WTC Final 2023 : వరల్డ్ టెస్ట్ ఛాంపియన్‌షిప్‌లో భారత్ వరుసగా రెండోసారి ఫైనల్ చేరింది. జూన్ 7న భారత్ ఆస్ట్రేలియా మధ్య మ్యాచ్ ప్రారంభం కానుంది. మొదటిసారి ఫైనల్స్లో న్యూజిలాండ్ చేతిలో ఓటమి పాలైంది. ఇక ఈ సారి ఎలాగైన టైటిల్ నెగ్గాలని భావిస్తున్న టీమ్ఇండియాను గాయాలు వేధిస్తున్నాయి. ఇప్పటికే జయదేవ్ ఉనద్కత్, ఉమేశ్ యాదవ్ బుమ్రా, శ్రేయస్ అయ్యర్, రిషభ్ పంత్ దూరమవగా.. తాజాగా కేఎల్ రాహుల్ కూడా ఈ జాబితాలో చేరాడు.
బీసీసీఐ కూడా ఎలాగైనా డబ్ల్యూటీసీ ఫైనల్స్ గెలవాలని భావిస్తోంది. కానీ బోర్డు ఆ దిశగా సరైన అడుగులు వేయటం లేదని క్రీడా విశ్లేషకుల భావన. మొదటి నుంచే డబ్ల్యూటీసీ ఫైనల్స్ విషయంలో బీసీసీఐ అలసత్వం వహిస్తుందేమో అని క్రీడాభిమానులు ఆందోళన వ్యక్తం చేస్తున్నారు. ఈ ఫైనల్స్ కోసం ఆస్ట్రేలియా ఎప్పుడో జట్టును ప్రకటించింది. కంగారు ప్లేయర్లు ఇప్పటికే ఇంగ్లాండ్ చేరుకొని ప్రాక్టీస్ కూడా మొదలుపెట్టారు. ఒకరిద్దరు ఆస్ట్రేలియా ఆటగాళ్లు ఐపీఎల్లో ఆడుతున్నందున వారికి ఇప్పటికే ఇంగ్లాండ్ రావాలని క్రికెట్ ఆస్ట్రేలియా (సీఏ) కోరింది. నిజానికి కంగారూ జట్టు మనకంటే కొంచెం మెరుగ్గానే ఉందని చెప్పాలి. భారత జట్టులో ఒక్క పుజారా మాత్రమే ఇంగ్లాండ్ చేరుకొని కౌంటీ క్రికెట్ ఆడుతున్నాడు.
ఐపీఎల్ ముగిసిన వారం రోజుల్లో డబ్ల్యూటీసీ ఫైనల్ ప్రారంభం కానుంది. ఈ మ్యాచ్ కోసం బీసీసీఐ కొందరు ఆటగాళ్ల షెడ్యూల్ను ఖరారు చేసింది. ఈ నెల 21తో ఐపీఎల్ లీగ్ దశ ముగుస్తుంది. ప్లే ఆఫ్స్కు అర్హత సాధించని ఆరు జట్లు టోర్నీ నుంచి వైదొలుగుతాయి. ఈ ఆరు జట్ల నుంచి డబ్ల్యూటీసీ ఫైనల్కు ఎంపికైన ప్లేయర్లను ఇంగ్లాండ్ పంపించాలని బోర్డు ఆలోచిస్తున్నట్లు సమాచారం.
కానీ ప్రస్తుతం ఐపీఎల్ పాయింట్స్ టేబుల్ చూస్తే చెన్నై, లఖ్నవూ, ముంబయి, గుజరాత్ జట్లు మొదటి నాలుగు స్థానాల్లో ఉన్నాయి. వీటితో పాటు బెంగళూరు, పంజాబ్, రాజస్థాన్, కోల్కతా జట్ల మధ్య పాయింట్ల పరంగా పెద్దగా తేడా లేనందున ఈ జట్లు కూడా ప్లే ఆఫ్స్ రేసులో ఉన్నాయనే చెప్పవచ్చు. ఒకవేళ టేబుల్లో ఇప్పుడున్న స్థానాల ప్రకారం టాప్ 4 జట్లు ప్లే ఆఫ్స్ చేరుకుంటే.. కెప్టెన్ రోహిత్ శర్మ సహా ఇషాన్ కిషన్, సూర్యకుమార్ యాదవ్, అజింక్య రహానే, రవీంద్ర జడేజా, శుభ్‌మన్ గిల్, మహ్మద్ షమీ వీరందరూ మే నెలాఖరు వరకు భారత్లోనే ఉండాలి. ఇక బెంగళూరు కూడా ప్లేఆఫ్స్‌కు అర్హత సాధిస్తే.. కోహ్లీ, సిరాజ్ ఐపీఎల్ ముగిసే దాకా స్వదేశంలోనే ఉండాల్సి వస్తుంది.
దీంతో దాదాపు టీమ్ఇండియా జట్టు మొత్తం ఐపీఎల్ ముగిసే వరకు భారత్లోనే ఉండే అవకాశాలు ఎక్కువగా ఉన్నాయి. ఇదే జరిగితే సుమారు రెండు నెలల నుంచి టీ20 ఫార్మాట్ ఆడుతున్న వీరు.. సరైన ప్రాక్టీస్ లేకుండా సుదీర్ఘంగా 5 రోజుల పాటు సాగే టెస్టు క్రికెట్ ఆడగలరా అన్న ప్రశ్నలు తలెత్తుతున్నాయి. ముఖ్యంగా ఏ టెస్టు మ్యాచ్కైనా వాతావరణం, పిచ్ కీలకంగా వ్యవహరిస్తాయి. పైగా భారత్.. ఈ మ్యాచ్ను పేస్‌కు అనుకూలించే ఇంగ్లాండ్ పిచ్‌ల మీద ఆడనుంది. దీంతో సుదీర్ఘమైన ప్రాక్టీస్ లేనందున ఆట మరింత కష్టతరం అవుతుంది.
