క్రికెట్ అభిమానులు ఎంతో ఆసక్తిగా ఎదురుచూస్తున్న మహిళల ప్రీమియర్‌ లీగ్‌(డబ్ల్యూపీఎల్ 2023) తొలి సీజన్‌కు సర్వం సిద్ధమైంది. అన్ని ఏర్పాట్లు అయిపోయాయి. ముంబయి ఇండియన్స్-గుజరాత్ జెయింట్స్ మధ్య జరగనున్న మ్యాచ్తో ఈ ఆరంభ సీజన్ ప్రారంభకానుంది. ముంబయిలోని డివై పాటిల్‌ స్పోర్ట్స్‌ అకాడమీ వేదికగా నేడు(మార్చి 4) సాయంత్రం 7:30 గంటలకు ఈ పోరు షురూ కానుంది. అయితే ఇప్పుడు తొలి మ్యాచ్కు ముందే గుజరాత్ జెయింట్స్‌కు ఓ ఊహించని షాక్ తగిలింది. ఇంకా చెప్పాలంటే గట్టి దెబ్బే తగిలింది.
ముంబయి వేదికగా జరిగిన ఆక్షన్లో వెస్టిండీస్‌ మాజీ ఆల్‌రౌండర్‌ డియాండ్రా డాటిన్ను రూ. 60 లక్షలకు గుజరాత్ జెయింట్స్ కొనుగోలు చేసిన సంగతి తెలిసిందే. ఇప్పుడా ప్లేయర్ గాయం కారణంగా తప్పుకుంది. ఈ సీజన్ మొత్తానికి దూరమైంది. దీంతో గుజరాత్ ఫ్రాంచైజీ.. తమ టీమ్లోని డియాండ్రా డాటిన్ స్థానాన్ని ఆస్ట్రేలియా యువ ఆల్‌రౌండర్‌ కిమ్ గార్త్‌తో భర్తీ చేయాలని నిర్ణయించుకుంది. ఈ విషయాన్ని సోషల్‌మీడియా వేదికగా గుజరాత్ ఫ్రాంచైజీ ట్వీట్ చేసి తెలిపింది. అయితే బేస్ ప్రైస్ రూ.60 లక్షలకు గార్త్‌తో గుజరాత్ జెయింట్స్ ఒప్పందం కుదుర్చుకున్నట్లు క్రికెట్ వర్గాల సమాచారం.
కాగా, ఈ ఏడాది ఫిబ్రవరిలో జరిగిన ఆక్షన్లో కిమ్ గార్త్‌ను కొనుగోలు చేయడానికి ఏ ఫ్రాంచైజీ కూడా పెద్దగా ఆసక్తి చూపలేదు. అయితే ఇప్పుడు డాటిన్ అందుబాటులో లేకపోవడం వల్ల ఈ రిచ్‌ లీగ్‌లో భాగమయ్యే అవకాశం గార్త్కు లభించింది. ఇకపోతే ఈ లీగ్‌లో గుజరాత్ జట్టుకు ఆస్ట్రేలియా స్టార్‌ క్రికెటర్‌ బెత్ మూనీ సారథిగా వ్యవహరించనున్న సంగతి తెలిసిందే. ఆష్లీ గార్డ్‌నర్‌, డాటిన్, సోఫియా డంక్లీ, స్నేహ్‌ రాణా ఈ జట్టులో కీలక ఆటగాళ్లుగా ఉన్నారు. అలానే ముంబయి కెప్టెన్‌గా హర్మన్‌ప్రీత్‌ కౌర్‌ ఎంపిక అయింది. ఈ టీమ్లో నాట్‌ సీవర్‌, హీథర్‌ గ్రాహమ్‌, పూజ వస్త్రాకర్‌, యాస్తిక భాటియా కీలక ప్లేయర్స్గా ఉన్నారు.
ఇకపోతే ఈ డబ్ల్యూపీఎల్ ఆరంభోత్సవాన్ని ఘనంగా నిర్వహించేందుకు బీసీసీఐ ఏర్పాట్లు చేసింది. మ్యాచ్ ప్రారంభానికి రెండు గంటల ముందే సాయంత్రం 5.30కు ఓ స్పెషల్ కార్యక్రమాన్ని నిర్వహించనుంది. బాలీవుడ్‌ భామలు కియారా అద్వాణీ, కృతి సనన్‌ ఈ కార్యక్రమంలో డ్యాన్స్ షో చేయనున్నారు. అలాగే ప్రముఖ సింగర్ శంకర్‌ మహాదేవన్‌ కూడా డబ్ల్యూపీఎల్ నేపథ్య గీతాన్ని ఆలపించనున్నారు. ర్యాపర్‌, గాయకుడు ఏపీ ధిల్లాన్‌ కూడా ప్రదర్శన ఇవ్వనున్నారు.
ఇదీ చూడండి: విరాట్ కోహ్లీ హాఫ్ సెంచరీ చేయక 10ఏళ్లా?
