టీ20 ప్రపంచకప్, ఛాంపియన్స్ ట్రోఫీ సహా 2024-2031 మధ్య ఐసీసీ నిర్వహించబోయే పలు మెగా ఈవెంట్ల ఆతిథ్యానికి పాక్ క్రికెట్ బోర్డు ఆసక్తిగా ఉన్నట్లు క్రికెట్ వర్గాలు తెలిపాయి. ఐసీసీకి సమర్పించేందుకు.. బోర్డు ప్రస్తుతం బిడ్లు దాఖలు చేసే ప్రక్రియలో ఉన్నట్లు ఓ ప్రతినిధి తెలిపారు.
"ఐసీసీ తన సభ్యదేశాల నుంచి మెగా ఈవెంట్లను ఆతిథ్యమిచ్చేందుకు ఆసక్తిగా ఉన్నవాళ్లు ముందుకు రావాలని కోరింది. ఈ ఏడాది డిసెంబరులో ఐసీసీ.. బోర్డుల నుంచి బిడ్లను స్వీకరిస్తుంది. వచ్చే ఏడాది తుది నిర్ణయాన్ని ప్రకటిస్తుంది. ప్రస్తుతం పరిస్థితి అంతా మారిపోయింది. పాక్ పర్యటనకు రావడానికి మిగతా జట్లు ఆసక్తి చూపిస్తున్నాయి. న్యూజిలాండ్, ఇంగ్లాండ్, వెస్టిండీస్ ఈ ఏడాది ఇక్కడకి రానున్నాయి." అని సదరు ప్రతినిధి అన్నారు.
ఇప్పటికే పాకిస్థాన్.. సంయుక్తంగా ఐసీసీ ఈవెంట్లను నిర్వహించేందుకు ఎమిరేట్స్ క్రికెట్ బోర్డుతో చర్చలు జరుపుతుందని వెల్లడించారు. 1996లో చివరిసారిగా భారత్, శ్రీలంకతో కలిసి సంయుక్తంగా ప్రపంచకప్ను నిర్వహించింది పాక్ క్రికెట్ బోర్డు.
ఇదీ చూడండి: గంగూలీ నా పెళ్లికి వచ్చారు: పాక్ క్రికెటర్
