Nortje David Warner: ఐపీఎల్-15ను దిల్లీ క్యాపిటల్స్ విజయంతోనే ప్రారంభించింది. తొలి మ్యాచ్లో ముంబయిపై గెలిచినా.. రెండో మ్యాచ్లో గుజరాత్ టైటాన్స్ చేతిలో ఓడిపోయింది. అయితే.. దిల్లీ క్యాపిటల్స్ జట్టులో కీలక విదేశీ ప్లేయర్లు అందుబాటులో లేకపోవడం వల్ల వారి బ్యాటింగ్, బౌలింగ్ విభాగాలు బలహీనంగా మారాయి. బ్యాటింగ్లో ఓపెనర్లు పృథ్వీ షా, సీఫెర్ట్ ఆకట్టుకోలేకపోతున్నారు. జట్టులో లలిత్ యాదవ్, పంత్, అక్షర్ పటేల్ మాత్రమే ఫర్వాలేదనిపిస్తున్నారు. బౌలింగ్లో నోర్జే లేని లోటు స్పష్టంగా కనిపిస్తుంది. అంతకుముందు సీజన్లో రబాడ, నోర్జే, అవేశ్ ఖాన్, అక్షర్, అశ్విన్తో బౌలింగ్ దుర్బేధ్యంగా ఉండేది. ఇప్పుడు అవేశ్, అశ్విన్, రబాడ వేరే జట్లకు ఆడుతున్నారు.
నెక్ట్స్ మ్యాచ్కు వస్తారని..: ఆస్ట్రేలియా విధ్వంసకర ఓపెనర్ డేవిడ్ వార్నర్, సౌతాఫ్రికా పేసర్ అన్రిచ్ నోర్జే.. దిల్లీ ఆడే తదుపరి మ్యాచ్కు అందుబాటులో ఉంటారని ఆశిస్తున్నట్లు హెడ్ కోచ్ రికీ పాంటింగ్ అన్నాడు. ఫిట్నెస్ సమస్యలను పరిష్కరించుకొని.. మిచెల్ మార్ష్ కూడా త్వరలోనే జట్టులో చేరతాడని భావిస్తున్నట్లు తెలిపాడు. గతేడాది నవంబర్ నుంచి అంతర్జాతీయ క్రికెట్ ఆడలేదు నోర్జే. అతడిని వెన్నునొప్పి సమస్య వేధిస్తోంది. అయితే.. నెట్స్లో బాగానే బౌలింగ్ చేస్తున్నాడని పాంటింగ్ చెప్పుకొచ్చాడు.
కాంట్రాక్టు ఉన్న ఆస్ట్రేలియా ప్లేయర్లు ఐపీఎల్లో ఏప్రిల్ 6 తర్వాతే ఆడేందుకు అనుమతి ఇచ్చింది అక్కడి బోర్డు. దీని కారణంగా వార్నర్, మిచెల్ మార్ష్.. ప్రస్తుతం ఆడలేకపోతున్నారు. ఏప్రిల్ 7న దిల్లీ క్యాపిటల్స్.. లఖ్నవూతో తలపడనుంది. ఆ మ్యాచ్కు వార్నర్ ఆడే అవకాశం ఉన్నట్లు పాంటింగ్ చెప్పాడు. మార్ష్ ఆ తర్వాతి మ్యాచ్కు జట్టులోకి రానున్నట్లు తెలుస్తోంది. వార్నర్, మార్ష్ వీలైనంత త్వరగా క్వారంటైన్ కూడా పూర్తి చేసుకొని.. సెలక్షన్కు అందుబాటులోకి వస్తారని పాంటింగ్ వెల్లడించాడు.
ఇవీ చూడండి: 'ఆ 35 పరుగులే నాకు అత్యుత్తమం'- 11 ఏళ్లు వెనక్కి వెళ్లిన కోహ్లీ
'కేన్' అవుట్పై సన్రైజర్స్ నిరసన.. బీసీసీఐకి చేరిన పంచాయతీ
