నాగ్పుర్ వేదికగా జరుగుతున్న బోర్డర్-గావస్కర్ ట్రోఫీ తొలి టెస్టు మొదటి రోజు టీమ్ఇండియా ప్లేయర్లు అద్భుత ప్రదర్శన చేశారు. అటు బంతి, ఇటు బ్యాట్తో రాణించారు. వీరి ప్రదర్శనపై క్రికెట్ దిగ్గజం సచిన్ తెందుల్కర్ ఆసక్తికర కామెంట్లు చేశారు. అందులో ముఖ్యంగా ప్లేయర్లు రవీంద్ర జడేజా, రవిచంద్రన్ అశ్విన్, రోహిత్ శర్మల త్రయాన్ని 'ఆర్ఆర్ఆర్'గా అభివర్ణించాడు. ఈ మేరకు ట్విట్టర్ వేదికగా వారిపై ప్రశంసల జల్లు కురిపించాడు మాస్టర్ బ్లాస్టర్. "ఆర్ఆర్ఆర్.. రోహిత్, రవీంద్ర, రవిచంద్రన్ త్రయం.. టెస్టులో టీమ్ఇండియాను ఆధిక్యంలో నిలబెట్టారు. రోహిత్ తన శతకంతో ముందుండి నడిపించాడు. రవిచంద్రన్ అశ్విన్, రవీంద్ర జడేజా కీలక వికెట్లు పడగొట్టారు" అని సచిన్ తెందుల్కర్ ట్విట్టర్లో పోస్ట్ చేశారు.
కాగా, ఈ మొదటి టెస్టులో ఆస్ట్రేలియా తొలి ఇన్నింగ్స్లో రవీంద్ర జడేజా, రవిచంద్రన్ అశ్విన్ రెచ్చిపోయారు. దాదాపు ఐదు నెలల విరామం తర్వాత ఫస్ట్ ఇంటర్నేషనల్ మ్యాచ్ ఆడిన జడ్డూ.. ఐదు వికెట్లు తీసి రాణించాడు. అశ్విన్ మూడు వికెట్ల తీయడం వల్ల.. ఆస్ట్రేలియా 177 పరుగులు చేసి ఆలౌట్ అయింది. ఆ తర్వాత బ్యాటింగ్కు దిగిన భారత్.. అద్భుత ప్రదర్శన చేసింది. రోహిత్ శర్మ కెప్టెన్ ఇన్నింగ్స్ ఆడి సెంచరీ పూర్తి చేశాడు. ఈ శతక ప్రదర్శనతో మూడు ఫార్మాట్లలోనూ త్రీ డిజిట్ స్కోరు అందుకున్న తొలి ఇండియన్ కెప్టెన్గా రికార్డు సృష్టించాడు. ఇక ప్రపంచంలో ఈ ఫీట్ చేసిన నాలుగో సారథిగా నిలిచాడు.
ఇవీ చదవండి :
స్టైల్లోనూ తగ్గేదే లే.. క్రికెటర్ల పోనీ టెయిల్ అదిరిపోలా
IND VS AUS: రెండేళ్ల తర్వాత రోహిత్ సెంచరీ.. నిరాశపరిచిన కోహ్లీ
