Suresh Raina: భారత మాజీ క్రికెటర్ సురేశ్ రైనాను ప్రతిష్ఠాత్మక అవార్డు వరించింది. మాల్దీవులు ప్రభుత్వం ఇచ్చే 'స్పోర్ట్స్ ఐకాన్' అవార్డుకు రైనా ఎంపికయ్యాడు. ఈ అవార్డుకు శ్రీలంక క్రికెట్ దిగ్గజం సనత్ జయసూర్య, జమైకా స్ప్రింటర్ పోవెల్, డచ్ ఫుట్బాల్ ఆటగాడు ఎడ్గర్ డెవిడ్స్ సహా 16 మంది అంతర్జాతీయ ఆటగాళ్లు పోటీ పడ్డారు. ఈ అవార్డును బంగ్లాదేశ్ క్రీడామంత్రి జహీర్ హసన్ రసెల్.. రైనాకు అందజేశారు. ఈ కార్యక్రమంలో సౌదీ అరేబియా, మాల్దీవుల క్రీడా మంత్రులు పాల్గొన్నారు.
మరోవైపు, ఐపీఎల్ మెగావేలంలో సురేశ్ రైనాను కొనుగోలు చేయకపోవడంపై శ్రీలంక మాజీ ఆటగాడు, రాజస్థాన్ రాయల్స్ డైరెక్టర్ కుమార సంగక్కర స్పందించాడు. 'రెడ్బుల్ క్రికెట్' కార్యక్రమంలో పాల్గొన్న అతడు ఈ వ్యాఖ్యలు చేశాడు.
"దీనిని అనేక రకాలుగా చూడొచ్చు. కాలం గడుస్తున్న కొద్ది కొత్త ఆటగాళ్లు వస్తుంటారు. సురేశ్ రైనా ఒక దిగ్గజ ఆటగాడు. ఐపీఎల్లో అతడు అద్భుతమైన ప్రదర్శన చేశాడు. ప్రతీ సీజన్లోనూ మెరుగ్గా రాణించాడు. ఈ సీజన్కు సరిపోకపోవచ్చు కానీ అతడిలో ఆటగాడికి ఉండాల్సిన మంచి లక్షణాలన్నీ ఉన్నాయి. వాటి కోసమే విశ్లేషకులు, యాజమాన్యాలు వెతుకుతున్నాయి."
-కుమార సంగక్కర, రాజస్థాన్ రాయల్స్ డైరెక్టర్
ఐపీఎల్లో చైన్నై సూపర్ కింగ్స్ జట్టు నాలుగు సార్లు కప్పు గెలవడంలో సురేశ్ రైనా కీలక పాత్ర పోషించాడు. టీ20ల్లో 8వేల పరుగులు సాధించిన తొలి భారతీయుడిగా.. ఐపీఎల్లో 5వేల పరుగులు చేసిన తొలి ఆటగాడిగా రికార్డు సృష్టించాడు. ఐపీఎల్లో చెన్నై జట్టు తరపున 176 మ్యాచ్లు ఆడిన సురేశ్ రైనా.. 32.32 సగటుతో 4687 పరుగులు చేశాడు. ఇందులో ఓ శతకం, 33 అర్ధ సెంచరీలు ఉన్నాయి. ఐపీఎల్లో మొత్తం 205 మ్యాచ్లు ఆడిన రైనా 5528 పరుగులు చేశాడు.
ఇదీ చదవండి:IPL 2022: ఐపీఎల్లోకి రైనా.. ఈసారి కొత్త అవతారంలో
