ఈ సీజన్లో రాజస్థాన్ రాయల్స్, సన్రైజర్స్ హైదరాబాద్ వరుస ఓటములతో ఢీలాపడ్డాయి. జట్టులో మార్పులు చేసినా ఫలితం రావట్లేదు. ఇప్పటివరకు చెరో ఆరు మ్యాచ్లు ఆడిన ఇరుజట్లలో రాజస్థాన్ రెండింటిలో విజయం సాధించగా.. కేవలం ఒకే ఒక గెలుపుతో పాయింట్ల పట్టికలో ఆఖరి స్థానంలో నిలిచింది సన్రైజర్స్. నేడు ఈ రెండు జట్ల మ్యాచ్ జరగనుంది. దిల్లీ వేదికగా జరగనున్న ఈ మ్యాచ్ మధ్యాహ్నం 3.30 గంటలకు ప్రారంభంకానుంది.
కెప్టెన్ మార్పు పనిచేస్తుందా!
రాజస్థాన్తో మ్యాచ్కు ముందు విలియమ్సన్కు కెప్టెన్ బాధ్యతలు అప్పజెప్పింది సన్రైజర్స్. రెండేళ్లుగా జట్టుగా కెప్టెన్గా వ్యవహరిస్తోన్న వార్నర్కు ఉద్వాసన పలికింది. ఇతడు తుదిజట్టులోనూ ఉండటం అనుమానమే. దిల్లీతో మ్యాచ్లో మెరుగైన ప్రదర్శన చేసినా సూపర్ ఓవర్ దాకా వచ్చిన మ్యాచ్ను చేజార్చుకుంది హైదరాబాద్. దీంతో ఈ మ్యాచ్లో కీలక మార్పులు చేసేందుకు సిద్ధమైంది.
వార్నర్ అనుమానమే!
ఈ మ్యాచ్లో బ్యాటింగ్ ఆర్డర్లో మార్పులు చేయనుంది సన్రైజర్స్. వార్నర్ స్థానంలో జాసన్ రాయ్ను ఎంపిక చేసే ఆలోచనలో ఉంది. ఒకవేళ ఇదే జరిగితే బెయిర్స్టోతో రాయ్ ఓపెనింగ్ చేసే అవకాశం ఉంది. వీరిద్దరూ ఇంగ్లాండ్ జట్టుకు గొప్ప ఆరంభాలనిచ్చారు. ఒక వేళ వార్నర్ స్థానంలో మరో ఆల్రౌండర్ను తీసుకోవాలనుకుంటే జాసన్ హోల్డర్ మంచి ఎంపిక. దీంతో వీరిద్దరిలో ఒకరు తుదిజట్టులో చోటు దక్కంచుకునే అవకాశం ఉంది. టాపార్డర్లో మనీష్ పాండే, విలియమ్సన్ మరింతగా ఆకట్టుకోవాల్సి ఉంది. అలాగే జట్టుకు మిడిలార్డర్ పెద్ద సమస్యగా మారింది.
బౌలింగ్లో అప్ఘాన్ స్పిన్నర్ రషీద్ ఖాన్పైనే ఎక్కువగా ఆధారపడుతోంది సన్రైజర్స్. గత ఆరు మ్యాచ్లో మంచి ప్రదర్శన చేసిన ఇతడకి మద్దతుగా మరో బౌలర్ కరవయ్యాడు. నాలుగు మ్యాచ్ల్లో మూడు వికెట్లు తీసిన భువనేశ్వర్ చివరి రెండు మ్యాచ్ల్లో గాయం కారణంగా ఆడలేకపోయాడు. అలాగే ఖలీల్ అహ్మద్, సందీప్ శర్మ మరింతగా ఆకట్టుకోవాల్సిన అవసరం ఉంది.
రాజస్థాన్ మెప్పిస్తుందా!
ఇక రాజస్థాన్ రాయల్స్ది దాదాపు ఇదే సమస్య. ఈ జట్టులోనూ స్థిరత్వం కొరవడింది. కోల్కతాతో మ్యాచ్ ఓడి ఆత్మవిశ్వాసంతో కనిపించిన ఈ జట్టు ఆ తర్వాత ముంబయిపై ఓటమి చవిచూసింది. కీలక విదేశీ ఆటగాళ్లు జోఫ్రా ఆర్చర్, బెన్ స్టోక్స్ గాయాల కారణంగా జట్టుకు దూరమవడం వీరికి పెద్ద సమస్యగా మారింది. బ్యాటింగ్లో వీరు ఎక్కువగా కెప్టెన్ సంజూ శాంసన్పైనే ఆధారపడుతున్నారు. ఇతడు ఓ మ్యాచ్లో సెంచరీతో అలరించినా.. ఆ తర్వాత ఆకట్టుకోలేకపోయాడు. బట్లర్ ఆరు మ్యాచ్లో కేవలం ఒక అర్ధసెంచరీ మాత్రమే చేశాడు. మిడిలార్డర్లో మిల్లర్, రియాన్ పరాగ్ సత్తాచాటాలని యాజమాన్యం భావిస్తోంది.
బౌలింగ్లోనూ స్థిరమైన ప్రదర్శన కనబర్చలేకపోతుంది రాజస్థాన్. ఆల్రౌండర్ క్రిస్ మోరిస్ ఇప్పటికి 11 వికెట్లతో రాణిస్తున్నా.. ఇతడికి మద్దతుగా నిలవలేకపోతున్నారు మిగతా బౌలర్లు. ముస్తాఫిజుర్ రెహ్మన్, ఉనద్కత్ వారి స్థాయిలో రాణించలేకపోతున్నారు. యువ పేసర్ చేతన్ సకారియా పర్వాలేదనిపిస్తున్నాడు. స్పిన్ విభాగంలో ఈ జట్టు మరీ బలహీనంగా కనిపిస్తోంది. రాహుల్ తెవాటియా ఇప్పటివరకు కేవలం ఒక వికెట్ మాత్రమే సాధించాడు.
