Under-19 Yash Dhull about kohli: టీమ్ఇండియా మాజీ సారథి కోహ్లీతో మాట్లాడిన తర్వాత తమలో ఆత్మవిశ్వాసం పెరిగిందని అన్నాడు అండర్-19 టీ20 ప్రపంచకప్ జట్టు కెప్టెన్ యశ్ ధుల్. కీలక మ్యాచ్ ఫైనల్కు ముందు విరాట్ లాంటి అద్భుత ఆటగాడితో మాట్లాడటం తమకు ఎంతో ఉపయోగపడుతుందని చెప్పాడు. కోహ్లీ మాటలు మానసిక స్థైర్యాన్ని ఇచ్చాయని పేర్కొన్నాడు. నేడు జరగబోయే తుది పోరులో ఇంగ్లాండ్తో తలపడనుంది భారత జట్టు. ఈ నేపథ్యంలోనే తాజా ఇంటర్వ్యూలో పాల్గొన్న ధుల్ ఈ విషయాల్ని తెలిపాడు. ఫైనల్లో ఎలాంటి ప్రణాళికలు రచించాలి, ఎలా ఆడాలనే విషయాలను కూడా విరాట్ వివరించాడని యువ సారథి వెల్లడించాడు.
తాము ఈ మ్యాచ్ కోసం ఎంతో ఆసక్తిగా ఎదురుచూస్తున్నామని.. సానుకూల ఆలోచనా ధోరణితో తుదిపోరులో తలపడతామని ధుల్ అన్నాడు. "ఇంగ్లాండ్ కూడా సెమీస్‌లో అఫ్గానిస్థాన్‌తో చివరి వరకూ పోరాడి గెలిచింది. ఆ జట్టును కట్టడి చేయడానికి మా ప్రాణాళికలకు కట్టుబడి పనిచేస్తాం. అలాగే మా జట్టులోని ప్రతి ఒక్కరూ 100 శాతం రాణించడానికి సిద్ధంగా ఉన్నారు. ఈ టోర్నీలో మాకు తగినంత అనుభవం దొరికింది, దీంతో పెద్ద మ్యాచ్‌లకు ముందు మానసికంగా ఎలా సన్నద్ధమవ్వాలో తెలిసింది. తుది పోరుకు ముందు మేము బలంగా మారాం. ఒత్తిడిని తట్టుకొని ఎలా రాణించాలో కూడా తెలిసింది" అని యశ్ ధుల్ అన్నాడు.
కాగా, ఈ యువ కెప్టెన్ ఆసీస్‌తో తలపడిన సెమీ ఫైనల్లో శతకంతో రాణించిన సంగతి తెలిసిందే. 2008లో విరాట్ కోహ్లీ, 2012లో ఉన్ముక్త్‌ చంద్‌ ఇలాగే సెంచరీలు బాది జట్టును విజేతగా నిలిపారు. ఇప్పుడు యశ్ ధుల్ సైతం అలాంటి ప్రదర్శనతోనే మరో అండర్-19 ప్రపంచకప్ తీసుకొస్తాడని అభిమానులు ఆశిస్తున్నారు.
ఇదీ చూడండి: భారత సంతతి కుర్రాడు అదరహో.. అఫ్గాన్పై ఆసీస్ విజయం
