ఇండియన్ ప్రీమియర్ లీగ్-2023 సీజన్లో గుజరాత్ టైటాన్స్ - లఖ్నవూ సూపర్ జెయింట్స్ మ్యాచ్ ఫ్యాన్స్కు మంచి థ్రిల్లింగ్ను ఇచ్చింది. అలాగే క్రికెట్ అభిమానులెవరూ ఊహించని ఫలితం నమోదైంది. లాస్ట్ బాల్ వరకు సాగిన ఈ ఉత్కంఠ పోరులో గుజరాత్ మోహిత్ శర్మ హీరోగా నిలిస్తే.. లఖ్నవూ కేఎల్ రాహుల్ జోకర్ అయ్యాడు.
వాస్తవానికి 14 ఓవర్ల వరకు లఖ్నవూ వైపే ఉన్న మ్యాచ్.. ఆఖరి ఐదు ఓవర్లలో ఊహించని మలుపు తిరిగి అభిమానులకు షాక్ ఇచ్చింది. 14 ఓవర్లలో రెండు వికెట్లు కోల్పోయి 106 పరుగులతో బలంగా ఉన్న లఖ్నవూ సూపర్ జెయింట్స్.. మిగతా ఆరు ఓవర్లలో ఆరు వికెట్లు కోల్పోయి 128 పరుగుల స్కోరు మాత్రమే చేసింది. ఓడిపోతుందనుకున్న గుజరాత్ టైటాన్స్ ఏడు పరుగుల తేడాతో విజయం సాధించింది. అయితే లఖ్నవూ బ్యాటర్లలో కేఎల్ రాహుల్(68) పరుగులతో హాఫ్ సెంచరీతో మెరిశాడు. జట్టులో టాప్ స్కోరర్గా నిలిచాడు. అయితే అదే రాహుల్.. మ్యాచ్ ఓటమికి కూడా కారణమయ్యాడు.
ఎలా అంటే.. ఛేదనకు దిగిన లఖ్నవూ చేతిలో ఎనిమిది వికెట్లు.. 36 బంతుల్లో 31 పరుగులు చేస్తే విజయం. కానీ 14 ఓవర్లలో రెండు వికెట్లు కోల్పోయి 106 పరుగులతో ఆ జట్టు.. 15వ ఓవర్లో 1 పరుగు, 16వ ఓవర్లో 3, 17వ ఓవర్లో 4, 18వ ఓవర్లో 6, 19వ ఓవర్లో 5, 20వ ఓవర్లో 4 పరుగులు మాత్రమే చేసింది. ఇకపోతే మరోవైపు ఈ ఛేదనలో రాహుల్.. అర్ధ శతకంతో ఆఖరి ఓవర్ వరకు క్రీజులో నిలిబడ్డాడు. దీంతో అతడు మ్యాచ్‌ను గెలిపిస్తాడనే అంతా అనుకున్నారు. కానీ ఇక్కడ సీన్‌ ఒక్కసారిగా రివర్స్‌ అయింది. చివరి వరకు క్రీజులో ఉన్న రాహుల్.. అనూహ్యంగా చివరి ఓవర్ సెకండ్ బాల్కు ఔట్ అయ్యాడు. సులవుగా గెలిపించాల్సిన మ్యాచ్లో లఖ్నవూకు ఓటమిని అందించాడు. 38 బంతుల్లో హాఫ్ సెంచరీ చేసిన చేసిన అతడు.. తర్వాత 23 బంతుల్లో కేవలం 18 పరుగులు మాత్రమే చేశాడు. అలా బంతులను మొత్తం వృథా చేశాడు. అదే సమయంలో గుజరాత్ కట్టుదిట్టంగా బౌలింగ్ వేయడంతో చివరి మూడు బంతుల్లో లఖ్నవూ వరుసగా మరో మూడు వికెట్లను కోల్పోయింది. దీంతో కేఎల్ రాహుల్ బ్యాటింగ్‌ను సోషల్‌ మీడియాలో అభిమానులు, నెటిజన్లు ట్రోల్ చేస్తున్నారు. మ్యాచ్ ఫిక్సింగ్ జరిగిందని ఆరోపిస్తున్నారు.
ఈ పేలవ ప్రదర్శనతో ఐపీఎల్‌లో 60 బంతులు ఎదుర్కొని అత్యంత చెత్త స్ట్రైక్‌రేట్‌ నమోదు చేసిన ఆటగాళ్ల జాబితాలో కేఎల్ రాహుల్ చేరిపోయాడు. ఈ మ్యాచ్లో 61 బంతుల్లో 68 పరుగులు చేసిన రాహుల్ స్ట్రైక్‌రేట్‌ 111.48గా నమోదైంది. దీంతో అతడు ఈ జాబితాలో మూడో స్థానంలో నిలిచాడు. ఇక ఫస్ట్ ప్లేస్లో జేపీ డుమిని 63 బంతుల్లో 59 పరుగులు(93.65 స్ట్రైక్ రేట్), సెకండ్ ప్లేస్ ఆరోన్‌ ఫించ్‌ 62 బంతుల్లో 68 పరుగులు(109.68 స్ట్రైక్‌రేట్‌) ఉన్నారు.
ఇదీ చూడండి: IPL 2023 LSG VS GT : కేఎల్ రాహుల్ అరుదైన రికార్డ్.. కానీ ఉత్కంఠ పోరులో గుజరాత్దే విజయం
