Govt Jobs Preparation Plan for 2025 Year : నూతన సంవత్సరం 2025లో రెండు తెలుగు రాష్ట్రాల్లోని నిరుద్యోగులకు జాబ్‌ క్యాలెండర్లు దిశా నిర్దేశం చేయబోతున్నాయి. ఏయే నియామక పరీక్షలు రాయాలో, ఎంతకాలం ప్రిపేర్ కావాలో మొదలైన అంశాలపై స్పష్టమైన ప్లాన్ రూపొందించుకునే అవకాశం ఉంటోంది. ఎన్నో ఆశలతో జీవితంలో స్థిరపడాలనుకునే యువత 2025 కొత్త సంవత్సరంలోనే పోటీపరీక్షలకు మెరుగైన ప్రిపరేషన్‌ను కొనసాగించేలా జాబ్‌ క్యాలెండర్ మంచి సాధనంగా ఉపయోగపడుతోంది. గ్రూప్ 1 ప్రధానంగా డిస్క్రిప్టివ్‌ పరీక్ష. ఈ తరహా పరీక్షల్లో విజయం సాధించాలంటే భావవ్యక్తీకరణతో పాటు రైటింగ్ స్కిల్స్, టైం మేనేజ్మెంట్ కీలక పాత్ర పోషిస్తాయి.
దీని వల్ల జాబ్‌ క్యాలెండర్‌లో పరీక్షల నిర్వహణకు సంబంధించిన తేదీల ఆధారంగా ఆయా సామర్థ్యాలు సమకూర్చుకునే సమయం, శక్తి తమకుందో లేదో ఆత్మ పరిశీలన చేసుకున్నాకే ఈ పరీక్షల్లోకి దిగటం సముచితం. ఇప్పటికే రాష్ట్ర ప్రభుత్వం జాబ్‌ క్యాలెండర్‌ను విడుదల చేయగా ఏ పరీక్షలు ఎప్పుడు నిర్వహిస్తారనేది స్పష్టం చేసింది. అలాగే ఏపీ ప్రభుత్వం కూడా పరీక్షల సంస్కరణలకు నియమించిన కమిటీ కూడా నివేదికను సిద్ధం చేసింది. ఆ నివేదికలో జాబ్‌ క్యాలెండర్‌ను తయారు చేసి పరీక్షలు నిర్వహించేలా ప్రతి ఏడాదిలో డిసెంబర్‌ 30లోగా నియామకాలు పూర్తి అయ్యేలా సూచించింది. జాబ్‌ క్యాలెండర్ అమలు సులువు అయ్యేలా అనేక సూచనలు కూడా చేసింది.
ఒక ఏడాదిలో ఏయే ఉద్యోగాలకు పరీక్షలు నిర్వహిస్తారో జాబ్‌ క్యాలెండర్ ద్వారా తెలియజేస్తారు. ఈ క్రమంలో ఏయే ఉద్యోగాలకు అర్హులుగా సరిపోతామో అభ్యర్థులు నిర్ణయించుకోవాలి. ఇంతకముందు ఏ నోటిఫికేషన్లు వస్తాయో తెలిసే పరిస్థితి ఉండేది కాదు. ఆ సందిగ్ధత ఇప్పుడు లేదు. అందుకు ముందుగానే అభ్యర్థులు మొత్తం నోటిఫికేషన్లలో ఒకటో, మరికొన్నో ఎంపిక చేసుకుని సిద్ధంగా ఉండాలి. నోటిఫికేషన్ల ప్రకారం ప్రణాళికను తయారు చేసుకుని ప్రిపేర్ కావాలి.
సిలబస్, పరీక్ష విధానం
- విభిన్న పరీక్షల విధానం, సిలబస్ ఒకటే అయితే ఆయా పరీక్షల టైం ఎక్కువగా లేకపోయినా ఒక ప్రిపరేషన్తో అన్నిటినీ ఎదుర్కోవచ్చు. సిలబస్ ఒకటై పరీక్ష విధానంలో మాత్రం తేడా ఉంటే ప్రిపరేషన్ విధానంలోనూ తేడా ఉంటుంది. అందుకు కావాల్సిన సమయం ఆ పరీక్షల మధ్య ఉందా లేదా అని పరిశీలించుకుని సన్నద్ధం కావడం మంచిది. ఉదాహరణకు సిలబస్ ఒకటే కానీ ఒక పరీక్ష ఆబ్జెక్టివ్‌ విధానంలో మరొకటి సబ్జెక్టివ్‌ విధానంలో ఉంటే ఆ ఎగ్జామ్ల మధ్య విరామం ఎక్కువున్నప్పుడే ఆ రెండిటికీ ప్రిపేర్ కావడం మంచిది.
- ఉన్నత విద్యార్హతల కోరే అభ్యర్థులు పోటీ పరీక్షలతో సమన్వయం చేసుకుంటూ రెండింటికి ప్రిపరేషన్ కొనసాగించాలనుకుంటే అప్పుడు మాత్రమే రెండింటిపై శ్రద్ధ చూపించవచ్చు. రెండింటికి ఒకే సమయంలో పరీక్షలు వస్తే ముందుగానే నిర్ణయించుకుని ఏదో ఒక దాని వైపు మొగ్గు చూపిస్తే కెరియర్‌కు బాగా ఉపయోగపడుతుంది.
