ICC ODI Rankings: ఐసీసీ పురుషుల వన్డే ర్యాంకింగ్స్ విడుదలయ్యాయి. టీమ్ఇండియా ప్లేయర్లు శ్రేయస్ అయ్యర్, కేఎల్ రాహుల్ తమ స్థానాలను మెరుగుపరుచుకున్నారు. బంగ్లాదేశ్‌తో జరిగిన మొదటి మ్యాచ్లో సాధించిన 24 పరుగులతో పాటు న్యూజిలాండ్‌తో జరిగిన చివరి మ్యాచ్లో 49 పరుగులు చేయడంతో అయ్యర్ ఏడు స్థానాలు ఎగబాకి 20వ స్థానానికి చేరుకున్నాడు.
మిర్పూర్‌లో 73 పరుగులు చేసిన రాహుల్ నాలుగు స్థానాలు ఎగబాకి 35వ ర్యాంక్‌కు చేరుకున్నాడు. టీమ్ఇండియా కెప్టెన్ రోహిత్ శర్మ, స్టార్ బ్యాటర్ విరాట్ కోహ్లీ.. తమ తొమ్మిది, పది స్థానాలను పదిలంగా ఉంచుకున్నారు. టాప్ 10లో టీమ్ఇండియా నుంచి వీరిద్దరే ఉన్నారు.
ఇక బౌలర్ల విషయానికి వస్తే.. భారత పేస్ ద్వయం మహ్మద్ సిరాజ్ , శార్దూల్ ఠాకూర్ బంగ్లాదేశ్‌తో జరిగిన వన్డేలో సత్తా చాటడంతో పాయింట్ టేబుల్లో ఎగబాకారు. శ్రీలంక లెగ్ స్పిన్నర్ హసరంగతో కలిసి సిరాజ్ 26వ స్థానాన్ని పంచుకున్నాడు. ఠాకూర్ మాత్రం తొమ్మిది స్థానాలు ఎగబాకి 42వ స్థానానికి చేరుకున్నాడు.
ఐసీసీ టెస్టు బ్యాటర్ల ర్యాంకింగ్స్లో మార్నస్‌ లాబుషేన్‌ టాప్
ICC Test Rankings 2022: ఐసీసీ టెస్టు బ్యాటర్ల ర్యాంకింగ్స్లో ఆస్ట్రేలియా ప్లేయర్ మార్నస్‌ లాబుషేన్‌ టాప్లో ఉన్నాడు. వెస్టిండీస్‌తో జరిగిన తొలి టెస్ట్లో డబుల్‌ సెంచరీతో చెలరేగిన లాబుషేన్‌.. 935 పాయింట్ల ఆధిక్యంతో ఇంగ్లాండ్‌ బ్యాటర్ జోరూట్‌ను అధిగమించి తొలి స్థానాన్ని కైవసం చేసుకున్నాడు. దీంతో మొదటి స్థానంలో ఉన్న జో రూట్‌ నాలుగో ప్లేస్కు షిప్టయ్యాడు.
మరోవైపు వెస్టిండీస్‌పై డబుల్‌ సెంచరీ సాధించిన స్మిత్‌ను రెండో ర్యాంక్‌, ఇంగ్లాండ్‌పై సెంచరీతో రాణించిన పాక్‌ కెప్టెన్ బాబర్‌ అజామ్కు మూడో ర్యాంక్‌ వరించింది. అలాగే వెస్టిండీస్‌ కెప్టెన్ క్రెగ్‌ బ్రాత్‌వైట్‌ టాప్ 20లోకి ఎంట్రీ ఇచ్చాడు. ఆస్ట్రేలియాతో జరిగిన తొలి టెస్టులో బ్రాత్‌వైట్‌ రెండు ఇన్నింగ్స్‌ కలిపి 174 పరుగులు సాధించాడు.
బౌలర్లలో విండీస్‌తో జరిగిన తొలి టెస్టులో 8 వికెట్లు పడగొట్టిన ఆసీస్‌ వెటరన్‌ స్పిన్నర్ నాథన్‌ లయాన్‌ ఒక స్థానం ఎగబాకి 15వ స్థానానికి చేరుకున్నాడు. అదే విధంగా ఇంగ్లండ్‌తో జరిగిన తొలి టెస్టులో ఐదు వికెట్లు సాధించిన నసీం షా ఐదు స్థానాలు ఎగబాకి 54 వ ర్యాంక్‌కు చేరుకున్నాడు.
