ఐపీఎల్ 14వ సీజన్ రసవత్తరంగా సాగుతోంది. కొన్ని జట్లు పాయింట్ల పట్టికలో అగ్రస్థానం కోసం పోటీపడుతుంటే.. మరికొన్ని జట్లు గెలుపు కోసం శ్రమిస్తున్నాయి. పాయింట్ల పట్టికలో అట్టడుగున నిలిచి అభిమానుల్ని నిరాశకు గురిచేస్తున్నాయి. దీంతో ఓటమి బాట పట్టిన ఫ్రాంచైజీలు లీగ్ మధ్యలోనే కొన్ని కీలక నిర్ణయాలు తీసుకుంటూ అందర్నీ ఆశ్చర్యానికి గురిచేస్తున్నాయి. తాజాగా వరుస ఓటములతో ఢీలాపడ్డ సన్రైజర్స్ హైదరాబాద్.. కెప్టెన్సీ నుంచి డేవిడ్ వార్నర్ను తప్పిస్తూ అందర్నీ విస్మయానికి గురిచేసింది. సన్రైజర్స్ అంటే ఠక్కున గుర్తొచ్చే వార్నర్ను తప్పించడం చాలామంది జీర్ణించుకోలేకపోతున్నారు. అయితే ఇలా లీగ్ మధ్యలోనే కెప్టెన్ను తప్పించడం ఇదేమీ కొత్తకాదు. ఇంతకుముందు కూడా ఇలాంటి సంఘటనలు జరిగాయి. అవేంటో చూద్దాం.
డేవిడ్ వార్నర్
ఈ సీజన్లో కెప్టెన్సీతో పాటు బ్యాటింగ్లో తడబడ్డాడు డేవిడ్ వార్నర్. అందువల్ల ఇతడని కెప్టెన్సీ నుంచి తప్పించడమే కాకుండా తుది జట్టులోనూ చోటు కల్పించలేదు ఫ్రాంచైజీ. ఈ సీజన్లో 110 స్ట్రైక్ రేట్తో 193 పరుగులు చేశాడు వార్నర్. కాగా, ఇతడు ఈ సీజన్లో మరోసారి తుదిజట్టులోకి రావడం అనుమానంగానే మారింది.
రికీ పాంటింగ్
2013 సీజన్లో ముంబయి ఇండియన్స్కు ఆడిన రికీ పాంటింగ్.. స్వయంగా అతడే కెప్టెన్సీ నుంచి తప్పుకొంటూ.. తుదిజట్టులోనూ చోటు కోల్పోయాడు. తర్వాత ఈ బాధ్యతల్ని రోహిత్ శర్మకు అప్పగించింది యాజమాన్యం. ఇది ఈ జట్టు తలరాతనే మార్చింది. ముంబయిని లీగ్లో అత్యంత విజయవంతమైన జట్టుగా నిలపడంలో రోహిత్ కృషి మనందరికి తెలిసిందే. ఆ తర్వాత పాంటింగ్ ఐపీఎల్లో ఒక్క మ్యాచ్ కూడా ఆడలేదు. అనంతరం 2015 సీజన్లో ముంబయికి కోచింగ్ బాధ్యతలు నిర్వర్తించాడు పాంటింగ్. ఈ సీజన్లో రెండోసారి విజేతగా నిలిచింది రోహిత్సేన. 2016 వరకు ముంబయికి కోచ్గా ఉన్న ఈ ఆస్ట్రేలియా మాజీ క్రికెటర్ ప్రస్తుతం దిల్లీ క్యాటిపల్స్కు కోచింగ్ బాధ్యతలు నిర్వర్తిస్తున్నాడు.
గౌతమ్ గంభీర్
ఐపీఎల్లో కోల్కతా నైట్రైడర్స్ను రెండుసార్లు విజేతగా నిలిపాడు గౌతమ్ గంభీర్. 2018లో దిల్లీకి మారి ఆ జట్టుకు నాయకత్వ బాధ్యతలు నిర్వర్తించాడు. ఈ సీజన్లో ఆరు మ్యాచ్ల్లో ఒకే మ్యాచ్ గెలవడం వల్ల కెప్టెన్సీ నుంచి తప్పుకొన్నాడు గౌతీ. ఆ తర్వాత జట్టుకు ఒక్క మ్యాచ్ కూడా ఆడలేదు. అనంతరం అదే ఏడాది డిసెంబర్లో ప్రొఫెషనల్ క్రికెట్కు గుడ్బై చెప్పాడు.
స్టీవ్ స్మిత్
మిగతావారిలా కాకుండా స్టీవ్ స్మిత్ ఒకే మ్యాచ్కు బెంచ్కు పరిమితమయ్యాడు. ఆ తర్వాత మళ్లీ జట్టులోకి వచ్చి అత్యుత్తమ ఫామ్ కనబర్చాడు. 2019 సీజన్లో రాజస్థాన్ రాయల్స్కు తిరిగొచ్చిన ఇతడికి కెప్టెన్సీ ఇవ్వలేదు. అనంతరం బ్యాటింగ్లో తగిన ప్రదర్శన చేయకపోవడం వల్ల పంజాబ్ కింగ్స్తో జరిగిన మ్యాచ్లో ఇతిడిని బెంచ్కే పరిమితం చేశారు. ఆ తర్వాత మ్యాచ్లోనే జట్టులోకి వచ్చిన ఇతడు అద్భుత ఇన్నింగ్స్తో ఆకట్టుకున్నాడు. తర్వత ఏడాది కూడా రాజస్థాన్కే ఆడిన స్మిత్ను ఈ సీజన్కు ముందు వదులుకుందీ జట్టు. ప్రస్తుతం ఇతడు దిల్లీకి ఆడుతున్నాడు.