నిపుణులూ.. గృహిణులూ
- గత కొన్నేళ్లుగా సాఫ్ట్‌వేర్‌ నిపుణులు లక్షల్లో వచ్చే జీతాలను సైతం లెక్కచేయకుండా ప్రభుత్వ పోటీ పరీక్షలు రాసేందుకు సిద్ధమవుతున్నారు. కానీ పరీక్షల వాయిదాలు, కోర్టు కేసులు ఇతరత్రా సమస్యలు వారిలో నిరుత్సాహం ఏర్పడుతోంది. దీంతో రెండు మూడు ఏళ్లుగా పోటీ పరీక్షలు ప్రిపేర్ అయ్యి, తమ విలువైన సమయం, ధనం కోల్పోయి చివరికి మళ్లీ సాఫ్ట్‌వేర్‌ రంగం వైపు వెళుతున్నారు. అలాంటి అభ్యర్థులందరూ రెండు తెలుగు రాష్ట్రాల జాబ్‌ క్యాలెండర్లను దృష్టిలో ఉంచుకుని స్పష్టంగా ఒక ఏడాదిపాటు సిద్ధమై తమ అవకాశాలను పరిశీలించుకోవచ్చు.
- చిరుద్యోగులూ, గృహిణులూ కూడా భారీ సంఖ్యలో పోటీ పరీక్షలపై ఆశలు పెట్టుకుంటారు. నిర్దిష్ట ప్రణాళికతో పరీక్షలు జరగనందువల్ల ఆశించిన ఫలితాలు రాక సమయం, కష్టం వృథా అయిందని నిరాశా నిస్పహలకు గురవుతూ వచ్చారు. ప్రస్తుతం అలాంటి నిస్పృహ ఏర్పడే అవకాశం కనిపించడం లేదు. దీంతో చిరుద్యోగులూ, గృహిణులూ తమ శక్తుల్ని కూడగట్టుకుని మళ్లీ నిర్దిష్ట ప్రణాళిక ప్రకారం తమ ఆశలు నెరవేర్చుకునేందుకు సిద్ధంగా ఉండొచ్చు.
ఒత్తిళ్లకు గురికాకుండా
- గతంలో ఏ పరీక్షలు ఎప్పుడు జరుగుతాయో ఎంతకాలం ప్రిపేర్ కావాలో తెలియక రకరకాల ఒత్తిళ్లకు గురయ్యేవారు. ఈ నేపథ్యంలో పోటీపరీక్షల నుంచి తప్పుకుని జీవితంలో మంచి అవకాశాన్ని కోల్పోయామని బాధపడేవారు. కానీ ప్రస్తుత పరిణామాల ఆధారంగా ఎలాంటి ఒత్తిళ్లకు గురి కాకుండా సన్నద్ధమయ్యే ఆస్కారముంది. దీంతో ఆర్థిక అంశాలకు వెరవకుండా ధైర్యంగా ప్రిపేర్ అయ్యేలా ఈ కొత్త సంవత్సరం అవకాశాలను కల్పించినట్టే.
- నిర్దిష్ట షెడ్యూల్‌ ప్రకారం పరీక్షలు జరిగే యూపీఎస్సీ, ఎస్‌ఎస్‌సీ, ఆర్‌ఆర్‌బీ, ఇతర బ్యాంకు పరీక్షల అభ్యర్థులు కూడా నూతన సంవత్సరం రాష్ట్ర సర్వీస్‌ కమిషన్ల పరీక్షలను లక్ష్యం చేసుకోవచ్చు. జాబ్‌ క్యాలెండర్తో సరైన సమన్వయంతో అన్ని పరీక్షలూ రాసే అవకాశం అభ్యర్థులు పెంపొందించుకోవచ్చు.
- ప్రత్యేకంగా నిర్వహించే ఎసై, పోలీస్‌ కానిస్టేబుల్‌, డీఎస్సీ మొదలైన పరీక్షల సన్నద్ధమవుతున్న కూడా రాష్ట్ర సర్వీస్‌ కమిషన్‌ పరీక్షలకు సిద్ధమయ్యేందుకు అవకాశం ఉంది. జాబ్‌ క్యాలెండర్ ద్వారా పరీక్ష తేదీలు స్పష్టమవుతన్నాయి. అందుకు ఈ పరీక్షలు రాసే అభ్యర్థులు పూర్తిస్థాయిలో సంసిద్ధం కావాలి. ఇలాంటి అవకాశాన్ని కల్పిస్తున్న నూతన సంవత్సరాన్ని సమర్థంగా వినియోగించుకోని విజేతలుగా నిలవాలి.
ఎగ్జామ్స్కు ప్రిపేర్ అవుతున్నారా? - ఈ పొరపాట్లు చేయకపోతే విజయం మీదే!
ఆ 7 అలవాట్లు ఉంటే మీ స్టడీ స్కిల్స్‌ను పెంచుకోవచ్చు - మీరూ ఓ సారి ట్రై చేయండి
