ఆస్ట్రేలియా స్టార్ ఆటగాళ్లు.. వివిధ కారణాలతో వెస్డిండీస్, బంగ్లాదేశ్తో జరగాల్సిన పరిమిత ఓవర్ల సిరీస్కు దూరమయ్యారు. దీంతో జూనియర్లతోనే కంగారూ జట్టు ఈ పర్యటనకు వెళ్లనుంది. ఆటగాళ్లు తప్పుకోవడానికి గల కారణాలు వెల్లడించకపోయినా.. బయోబబుల్లో ఉండటం ఇష్టం లేకపోవడం వల్లే ఇలా చేసినట్లు తెలుస్తోంది.
విండీస్, బంగ్లాతో సిరీస్ నుంచి స్టార్ ఆటగాళ్లు పాట్ కమిన్స్, మ్యాక్స్వెల్, డేవిడ్ వార్నర్, స్టీవ్ స్మిత్, స్టోయినిస్, జే రిచర్డ్సన్, కేన్ రిచర్డ్సన్ వైదొలిగారు. ఇందులో స్మిత్ మోచేతి గాయం కారణంగా తప్పుకోగా, మిగతా వారు బోర్డుకు తమను ఈ పర్యటనకు దూరంగా ఉంచమని బోర్డును కోరినట్లు సమాచారం.
ఈ పర్యటన నుంచి తప్పుకొన్న ఆసీస్ ఆటగాళ్లు అందరూ ఐపీఎల్లో ఆడుతున్న వాళ్లే. కరోనా కారణంగా లీగ్ వాయిదా పడటం వల్ల గత నెలలో స్వదేశానికి చేరుకున్నారు. ఆ తర్వాత సిడ్నీలో మళ్లీ క్వారంటైన్లో ఉన్నారు. దీంతో వీరికి కుటుంబంతో గడిపే సమయం ఎక్కువగా లేకపోవడం వల్ల ఈ టూర్ నుంచి తప్పుకొన్నట్లు తెలుస్తోంది.
వచ్చే నెలలో వెస్టిండీస్తో జరగబోయే పరిమిత ఓవర్ల సిరీస్తో ఆస్ట్రేలియా తిరిగి మైదానంలో అడుగుపెట్టనుంది. ఇందులో భాగంగా ఇరుజట్లు ఐదు టీ20లు, మూడు వన్డేలు ఆడనున్నాయి. అనంతరం ఆగస్టులో బంగ్లాదేశ్తో 5 టీ20లు ఆడనుంది. అక్టోబర్లో టీ20 ప్రపంచకప్ ఉన్న దృష్ట్యా ఈ పర్యటనలను అందుకు ప్రాక్టీసుగా పనికొస్తాయని కంగారూ జట్టు భావిస్తోంది. మెగాటోర్నీకి ముందు యువకుల సామర్థ్యాన్ని పరీక్షించడానికి ఈ మ్యాచ్లు ఉపయోగపడతాయని బోర్డు అనుకుంటోంది.
ఆస్ట్రేలియా జట్టు
ఫించ్ (కెప్టెన్). ఆస్టన్ అగర్, వెస్ అగర్, బెహ్రండాఫ్, అలెక్స్ కారే, క్రిస్టియన్, హెజిల్వుడ్, హెన్రిక్స్, మిచెల్ మార్ష్, బెన్ మెక్డర్మోట్, రిలే మెరిడిత్, జోష్ ఫిలిప్, మిచెల్ స్టార్క్, మిచెల్ స్వీప్సన్, ఆస్టన్ టర్నర్, ఆండ్రూ టై, మాథ్యూ వేడ్, ఆడం జంపా
రిజర్స్ ఆటగాళ్లు: నాథన్ ఎల్లిస్, తన్వీర్ సంఘా
