యూకే టూర్లో ఉన్న టీమ్ఇండియా టెస్ట్ స్క్వాడ్లో మరే ఇతర ఆటగాడిని చేర్చుకోవాల్సిన అవసరం లేదని మాజీ ఆల్రౌండర్ కపిల్దేవ్ అభిప్రాయపడ్డాడు. ప్రస్తుతం జట్టులో ఉన్న 20 మందితో ఇంగ్లాండ్తో ఐదు టెస్టుల సిరీస్ను విజయవంతంగా ముగించవచ్చని పేర్కొన్నాడు. ఇప్పటికే రాహుల్, మయాంక్ అగర్వాల్ ఓపెనింగ్ స్థానానికి పోటీలో ఉన్నారని.. గాయపడిన గిల్ స్థానంలో మరో ఆటగాడిని కావాలంటూ టీమ్ఇండియా కోరడం సరైనది కాదన్నాడు.
యువ ఓపెనర్ గిల్ గాయపడిన నేపథ్యంలో పృథ్వి షాను జట్టులోకి తీసుకోవాలని టీమ్ఇండియా భావిస్తోంది. ఈ విషయమై బీసీసీఐని కోరింది. పరిమిత ఓవర్ల సిరీస్ కోసం ప్రస్తుతం శ్రీలంక పర్యటనలో ఉన్నాడు షా.
"ఓపెనర్ శుభ్మన్ గిల్ గాయపడి ఉండొచ్చు. అతని స్థానంలో ప్రత్యామ్నాయంగా అనుభవజ్ఞులైన కేఎల్ రాహుల్, మయాంక్ అగర్వాల్.. ఇప్పటికే స్క్వాడ్లో ఉన్నారు. వీరిద్దరు కాకుండా మరో ఓపెనర్ అవసరమా? అలా తీసుకుంటే ఇప్పటికే ఉన్న వారిని అవమానించినట్లే అవుతుంది. స్టాండ్ బై ప్లేయర్గా అభిమన్యు ఈశ్వరన్ కూడా అందుబాటులో ఉన్నాడు. ఇది జట్టు యాజమాన్యానికి మంచిది కాదు."
-కపిల్దేవ్, టీమ్ఇండియా మాజీ కెప్టెన్.
"ఇంగ్లాండ్తో సిరీస్ కోసం సెలక్షన్ కమిటీ ఓ జట్టును ఎంపిక చేసింది. వారి నిర్ణయాన్ని గౌరవించాలి. టీమ్ ఎంపికలో కోచ్ రవిశాస్త్రి, కెప్టెన్ విరాట్ కోహ్లీ పాత్ర కచ్చితంగా ఉంటుంది. ఒక్క ఆటగాడు గాయపడితే ప్రత్యామ్నాయం ఉంది. ఏదేమైనా ఎంపిక చేసిన స్క్వాడ్తోనే ఆడాలనేది నా అభిప్రాయం. ఈ విషయంపై వివాదం అనవసరం," అని కపిల్ స్పష్టం చేశాడు.
ఇదీ చదవండి: Team India: ఇంగ్లాండ్తో టెస్టు సిరీస్కు పృథ్వీ!
