వెస్టిండీస్ తరఫున సుదీర్ఘ కాలం ప్రాతినిధ్యం వహించిన ఇద్దరు క్రికెటర్లు.. ఆటకు గుడ్బై చెప్పారు. తొలుత వికెట్ కీపర్ బ్యాటర్ దినేశ్ రామ్దిన్ రిటైర్మెంట్ ప్రకటించగా.. సోమవారం అర్ధరాత్రి సమయంలో క్రికెట్ నుంచి తప్పుకుంటున్నట్లు లెండిల్ సిమన్స్ ట్విట్టర్లో వెల్లడించాడు.
37 ఏళ్ల సిమన్స్.. చివరిసారి గతేడాది జరిగిన టీ-20 వరల్డ్ కప్లో ఆడాడు. 3 ఫార్మాట్లలో కలిపి 144 మ్యాచ్లు ఆడిన ఈ విధ్వంసకర ఓపెనర్.. 3,763 పరుగులు చేశాడు. టీ-20ల్లో అత్యుత్తమ ప్రదర్శన చేశాడు. వన్డేల్లో రెండు సెంచరీలు ఉన్నాయి. 2006లో తొలి వన్డే ఆడిన సిమన్స్.. మొత్తం 16 ఏళ్లు క్రికెట్లో కొనసాగాడు.
2016 టీ-20 ప్రపంచ కప్ వెస్టిండీస్ గెలవడంలో కీలక పాత్ర పోషించాడు సిమన్స్. ఆ టోర్నీ సెమీఫైనల్లో భారత్ను ఓడించి ఫైనల్ చేరిన విండీస్.. రెండో సారి టీ-20 వరల్డ్కప్ దక్కించుకున్న ఏకైక టీంగా నిలిచింది. ఆ మ్యాచ్లో వెస్టిండీస్ ముందు భారత్ 193 పరుగుల లక్ష్యం నిర్దేశించినా.. సిమన్స్ చెలరేగి ఆడాడు. 51 బంతుల్లోనే 82 పరుగులు చేసి మ్యాచ్ను లాగేసుకున్నాడు. ఐపీఎల్లోనూ ముంబయి ఇండియన్స్ తరఫున ఆడాడు సిమన్స్. మొత్తం 29 మ్యాచ్ల్లో 40 సగటుతో 1079 రన్స్ చేశాడు. ఇందులో ఓ సెంచరీ ఉంది.
రామ్దిన్ గుడ్బై: మరో వెస్టిండీస్ వికెట్ కీపర్- బ్యాటర్, మాజీ కెప్టెన్ దినేశ్ రామ్దిన్ కూడా క్రికెట్ నుంచి తప్పుకున్నాడు. అంతర్జాతీయ క్రికెట్లో.. 74 టెస్టులు ఆడి 2,898 పరుగులు చేశాడు. 139 వన్డేల్లో 2,200... 71 టీ-20ల్లో 636 రన్స్ చేశాడు.
2005లో విండీస్ తరఫున తొలి వన్డే ఆడాడు రామ్దిన్. చివరిగా 2019 డిసెంబర్లో టీ-20 మ్యాచ్ ఆడాడు. 2012, 2016లో టీ-20 వరల్డ్కప్ గెలిచిన విండీస్ జట్టులో సభ్యుడు కూడా. 13 టెస్టులు, 3 టీ-20లు సహా ఓ వన్డేలో విండీస్ జాతీయ జట్టుకు కెప్టెన్గా వ్యవహరించాడు.
ఇదీ చదవండి: దశాబ్దాల కల నెరవేర్చి.. క్రికెట్ పుట్టినింటికి కప్పు తెచ్చి..
