ఇండియన్ ప్రీమియర్ లీగ్-2023 సీజన్‌లో ఇప్పటివరకు రెండు మ్యాచులు ఆడింది చెన్నై సూపర్ కింగ్స్. ఈ సీజన్ను ఓటమితో ఆరంభించిన ఆ జట్టు.. తన రెండో మ్యాచ్లో విజయం సాధించింది. అయితే ఈ టీమ్లో బౌలింగ్ విభాగం పేలవమైన ప్రదర్శన చేస్తూ విమర్శలను ఎదుర్కొంటోంది. ఎక్కువగా వైడ్లు, నోబాల్స్‌ వేసి అదనపు పరుగులు సమర్పించుకుంటోంది. ఈ విషయంపై సీఎస్కే కెప్టెన్ మహేంద్ర సింగ్ ధోనీ కూడా అసంతృప్తి వ్యక్తం చేసాడు. బౌలర్ల తీరుపై మండిపడ్డాడు కూడా. అయితే తాజాగా ఈ విషయంపై.. లఖ్‌నవూతో జరిగిన మ్యాచ్లో మూడు నోబాల్స్‌ వేసిన సీఎస్కే పేసర్ తుషార్ దేశ్పాండే మాట్లాడాడు. డెత్‌ ఓవర్లలో బంతులను సంధించడం అంత సులభం కాదని, తాను ఇంకా నేర్చుకునే దశలో ఉన్నట్లు చెప్పాడు.
"టీ20ల్లో నో బాల్స్ వేయడం తప్పే. కానీ నేను దాని గురించే ఎక్కువగా ఆలోచిస్తే మరిన్ని ఎక్కువ పరుగులు అదనంగా సమర్పించుకోవాల్సి వస్తుంది. అప్పుడు మ్యాచ్ రిజల్ట్ మరోలా ఉంటుంది. నేనెప్పుడూ బాగా రాణించడంపైనే ఫోకస్ చేస్తాను. టీమ్ సక్సెస్ కోసం ఆడాలన్నదే నా ధ్యేయం, తపన. డెత్‌ ఓవర్లలో బౌలింగ్ చేయడం అంత సులభమైన పని కాదు. నేను ఇంకా నేర్చుకుంటున్నాను. అయినా మాకు డెత్‌ ఓవర్లలో గొప్పగా బౌలింగ్ చేసిన ఎక్స్పీరియన్స్ కోచ్‌ డీజే బ్రావో ఉన్నారు. ఆయన నుంచి బౌలింగ్ మెలకువలను నేర్చుకుంటున్నాను" అని తుషార్ చెప్పుకొచ్చాడు.
ఇకపోతే ఇప్పటివరకు చెన్నై సూపర్ కింగ్స్ ఆడిన రెండు మ్యాచుల్లోనూ 'ఇంపాక్ట్‌ ప్లేయర్‌'గా బరిలోకి దిగిన తుషార్ దేశ్పాండే ఆకట్టుకునే ప్రదర్శన చేయలేదు. సీఎస్కే రెండో మ్యాచ్ లఖ్‌నవూతో జరగగా.. ఆ పోరులో.. 4 ఓవర్లు వేసిన మూడు నోబాల్స్‌ ఇచ్చాడు. 45 పరుగులిచ్చి 2 వికెట్లు పడగొట్టాడు. అంతకుముందు గుజరాత్‌తో జరిగిన పోరులోనూ 3.2 ఓవర్లలో ఏకంగా 51 పరుగులను సమర్పించుకున్నాడు. ఒక్క వికెట్ మాత్రమే తీశాడు.
చెన్నై సూపర్ కింగ్స్ సొంతగడ్డపై లఖన్వూతో జరిగిన మ్యాచ్లో గెలిచి ఈ సీజన్‌లో తొలి విజయాన్ని నమోదు చేసినప్పటికీ అది అంత ఈజీగా రాలేదు. 13 వైడ్లు, 3 నోబాల్స్‌ వేసి అదనపు పరుగులు సమర్పించుకున్నారు బౌలర్లు. వీరి తప్పిదం వల్ల విజయం కోసం సీఎస్కే చాలా కష్టపడాల్సి వచ్చింది. ఈ నేపథ్యంలోనే మ్యాచ్ అయిపోయాక బౌలర్ల ప్రదర్శనపై ధోనీ అసంతృప్తి వ్యక్తం చేశాడు. బౌలర్లు తమ ఆట శైలిని మార్చుకోకపోతే తాను కెప్టెన్సీ నుంచి తప్పుకుంటానని సీరియస్ వార్నింగ్ కూడా ఇచ్చాడు.
ఇదీ చూడండి: దిల్లీ క్యాపిటల్స్ ప్లేయర్స్ వైఫ్స్, గర్ల్ఫ్రెండ్స్.. వీరు కూడా ఫేమసే
