యువ ఆల్రౌండర్ అర్జున్ తెందూల్కర్ రాణించడానికి ముంబయి ఇండియన్స్ టీమ్ వాతావరణం సహకరిస్తుందని ఆ జట్టు డైరెక్టర్ జహీర్ ఖాన్ వెల్లడించాడు. కానీ, ఈ అవకాశాన్ని నిలబెట్టుకోవడానికి ప్రస్తుత ఐపీఎల్లో తనకు తానుగా శ్రమించాలని తెలిపాడు.
"అర్జున్కు కొన్ని మెళకువలు నేర్పేందుకు నెట్స్లో అతడితో ఎక్కువ సమయాన్ని కేటాయించాను. అతడిది కష్టపడే వ్యక్తిత్వం. ఇందులో చెప్పుకోదగిన విషయం ఏంటంటే.. నేర్చుకోవడానికి అతడు ఎంతో ఆసక్తి చూపుతాడు. సచిన్ తెందూల్కర్ కుమారుడు అవ్వడం వల్ల అతడికి మరికొంత ఒత్తిడి పెరుగుతుంది. ఇలాంటి పరిస్థితుల్లో అతడు రాణించడానికి ముంబయి ఇండియన్స్ జట్టు వాతావరణం సహకరిస్తుంది. ఓ మంచి క్రికెటర్గా ఎదిగేందుకు అది తోడ్పడుతుంది".
- జహీర్ ఖాన్, ముంబయి ఇండియన్స్ డైరెక్టర్
గురువారం జరిగిన ఐపీఎల్ వేలంలో అర్జున్ తెందూల్కర్ను ముంబయి ఇండియన్స్ జట్టు రూ.20 లక్షల కనీసధరకు సొంతం చేసుకుంది. గతేడాది యూఏఈ వేదికగా జరిగిన ఐపీఎల్లో ముంబయి ఇండియన్స్ జట్టుకు నెట్ బౌలర్గా అర్జున్ తెందూల్కర్ పనిచేశాడు.
దేశవాళీ క్రికెట్లో ముంబయి తరఫున అండర్-19తో పాటు ఇతర విభాగాల్లో పాల్గొన్నాడు. ఈ ఏడాది జరిగిన సయ్యద్ ముస్తాక్ అలీ ట్రోఫీ ద్వారా సీనియర్ల క్రికెట్లోకి అర్జున్ అడుగుపెట్టాడు.
ఇదీ చూడండి: ఐపీఎల్లో సచిన్ తనయుడు- ముంబయి తరఫున బరిలోకి
