Women IPL: మహిళల ఐపీఎల్ను నిర్వహించేందుకు భారత క్రికెట్ బోర్డు కసరత్తులు చేస్తుందని స్పష్టం చేశారు బీసీసీఐ సెక్రటరీ జైషా. పురుషుల ఐపీఎల్ తరహాలోనే దీన్ని రూపొందించబోతున్నట్లు తెలిపారు.
"మహిళల టీ20 ఛాలెంజ్ అభిమానుల్లో భారీ ఆసక్తిని నెలకొల్పింది. మహిళల క్రికెట్ను ప్రోత్సాహిస్తున్నారనేందుకు ఇదే నిదర్శనం. వారి కోసం ఐపీఎల్ లాంటి ఓ లీగ్ కావాలి. కేవలం మూడు, నాలుగు జట్ల మధ్య పోటీని నిర్వహించడం మాత్రమే కాదు మహిళల ఐపీఎల్ లీగ్ను ప్రారంభించడం లాంటిది. ఇందులోకి చాలా అంశాలు వస్తాయి. అంతర్జాతీయ స్టార్లు, బోర్డు సభ్యుల మధ్య ద్వైపాక్షిక కమిట్మెంట్స్ ఇలా చాలా ఉంటాయి. భవిష్యత్ మహిళా క్రికెటర్ల కోసం ఈ లీగ్ను అభివృద్ధి చేసే పనిలో ఉన్నాం. అందుబాటులో ఉన్న అవకాశాలన్నింటినీ పరిశీలిస్తున్నాం. భారతదేశంలో క్రికెట్ స్థాయిని మరింత పెంచేందుకు ఇది ఉపయోగపడుతుంది. స్మృతి మంధాన, హర్మన్ప్రీత్ కౌర్ లాంటి ప్లేయర్స్ కూడా ఈ లీగ్ను తీసుకురావాలని కోరుతున్నారు. ఎందుకంటే ఇది ప్లేయర్స్కు బాగా ఉపయోగపడుతుంది. ఇప్పటికే ది హండ్రెడ్ లీగ్, డబ్ల్యూబీబీఎల్ వంటి లీగ్స్లో దీప్తి శర్మ, రోడ్రిగ్స్, షెఫాలీ వర్మ, పూనమ్ యాదవ్ వంటి ఆటగాళ్ల అదరగొడుతున్నారు. రోల్ మోడల్స్గా ఎదుగుతున్నారు." అని జైషా అన్నారు.
ఈ ఏడాది జరిగిన బిగ్బాష్ లీగ్లో ఎనిమిది మంది భారత మహిళా క్రికెటర్లు పాల్గొన్నారు. 15 వికెట్లు, 399 పరుగులతో హర్మన్ప్రీత్ కౌర్ ప్లేయర్ ఆఫ్ ది సిరీస్ అవార్డును అందుకుంది. ఈ అవార్డు అందుకున్న తొలి భారత ప్లేయర్గా నిలిచింది. ది హండ్రెడ్ లీగ్లో షెఫాలీ వర్మ, హర్మన్ ప్రీత్ కౌర్, రోడ్రిగ్స్, స్మృతిమంధాన, దీప్తి శర్మ ఆడారు. ఈ టోర్నీలో 249 అత్యధిక పరుగులు చేసిన రెండో ప్లేయర్గా రోడ్రిగ్స్ నిలవడం విశేషం. దీప్తి.. 8 మ్యాచ్ల్లో 13.6 సగటు, 5.26 ఎకానమీ, 15.5 స్ట్రైక్రేట్తో పది వికెట్లు తీసింది.
ప్రస్తుతం బీసీసీఐ మహిళల కోసం మూడు జట్లతో టీ20 లీగ్ నిర్వహిస్తుంది. ట్రయల్బ్లేజర్స్, సూపర్నొవాస్, వెలాసిటీ జట్లు ఈ పోటీలో పాల్గొంటాయి. అయితే మూడుకు బదులు ఆరు జట్లతో లీగ్ నిర్వహిస్తే మహిళా జట్లు కూడా మరింత బలంగా తయారవుతాయని పలువురు అభిప్రాయపడుతున్నారు. ఈ నేపథ్యంలోనే బీసీసీసీఐ మహిళల ఐపీఎల్ ప్రతిపాదనను పరిగణలోకి తీసుకుని దాన్ని అభివృద్ధి చేసేందుకు ప్రయత్నాలు చేస్తోంది.
ఇదీ చూడండి: 'ఆరు జట్లతో మహిళల ఐపీఎల్ నిర్వహించాలి'
