Protein Rich Food Vegetarian: మన శరీరంలో జీవక్రియలు సరిగ్గా జరగాలన్నా, కండరాలు దృఢంగా మారాలన్నా ప్రొటీన్ల అవసరం ఎంతో ఉంటుంది. అయితే, ఊపిరి సలపని పనులతో నిత్యం బిజీగా ఉండేవారు.. అలుపు లేకుండా ఉత్సాహంగా ఉండాలంటే ప్రొటీన్లు అధికంగా ఉండే ఆహార పదార్థాలను ఎక్కువగా తీసుకోవాల్సి ఉంటుందని నిపుణులు అంటున్నారు. ఈ క్రమంలోనే శాకాహారానికి ప్రాధాన్యమిచ్చేవారు ప్రొటీన్లు పొందాలంటే ఈ పదార్థాల్ని తమ రోజువారీ ఆహారంలో చేర్చుకోవాలని నిపుణులు అంటున్నారు. అవేంటో ఇప్పుడు తెలుసుకుందాం.
పప్పుధాన్యాలు: కందులు, పెసలు, మినుములు మొదలైన వాటిలో ఉండే పోషకాలతో ఎన్నో ఆరోగ్య ప్రయోజనాలు ఉన్నాయని నిపుణులు చెబుతున్నారు. ముఖ్యంగా పప్పుధాన్యాల్లో ప్రొటీన్లు అధికంగా ఉంటాయని వివరిస్తున్నారు. వీటిలోని పీచు పదార్థాలు కూడా శరీర బరువును క్రమబద్ధీకరిస్తాయని వివరిస్తున్నారు. ఇక వీటిలో ఉండే ఫైబర్‌, యాంటీ ఆక్సిడెంట్లు.. గుండె సంబంధిత సమస్యలు, క్యాన్సర్‌ లాంటి దీర్ఘకాలిక వ్యాధుల నుంచి రక్షణ కల్పిస్తాయని నిపుణులు అంటున్నారు.
చిక్కుళ్లు: కిడ్నీ బీన్స్ (రాజ్మా), బ్లాక్‌ బీన్స్ వంటి చిక్కుడు జాతికి చెందిన పదార్థాల్లో ప్రొటీన్లు అధికంగా ఉంటాయని నిపుణులు చెబుతున్నారు. వీటిని ఆహారంలో భాగం చేసుకుంటే ప్రొటీన్లతో పాటు బి-విటమిన్‌, ఫైబర్‌ శరీరానికి పుష్కలంగా అందుతాయని వివరిస్తున్నారు. అలాగే వీటిలోని యాంటీ ఆక్సిడెంట్లు, యాంటీ ఇన్‌ఫ్లమేటరీ గుణాలు.. గుండె జబ్బులు, క్యాన్సర్‌ లాంటి వ్యాధుల నుంచి కాపాడుతాయని అంటున్నారు.
నట్స్: ప్రొటీన్లతో నిండి ఉండే బాదం పప్పు, పిస్తా, అక్రోట్‌ వంటి గింజలను ప్రతిరోజూ తీసుకోవడం గుండె ఆరోగ్యానికి ఎంతో మేలు కలుగుతుందని నిపుణులు చెబుతున్నారు. వీటి వల్ల ప్రొటీన్లతో పాటు కొన్ని రకాల విటమిన్లు, ఫైబర్‌.. వంటి పోషకాలూ శరీరానికి అందుతాయని వివరిస్తున్నారు. అయితే నట్స్‌లో క్యాలరీలు కూడా ఎక్కువగానే ఉంటాయి కాబట్టి మితంగా తీసుకోవడం మంచిదని నిపుణులు సలహా ఇస్తున్నారు. 2023లో Nutrients జర్నల్లో ప్రచురితమైన "Nuts and Cardiovascular Disease Outcomes: A Review of the Evidence and Future Directions" అధ్యయనంలోనూ ఈ విషయం తేలింది. (రిపోర్ట్ కోసం ఇక్కడ క్లిక్ చేయండి)
పచ్చి బఠాణీలు: వీటిలోని యాంటీ బ్యాక్టీరియల్‌, యాంటీ ఫంగల్, యాంటీ ఇన్‌ఫ్లమేటరీ, యాంటీ ఆక్సిడెంట్‌ గుణాలు శరీరంలోని చెడు కొలెస్ట్రాల్‌ స్థాయుల్ని తగ్గిస్తాయని నిపుణులు చెబుతున్నారు. ఫలితంగా వివిధ వ్యాధుల నుంచి దూరంగా ఉండచ్చని సూచిస్తున్నారు. ఒక కప్పు పచ్చి బఠాణీల్లో 8 గ్రాముల వరకు ప్రొటీన్‌ ఉంటుందని.. ఇంకా ఎ, కె, సి విటమిన్లు, ఫైబర్‌ వంటి పోషకాలు కూడా సమృద్ధిగా లభిస్తాయని వివరిస్తున్నారు.
సోయా బీన్స్: సోయాబీన్స్‌లో మాంసాహారానికి సరిసమానమైన స్థాయిలో ప్రొటీన్లు ఉంటాయని నిపుణులు చెబుతున్నారు. ఇందులోని బి, డి, ఇ- విటమిన్లు, క్యాల్షియం, ఐరన్‌, జింక్, అన్‌శ్యాచురేటెడ్ ఫ్యాటీ ఆమ్లాలు వంటివన్నీ శరీరంలోని చెడు కొలెస్ట్రాల్‌ స్థాయులను తగ్గిస్తుందని అంటున్నారు. ఇంకా రక్తపోటును కూడా అదుపులో ఉంచుతుందని వివరిస్తున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
చైనా కొత్త వైరస్ ఎలా సోకుతుంది? లక్షణాలు ఏంటి? నివారణ ఎలా? చికిత్స ఏదైనా ఉందా?
చలికాలంలో ఎన్ని క్రీములు రాసినా ఫలితం లేదా? ఈ సింపుల్ టిప్స్ ట్రై చేసి చూడండి!
