సన్రైజర్స్ హైదరాబాద్ టీమ్కు కెప్టెన్గా డేవిడ్ వార్నర్ను తప్పించారు.. కనీసం ఆడే అవకాశం కూడా ఇవ్వలేదు. మొన్నటి వరకు కెప్టెన్గా ఉన్న డేవిడ్ వార్నర్ రాజస్థాన్ రాయల్తో మ్యాచ్లో డగౌట్కే పరిమితమయ్యాడు. భుజంపై తువ్వాలు వేసుకుని.. తోటి ఆటగాళ్లకు డ్రింక్స్ అందిస్తూ. జట్టు మంచి ప్రదర్శన చేసినప్పుడల్లా చప్పట్లు కొడుతూ ప్రోత్సహిస్తూ కనిపించాడు. తుదిజట్టు నుంచి తనను తప్పించడం పట్ల వార్నర్ షాక్కు గురయ్యాడని సన్రైజర్స్ ఫ్రాంఛైజీ క్రికెట్ డైరెక్టర్ టామ్ మూడీ వెల్లడించినప్పటికీ.. ఆ బాధను అతడు ఎక్కడ కనిపించకుండా సరదాగా తిరిగాడు. ఐపీఎల్లో ఏ జట్టుకు ఆడినా ఫామ్ ఆధారంగా వార్నర్ను పక్కన పెట్టడం బహుశా ఇదే తొలిసారి. నిజానికి ఇప్పుడూ అతడి ఫామ్ పేలవంగానూ లేదు.
ఫ్రాంచైజీ వివరణ ఎలా ఉన్నప్పటికీ అంతర్గత విభేధాల కారణంగానే అతడిపై వేటు పడిందన్నది వాస్తవం. ఇప్పుడిప్పుడే అతడికి ఆడే అవకాశం రాకపోయినా ఆశ్చర్యం లేదు. ఈ దశలో తుదిజట్టులో ఆడే విదేశీయుల్లో ఇద్దరు బ్యాట్స్మన్, ఒక ఆల్ రౌండర్తో పాటు రషీద్ ఖాన్ను ఆడించాలన్నది తమ ప్రణాళిక అని మూడీ స్పష్టం చేశాడు. ఇదే ఫార్ములా మిగతా మ్యాచ్ల్లోనూ అమలు చేస్తే కెప్టెన్ విలియమ్సన్, బెయిర్ స్టో ఉండడం ఖాయం. రషీద్ ఖాన్ ఎలాగూ ఉంటాడు. కాబట్టి.. మరో బెర్తు ఆల్రౌండర్దే. వార్నర్ మరికొన్ని మ్యాచ్లకు డగౌట్కు పరిమితం కావొచ్చు.
మనీశ్ను తుది జట్టులో ఆడించకపోవడంపై వార్నర్ బహిరంగంగానే అసంతృప్తి వ్యక్తం చేయడం ఫ్రాంచైజీకి కోపం తెప్పించివుండొచ్చు. అయితే ఈ ఒక్క కారణంతోనే సన్రైజర్స్ ఫ్రాంచైజీ వార్నర్ను తప్పిస్తుందని అనుకోలేం. అతడి విభేదాలు మూడీ వరకే పరిమితం కాలేదని తెలుస్తోంది. ఆ విభేదాలు ఏంటి? ఎప్పుడు మొదలయ్యాయి? అన్నవి ఐపీఎల్ ముగిసేలోపు బయటకు రావొచ్చు. ఆ తర్వాత వార్నర్ ఏం చేస్తాడు? అతని దారెటు అన్నదే ఆసక్తికరం.
ఇదీ చదవండి: ఐపీఎల్: కోహ్లీసేనను కోల్కతా అడ్డుకోగలదా?
