్ సిద్ధును 1991లో పంజాబ్ పోలీసులు అరెస్టు చేశారు. ఆ తర్వాత మూడేళ్లు జైలుశిక్ష కూడా అనుభవించాడు. ఈ క్రమంలోనే తన ఎంపీ పదవికీ రాజీనామా చేశాడు. అయితే 2018లో సుప్రీంకోర్టు.. ఈ కేసులో సిద్ధును నిర్దోషిగా ప్రకటించింది.

నవజ్యోత్ సింగ్ సిద్ధు

దీపక్ పహల్-బాక్సర్

పోలీస్ కస్టడీ నుంచి ఓ గ్యాంగ్​స్టర్ తప్పించుకోవడానికి కారణమయ్యాడనే ఆరోపణలతో 2016లో బాక్సర్ దీపక్ పహల్​ను పోలీసులు అరెస్టు చేశారు. సోన్​పట్​లోని సాయ్ అకాడమీలో ఉన్నప్పుడు ఓ బాక్సర్ దవడ కూడా ఇతడు విరగ్గొట్టాడు. 60 కిలోల లైట్​వెయిట్​ విభాగంలో భారత్​కు ప్రాతినిధ్యం వహించిన దీపక్.. 2011 జాతీయ జూనియర్ బాక్సింగ్ టోర్నీలో స్వర్ణం సాధించాడు.

బాక్సర్ దీపక్ పహల్

జై భగవాన్-బాక్సర్

రెండుసార్లు ఆసియన్ ఛాంపియన్​షిప్ పతక విజేత, అర్జున అవార్డు గ్రహీత అయిన బాక్సర్ జై భగవాన్.. హరియాణాలో పోలీస్ ఇన్​స్పెక్టర్​గా పనిచేశాడు. అయితే ఓ హోటల్ మేనేజర్​ను బెదిరించాడనే కారణంగా సస్పెండ్ అయ్యాడు. 2015లో ముగ్గురు గ్యాంబర్ల నుంచి రూ.లక్ష లంచం తీసుకున్నాడనే ఆరోపణలతో మరోసారి సస్పెండ్ అయ్యాడు.

జై భగవాన్

తన్వీర్ హుస్సేన్- స్నో పీస్ రేసర్

స్నో షూ ఛాంపియన్​షిప్​ కోసం న్యూయార్క్ వెళ్లిన భారత అథ్లెట్ తన్వీర్ హుస్సేన్.. మైనర్​ బాలికను వేధించాడనే ఆరోపణలతో 2017లో అరెస్టయ్యాడు. అతడిపై ఫస్ట్ డిగ్రీ లైంగిక వేధింపుల కేసు పెట్టారు. ఆ తర్వాత తప్పు ఒప్పుకోవడం వల్ల అతడిని విడిచిపెట్టారు. ఆ అమ్మాయి సంరక్షణ బాధ్యత చూసుకోవాలని న్యాయస్థానం ఇతడిని ఆదేశించింది.

తన్వీర్ హుస్సేన్