Australian Open Badminton 2023 : భారత స్టార్ షట్లర్, రెండుసార్లు ఒలింపిక్ పతాక విజేత పీవీ సింధు.. ఆస్ట్రేలియన్ ఓపెన్ 2023 క్వార్టర్స్లో ఓడింది. మహిళల సింగిల్స్ శుక్రవారం జరిగిన క్వార్టర్స్లో ప్రపంచ 12 ర్యాంకు అమెరికన్ షట్లర్ బీవెన్‌ జాంగ్‌ (Beiwen Zhang )తో సింధు.. 12-21, 17-21 తేడాతో ఓడి, టోర్నీ నుంచి నిష్క్రమించింది.
Australian Open PV Sindhu : ప్రపంచ 17 ర్యాంకర్ సింధు.. 39 నిమిషాల పాటు సాగిన ఆటలో వరుసగా రెండు సెట్లలో ఓడింది. గతంలో ఇదే ప్రత్యర్థిపై 10 సార్లు తలపడిన సింధు.. 6 సార్లు నెగ్గింది. కానీ శుక్రవారం నాటి క్వార్టర్స్లో 33 ఏళ్ల అమెరికన్ ప్రొఫెషనల్ జాంగ్‌.. సింధుకు ఏ మాత్రం అవకాశం ఇవ్వకుండా పూర్తి ఆధిపత్యం చలాయించి.. ఫైనల్స్కు దూసుకెళ్లింది. దీంతో సింధుకు మరోసారి నిరాశ తప్పలేదు.
ఇదే టోర్నమెంట్లో సింధు.. రౌండ్ 32లో అష్మిత చాలిహను ఎదుర్కొంది. ఈ గేమ్లో సింధు 21- 18, 21- 13 తేడాతో గెలిచింది. తర్వాత రౌండ్ 16లో ఆకర్షి కష్యప్ను ఢీకొంది. ఈ గేమ్లోనూ ఆధిపత్యం ప్రదర్శించిన సింధు.. 21-14, 21-10 తేడాతో గెలిచి క్వార్టర్స్లో అడుగుపెట్టింది. కాగా సింధు ఎదుర్కొన్న ఈ ఇద్దరు కూడా భారత షట్లర్లే. ఇక తాజా ఓటమితో సింధు ఇంటి బాట పట్టింది.
కొన్ని రోజుల క్రితం.. విడుదలైన బీడబ్ల్యూఎఫ్ ప్రపంచ ర్యాంకింగ్స్‌లో సింధు ర్యాంక్ పదేళ్ల కనిష్ఠానికి పడిపోయింది. ఐదు స్థానాలు దిగజారి ప్రపంచ 17వ ర్యాంక్‌కు చేరింది. ప్రస్తుతం తన వద్ద 14 టోర్నమెంట్స్కు గాను 49,480 పాయింట్లు ఉన్నాయి. గతేడాది కామన్వెల్త్‌ క్రీడల్లో స్వర్ణ పతకం సాధించిన సింధు.. ఆ తర్వాత గాయంతో ఐదు నెలల పాటు ఆటకు దూరమైంది. గాయం నుంచి పూర్తిగా కోలుకొని రీఎంట్రీ ఇచ్చినా మునపటిలా సత్తా చాటలేకపోతోంది. వరుస టోర్నీల్లో ప్రారంభ రౌండ్లలోనే ఓటమిపాలైంది. దాంతో ఈ ఏడాది ఏప్రిల్‌లోనే టాప్‌-10 ర్యాంకింగ్స్‌లో సింధు చోటు కోల్పోయింది. స్పెయిన్‌ మాస్టర్స్‌ సూపర్‌ 300 టోర్నీలో ఫైనల్‌ చేరుకోవడం మినహా ఈ సీజన్‌లో సింధు అత్యుత్తమ ప్రదర్శన కనబర్చలేదు.
