పురుషుల ఐపీఎల్ టైటిల్ హక్కులు అట్టిపెట్టుకున్న టాటా గ్రూప్.. ఇప్పుడు వచ్చే నెలలో జరిగే మొట్టమొదటి మహిళల ప్రీమియర్ లీగ్ టైటిల్ హక్కులు కూడా దక్కించుకుంది. మార్చి 4 నుంచి ప్రారంభమయ్యే డబ్ల్యూపీఎల్ హక్కులకు సంబంధించి బీసీసీఐ, టాటా సన్స్ మధ్య ఒప్పందం కుదిరింది. మొత్తం ఐదేళ్ల పాటు టైటిల్ స్పాన్సర్షిప్ హక్కులు టాటాకు దక్కాయి. అయితే ఆ డీల్ విలువ ఎంత అనేది ఇంకా బయటకు రాలేదు.
అయితే ఈ మహిళల ఐపీఎల్ మీడియా హక్కులను వయాకామ్ సంస్థ.. ఐదేళ్ల కాలానికి రూ.951 కోట్లకు దక్కించుకుంది. అంతకుముందు జట్టు ఫ్రాంచైజీలను కొనుగోలు చేసేందుకు కూడా ప్రముఖ సంస్థలకు బీసీసీఐ ఆహ్వానాలు పంపింది. ఈ ఫ్రాంచైజీల అమ్మకం ద్వారా.. సుమారు రూ.4,670 కోట్లు బీసీసీఐ సంపాదించింది. ఐపీఎల్లో ఉన్న మూడు ఫ్రాంచైజీలు ముంబయి ఇండియన్స్, రాయల్ ఛాలెంజర్స్ బెంగళూరు, దిల్లీ క్యాపిటల్స్.. మహిళల ఐపీఎల్లో కూడా జట్లను కొన్నాయి.
వీరితో పాటు అదానీ గ్రూప్, కాప్రి గ్లోబల్ కూడా రెండు ఫ్రాంచైజీ హక్కులను దక్కించుకున్నాయి. కాగా, గుజరాత్ జెయింట్స్ ఫ్రాంచైజీ.. అత్యధికంగా రూ.1289 కోట్లకు అమ్ముడుపోయింది. ఆ తర్వాత స్థానాల్ల్లో ముంబయి ఇండియన్స్ (రూ.912.99 కోట్లు), రాయల్ ఛాలెంజర్స్ బెంగళూరు (రూ.901 కోట్లు), దిల్లీ క్యాపిటల్స్ (రూ.810 కోట్లు), యూపీ వారియర్స్ (రూ.757 కోట్లు) ఉన్నాయి.
దక్షిణాఫ్రికా వేదికగా జరుగుతున్న టీ20 ప్రపంచకప్ ముగిసిన ఐదు రోజుల తర్వాత మహిళల ఐపీఎల్ ప్రారంభమవ్వనుంది. కాగా, ఈ టోర్నీ కేవలం రెండు స్టేడియాల్లోనే బీసీసీఐ నిర్వహించనుంది. మొత్తం 22 మ్యాచ్లు జరగనున్నాయి.
