ఆస్ట్రేలియాతో జరుగుతున్న బోర్డర్-గావస్కర్ ట్రోఫీ నాలుగో టెస్ట్ మ్యాచ్ తొలి ఇన్నింగ్స్లో క్రికెటర్ విరాట్ కోహ్లీ సెంచరీ బాదాడు. సుమారు మూడున్నరేళ్లు అంటే 1200పైగా రోజుల తర్వాత టెస్టుల్లో శతకం కొట్టి సుదీర్ఘ కాల నిరీక్షణకు తెరదించాడు. మార్చి 10న ప్రారంభమైన ఈ మ్యాచ్లో ఆట నాలుగో రోజుకి 240 బాల్స్లో 100 పరుగులు చేశాడు విరాట్. 2019 నవంబరులో బంగ్లాదేశ్తో జరిగిన టెస్ట్ సిరీస్లో తన చివరి సెంచరీని నమోదు చేశాడు. దీంతో 2019 తర్వాత విరాట్ తొలి సారి సెంచరీ చేసింది ఇప్పుడే. మ్యాచ్ మొదటి నుంచి ఆచితూచి ఆడుతూ వస్తున్న విరాట్ 240 బంతుల్లో సెంచరీని పూర్తి చేశాడు. టీ20ల్లో, వన్డేల్లో శతకాలతో అదరగొట్టి తన ఫామ్ను మెరుగుపరుచుకున్న విరాట్ టెస్టుల్లో మాత్రం సెంచరీ కోసం ఇంత కాలం ఎదురు చూడాల్సి వచ్చింది. ఇందుకోసం 41 టెస్టు ఇన్నింగ్స్లను తీసుకున్నాడు విరాట్.
ఇకపోతే అంతర్జాతీయ టెస్టు క్రికెట్లో కోహ్లీకిది 28వ శతకం కాగా.. అన్ని ఫార్మట్లలో కలిపి 75వ సెంచరీ. తన కెరీర్లో అత్యధిక బంతులు తీసుకొని మరీ సెంచరీ చేయడం ఇది రెండో సారి. ఇప్పుడు ఆసీస్ మ్యాచ్లో 240 బంతుల్లో దీనిని అధిగమించగా.. ఇంగ్లాండ్తో జరిగిన మ్యాచ్లో అత్యధికంగా 289 బంతులను వాడుకున్నాడు.
మ్యాచ్ మూడో రోజు ఆట చివరికి కోహ్లీ ఓవర్నైట్ స్కోర్ 59 పరుగులతో నాటౌట్గా ఉంది. దీనికి నాల్గో టెస్టు తొలి ఇన్నింగ్స్లో లంచ్ సమయానికి 29 పరుగులు జోడించి 88 రన్స్తో నిలకడగా ఆటను ఆడాడు. కాగా, ఆసీస్ బౌలర్లు కామెరూన్ గ్రీన్, మిచెల్ స్టార్క్లు విరాట్ను పరుగులు తీయకుండూ నియంత్రించే క్రమంలో అతడు నిలకడగా సింగిల్స్, డబుల్స్ తీస్తూ స్కోర్ బోర్డును ఆపకుండా ముందుకు సాగించాడు.
'లయన్' గర్జన..
భారత్ గడ్డపై పర్యాటక దేశం నుంచి అత్యధిక వికెట్లు తీసిన బౌలర్గా నాథన్ లయన్ 55 వికెట్లు తీసి అరుదైన రికార్డును నెలకొల్పాడు. అంతేగాక కేఎస్ భరత్ను ఐదు ఇన్నింగ్స్లలో నాలుగుసార్లు లయనే ఔట్ చేయడం గమనార్హం. కాగా, ముర్ఫీ కూడా ఈ ఇన్నింగ్స్లో పుజారాను ఎల్బీడబ్ల్యూ చేసి జడేజా బ్యాటింగ్కు క్యాచ్ ఇచ్చి ఇద్దరి బ్యాటింగ్కు ముగింపు పలికాడు. ఇక కునేమనె కెప్టెన్ రోహిత్ శర్మను ఔట్ చేసి ఓ వికెట్ను తన ఖాతాలో వేసుకున్నాడు.
భరత్ భేష్..
వెన్నుముకలో గాయం కారణంగా శ్రేయస్ అయ్యర్కు ఈ మ్యచ్ ఆడే అవకాశం దక్కలేదు. శ్రేయస్ స్థానంలో కోన శ్రీకర్ భరత్ను జట్టులోకి తీసుకున్నారు. ఇతడు 88 బంతుల్లో రెండు ఫోర్లు, 3 సిక్స్లతో 44 పరుగులు చేసి జట్టుకు బాసటగా నిలిచాడు. విరాట్ కోహ్లీతో కలిసి 53 పరుగుల చక్కని భాగస్వామ్యం కూడా చేశాడు భరత్. చివరికి లయన్ వేసిన బౌలింగ్లో హాండ్స్కాంబ్ క్యాచ్ పట్టడంతో భరత్ ఔటయ్యాడు.
ప్రస్తుతం భారత్ తొలి ఇన్నింగ్స్లో ఓవర్నైట్ 289/3 స్కోరుతో నాలుగో రోజు ఆటను ఆరంభించింది. కోహ్లీతో పాటు ఇప్పటికే శుభమన్ గిల్(128) సెంచరీ సాధించాడు. పుజారా(42), కెప్టెన్ రోహిత్ శర్మ(35) కీలక పరుగులు సాధించారు. ఆసీస్ తన మొదటి ఇన్నింగ్స్లో 480 పరుగులకు ఆలౌటైంది. చివరి టెస్టు నాల్గో రోజు మ్యాచ్లో భోజన విరామ సమయానికి 4 వికెట్లు కోల్పోయి 362 పరుగులతో భారత్ ఆటను కొనసాగించింది. పిచ్ ప్రతీకూలంగా ఉండటం వల్ల స్కోర్ బోర్డు కాస్త నెమ్మదించింది. దీంతో ఉదయం సెషన్లో 32 ఓవర్లో కేవలం 77 పరుగులు మాత్రమే చేయగలిగింది రోహిత్ సేన.
