సొంతగడ్డపై దక్షిణాఫ్రికాతో జరగనున్న వన్డే సిరీస్కు టీమ్ఇండియా సీనియర్ ఓపెనర్ శిఖర్ ధావన్ కెప్టెన్గా వ్యవహరించే అవకాశం ఉంది. ఈ విషయాన్ని ఓ బీసీసీఐ సంబంధిత వర్గాలు తెలిపాయి.టీ20 ప్రపంచకప్ 2022లో పాల్గొనే ప్లేయర్లకు విశ్రాంతి లభించాలని కెప్టెన్సీని ధావన్‌కు అప్పగించనున్నట్లు వెల్లడించాయి. ప్రధాన కోచ్ రాహుల్ ద్రావిడ్‌కు కూడా వన్డే సిరీస్కు విశ్రాంతి లభించనుంది. స్టాండ్ ఇన్ కోచ్ వీవీఎస్ లక్ష్మణ్ జట్టుకు కోచ్‌గా వ్యవహరించే అవకాశం ఉందని పేర్కొన్నాయి. కాగా, ఐసీసీ టీ20 వరల్డ్ కప్ 2022 ఎనిమిదో ఎడిషన్ ఈ ఏడాది అక్టోబర్ 16 నుంచి నవంబర్ 13వరకు ఆస్ట్రేలియాలో జరగనుంది.
దక్షిణాఫ్రికాతో టీ20, వన్డేలు ఇలా.. సెప్టెంబర్ 28నుంచి దక్షిణాఫ్రికాతో భారత్ మూడు టీ20లు, అలాగే మూడు వన్డేలు ఆడనుంది. మొదటి టీ20 సెప్టెంబర్ 28న తిరువనంతపురంలో జరుగుతుంది. రెండోది అక్టోబర్ 2న గౌహతిలో, మూడోది అక్టోబర్ 4న ఇండోర్‌లో జరుగుతాయి. ఇక అక్టోబర్ 6 నుంచి వన్డే సిరీస్ ప్రారంభం అవుతుంది. లక్నో వేదికగా తొలి వన్డే జరగనుంది. అక్టోబరు 9, 11తేదీల్లో వరుసగా రెండో, మూడో వన్డేలకు రాంచీ, దిల్లీ వేదికలు కానున్నాయి. ఈ వన్డే సిరీస్కు ధావన్ కెప్టెన్సీ బాధ్యతలు చేపట్టనున్నాడు.
ఫామ్లో ధావన్.. 2022లో 9 వన్డేల్లో 51.85 సగటుతో 363పరుగులు చేసిన ధావన్ ఈ ఏడాది చక్కటి ఫామ్లో ఉన్నాడు. ఓవరాల్‌గా 158 వన్డేల్లో ధావన్ 45.84 సగటుతో 17 సెంచరీలు, 38 అర్ధసెంచరీలతో 6,647పరుగులు చేశాడు.
ఆ ముగ్గురు జట్టులోకి.. ఇకపోతే టీ20 ప్రపంచకప్ కోసం రోహిత్ శర్మ, టీ20 ప్రపంచకప్‌కు ఎంపికైన జట్టు సభ్యులు అక్టోబర్ 9న లేదా 10న ఆస్ట్రేలియాకు బయలుదేరుతారు. ఆస్ట్రేలియన్ పరిస్థితులు, సమయాలకు అలవాటు పడడం కోసం ముందస్తుగానే టీమ్ఇండియా ఆసీస్ చేరుకోనుంది. వార్మప్ మ్యాచ్లకు ముందు భారత్ ఇంట్రా-స్క్వాడ్ ప్రాక్టీస్ మ్యాచ్‌లు ఆడనుంది. కాగా, దక్షిణాఫ్రికాతో వన్డే సిరీస్తో రాహుల్ త్రిపాఠి అరంగేట్రం చేసే అవకాశం ఉంది. ఈ ఏడాది ప్రారంభంలో ఐర్లాండ్‌పై అరంగేట్రం చేసిన ఉమ్రాన్ మాలిక్ కూడా వన్డే సిరీస్కు ఎంపిక అయ్యే ఛాన్స్ ఉంది. అలాగే కౌంటీల్లో వన్డే ట్రోఫీలో అదరగొట్టిన పుజారా కూడా జట్టులోకి రావొచ్చు.
ఇదీ చూడండి: అయ్యో.. పాక్ ఫీల్డర్లు మళ్లీ ఇలా చేశారేంటి.. వీరు ఎప్పటికీ మారరా?
