Virat Kohli: వందో టెస్ట్ మ్యాచ్ ఆడతానని ఎప్పుడూ ఊహంచలేదన్నాడు భారత బ్యాటర్ విరాట్ కోహ్లీ. శ్రీలంకతో జరిగే టెస్ట్ సిరీస్లోని మొదటి టెస్ట్తో ఈ మార్కును అందుకోనున్నాడు. ఈ ఏడాది ఆరంభంలో దక్షిణాఫ్రికాతో మ్యాచ్తోనే కోహ్లీ వందో టెస్ట్ పూర్తికావాల్సి ఉంది. కానీ వెన్నునొప్పితో ఆడలేదు. ప్రతిష్ఠాత్మకమైన ఈ టెస్ట్కు మొహాలి స్టేడియంలో 50శాతం ప్రేక్షకులను అనుమతిచ్చారు.
"వందో టెస్ట్ మ్యాచులు ఆడతానని నిజంగా ఊహించలేదు. ఇది ఒక సుధీర్ఘ ప్రయాణం. ఈ వంద టెస్టుల్లో చాలా క్రికెట్ ఆడాను. దేవుడి దయతో వందో టెస్ట్ ఆడుతున్నాను సంతోషంగా ఉంది. ఇది నాకు, నా కుటుంబానికి, నా కోచ్కు ప్రత్యేకమైన క్షణం. తక్కువ పరుగులు, ఎక్కువ పరుగులు సాధిస్తానని అనుకోలేదు. జూనియర్ క్రికెట్లో అనేక డబుల్ శతకాలు చేశాను. చాలా ఎక్కువసేపు బ్యాటింగ్ చేయాలన్నది నా ఆలోచన. టెస్ట్ క్రికెట్ మనుగడ సాగించాల్సిన ఆవశ్యకత ఉంది. నా వరకు ఇదే నిజమైన క్రికెట్."
-విరాట్ కోహ్లీ
గతేడాదే కోహ్లీ టెస్ట్ కెప్టెన్సీ నుంచి వైదొలిగాడు. ఇండియా తరఫున అత్యధికంగా 68 టెస్ట్ మ్యాచులకు నాయకత్వం వహించి రికార్డు నెలకొల్పాడు. అలాగే భారత్ తరఫున అత్యధికంగా టెస్ట్ విజయాలు సాధించిన కెప్టెన్గా ఘనత సాధించాడు. ఇప్పటివరకు గ్రేమ్ స్మిత్, రికీ పాంటింగ్, స్టీవ్ స్మిత్లు కోహ్లీ కంటే ముందు వరుసలో ఉన్నారు. కోహ్లీ ఇప్పటివరకు ఏడు డబుల్ సెంచరీలు సాధించాడు. కెప్టెన్గా 20 సెంచరీలు చేసిన కోహ్లీ భారత్ తరఫున అత్యధిక సెంచరీలు చేసిన కెప్టెన్గానూ రికార్డు సృష్టించాడు. కోహ్లీ సారథ్యంలో భారత జట్టు అక్టోబర్ 2016 నుంచి మార్చి 2020 వరకు 42 నెలల పాటు అగ్రస్థానంలో కొనసాగింది.
కోహ్లీ 2019లో చివరిసారిగా అంతర్జాతీయ క్రికెట్లో సెంచరీ సాధించాడు. అప్పటి నుంచి అభిమానులందరూ అతడి 71వ శతకం కోసం వేచి చూస్తున్నారు. ఈ వందో టెస్ట్లో కోహ్లీ సెంచరీ చేస్తే ఈ తరంలోనే మేటి ఆటగాడిగా నిలిచిపోతాడు.
విరాట్ కోహ్లీ వందో టెస్ట్పై భారత కెప్టెన్ రోహిత్ శర్మ స్పందించాడు. జట్టును ఉన్నత స్థాయిలో ఉంచిన ఘనత విరాట్ కోహ్లీకే దక్కుతుందన్నాడు. శుక్రవారం శ్రీలంకతో మొదలయ్యే మ్యాచ్తో రోహిత్ టెస్ట్ కెప్టెన్గా తన ప్రస్థానాన్ని మొదలు పెట్టనున్నాడు.
" ఒక టెస్ట్ జట్టుగా ప్రస్తుతం మంచి స్థాయిలో ఉన్నాం. ఈ స్థాయిలో నిలిపేలా కృషి చేసిన కోహ్లీకే ఈ ఘనత దక్కుతుంది. అతడు టెస్ట్ జట్టుకు చేసిన కృషి అద్భుతమైనది. అతడు వదిలేసిన స్థానాన్ని నేను తీసుకోవాలి. సరైన ఆటగాళ్లతో సరైన ఆట ఆడించాలి. వరల్డ్ టెస్ట్ ఛాంపియన్షిప్లో మేము వెనుకబడ్డాం. కానీ గత రెండు, మూడేళ్లలో మేము తప్పులు చేశామని నేను అనుకోవట్లేదు. అరంగేట్రం చేసిన నాటి నుంచి అతడి ప్రయాణం అద్భుతంగా సాగింది. ఇప్పుడు వందో టెస్ట్ వరకు చేరుకున్నాడు. టెస్ట్ ఫార్మాట్లో జట్టును ముందుకు తీసుకెళ్లాడు. ఈ మ్యాచ్ను అతడి కోసం ప్రత్యేకంగా మార్చుతాం. ఐదురోజులు సాగే మ్యాచ్లో కోహ్లీ ఆటను చూడటానికి అభిమానులు వస్తున్నారు ఇది మంచి పరిణామం. కోహ్లీ కెప్టెన్గా 2018 ఆస్ట్రేలియాలో సాధించిన సిరీస్ విజయం అద్భుతమైనది. బ్యాటింగ్ విషయానికి వస్తే 2013లో దక్షిణాఫ్రికాపై కోహ్లీ కొట్టిన శతకం ఉత్తమమైనది. జోహన్నెస్బర్గ్లోని బౌన్సీ పిచ్పై డేల్ స్టెయిన్, మోర్ని మోర్కెల్, జాక్వస్ కల్లిస్ లాంటి బౌలర్లను ఎదుర్కోవడం సాధారణ విషయం కాదు. ఆ మ్యాచ్లో కోహ్లీ మొదటి ఇన్నింగ్స్లో సెంచరీ, రెండో ఇన్నింగ్స్లో 90 కొట్టాడు. ఈ శతకం నా దృష్టిలో అత్యత్తమైంది."
-రోహిత్ శర్మ, టీమ్ఇండియా కెప్టెన్
ఇదీ చదవండి: టెస్టు చరిత్రలో స్వర్ణయుగం.. కోహ్లీ శకం- ఈ రికార్డులపై ఓ లుక్కేయండి
