ఐపీఎల్లో రెండు అగ్రశ్రేణి జట్ల మధ్య మ్యాచ్ జరగనుంది. ఇందుకు దిల్లీలోని అరుణ్జైట్లీ స్టేడియం వేదిక కానుంది. పాయింట్ల పట్టికలో టాప్-4లో ఉన్న ముంబయి ఇండియన్స్, చెన్నై సూపర్ కింగ్స్ పోరుకు సిద్ధమయ్యాయి. రెండు జట్లలో అన్ని విభాగాలలో బలంగా కనిపిస్తున్నాయి. ఇప్పటివరకు ఆరేసి మ్యాచ్లాడిన ఇరుజట్లలో రోహిత్ సేన మూడు పరాజయాలు, మూడు విజయాలతో ఉండగా.. ధోనీ సేన ఐదు విజయాలను ఖాతాలో వేసుకుంది. ఓటమితో సీజన్ను ప్రారంభించిన చెన్నై.. తర్వాత గొప్పగా పుంజుకొంది. వరుస విజయాలతో మునుపటి ఛాంపియన్ చెన్నైను తలపిస్తుంది ధోనీసేన.
చెన్నైకు అడ్డుందా?
తొలి మ్యాచ్లో ఓటమి మినహా మిగతా మ్యాచ్లన్నింటిలో విజయాలు సాధించిన ధోనీసేన టైటిల్ ఫెవరేట్లలో ఒకటిగా నిలిచింది. నిలకడైన ఆటతీరుతో ఓపెనింగ్ జోడీ.. ప్రత్యర్థులకు సవాలు విసురుతుంది. డుప్లెసిస్-రుతురాజ్ జంట.. జట్టుకు దాదాపు ప్రతి మ్యాచ్లోనూ శుభారంభాన్ని అందించింది. ఆ తర్వాత వన్డౌన్లో క్రీజులోకి వస్తున్న మొయిన్ అలీ ఫర్వాలేదనిపిస్తున్నాడు. ఇక రైనా, జడేజా, అంబటి రాయుడు, ధోనీ.. టీమ్కు అవసరమైనప్పుడు బ్యాట్ ఝుళిపిస్తున్నారు.
ఇక బౌలింగ్లో దీపక్ చాహర్తో పాటు ఎంగిడి, జడేజా, మొయిన్ అలీ రాణిస్తున్నారు. వీరితో పాటు శార్దుల్ ఠాకుర్, సామ్ కరన్ స్థాయికి తగ్గ ప్రదర్శన చేస్తే ధోనీ సేనకు ఎదురుండదు. గత సీజన్లో ప్లేఆఫ్కు చేరని చెన్నై.. ఈ దఫా మళ్లీ ఛాంపియన్ చెన్నైను గుర్తుకుతెస్తోంది. వరుస విజయాలతో టైటిల్ ఫెవరేట్గా మారింది.
ఇదీ చదవండి: డబ్ల్యూబీసీ ఛాంపియన్షిప్ పోటీలు వాయిదా
ముంబయి విజయాలను కొనసాగించేనా?
గత మ్యాచ్లో పంజాబ్పై ఆధిపత్యం ప్రదర్శించిన ముంబయి తిరిగి విజయాన్ని అందుకుంది. 171 పరుగుల లక్ష్యాన్ని కేవలం 3 వికెట్లు కోల్పోయి ఛేదించింది. ఓపెనర్ డికాక్ ఫామ్ అందుకున్నాడు. కృనాల్ పాండ్య కూడా చాలా రోజుల తర్వాత స్థాయికి తగ్గ ప్రదర్శన చేశాడు. కెప్టెన్ రోహిత్ శర్మతో పాటు సూర్యకుమార్, ఇషాన్ కిషన్, కీరన్ పొలార్డ్ రాణిస్తున్నారు. ఈ సీజన్లో ఇంతవరకు మంచి ప్రదర్శన చేయని ఆటగాడు ఉన్నాడంటే అది హార్దిక్ పాండ్య మాత్రమే. అతడు కూడా గాడిలో పడితే ముంబయి మిడిలార్డర్ కుదుటపడ్డట్లే.
ఇక బౌలింగ్లో అత్యుత్తమ ప్రపంచ స్థాయి బౌలర్లు బుమ్రా, బౌల్ట్.. ప్రత్యర్థులకు తమ యార్కర్లతో ఊపిరి సలపనివ్వట్లేదు. డెత్ ఓవర్లలో పరుగులు రానివ్వకుండా అడ్డుకుంటున్నారు. వీరితో పాటు రాహుల్ చాహర్, కౌల్టర్ నైల్, కృనాల్ పాండ్య ఫర్వాలేదనిపిస్తున్నారు. ఇక సమష్టిగా రాణిస్తే ముంబయి.. మరో విజయాన్ని తమ ఖాతాలో వేసుకోవడం ఖాయం.
ఇదీ చదవండి: 'భారత్లోనే టీ20 ప్రపంచ కప్.. వేదికలు నాలుగే!'
