ముంబయి ఇండియన్స్తో జరిగిన మ్యాచ్లో అద్భుత విజయం సాధించింది కోల్కతా నైట్రైడర్స్. లీగ్ రెండో దశలో తొలి మ్యాచ్లో బెంగళూరును మట్టికరిపించిన కోల్కతా.. ఈ మ్యాచ్లో పటిష్ట ముంబయిని చిత్తుచేసింది.
తొలుత టాస్ గెలిచి ముంబయికి బ్యాటింగ్ అప్పగించిన కోల్కతా ప్రత్యర్థిని 155 పరుగులకే కట్టడి చేసింది. ముఖ్యంగా రోహిత్, డికాక్ శుభారంభం అందించినా.. పక్కా ప్రణాళికతో వారిని బోల్తా కొట్టించిన కేకేఆర్ తర్వాత జట్టును కోలుకోకుండా చేసింది.
అనంతరం బ్యాటింగ్లో విధ్వంసం సృష్టించింది కోల్కతా. ఓపెనర్ గిల్ (13) తక్కువ స్కోర్కే ఔటైనా.. రాహుల్ త్రిపాఠితో కలిసి యువ ఆటగాడు వెంకటేశ్ అయ్యర్ కళ్లు చెదిరే షాట్లతో అలరించాడు. వీరిద్దరూ ముంబయి బౌలర్లను ఊచకోత కోశారు. బుమ్రా, బౌల్ట్, ఆడం మిల్నే వంటి టాప్ క్లాస్ బౌలర్లను ఉతికారేశారు. ఆర్సీబీతో జరిగిన మ్యాచ్తో ఐపీఎల్ అరంగేట్రం చేసిన అయ్యర్.. ఆ మ్యాచ్లో ఆకట్టుకున్నాడు. తాజాగా ఈ మ్యాచ్లో తనలోని విధ్వంసాన్ని బయటకుతీశాడు. 25 బంతుల్లోనే అర్ధశతకం చేసి సెలక్టర్ల దృష్టిని ఆకర్షించాడు. తర్వాత మరో మూడు పరుగులు చేసి బుమ్రా బౌలింగ్లో ఔటయ్యాడు. మరోవైపు రాహుల్ త్రిపాఠి కూడా బ్యాట్ ఝళిపించాడు. 29 బంతుల్లోనే హాఫ్ సెంచరీ చేసి తానేంటో మరోసారి నిరూపించుకున్నాడు. తర్వాత వచ్చిన కెప్టెన్ మోర్గాన్ (7) విఫలమైనా నితీశ్ రానాతో కలిసి జట్టును విజయ తీరాలకు చేర్చాడు. ఈ క్రమంలోనే 74* పరుగులతో నాటౌట్గా నిలిచాడు త్రిపాఠి.
ముంబయి తడబాటు
టాస్ ఓడి బ్యాటింగ్కు దిగిన ముంబయికి ఓపెనర్లు రోహిత్ శర్మ (33), డికాక్ (55) శుభారంభాన్ని ఇచ్చారు. మొదటి బంతికే ఫోర్తో ఇన్నింగ్స్ను ఆరంభించిన హిట్మ్యాన్ వీలు చిక్కినప్పుడల్లా బంతిని బౌండరీ దాటించాడు. మొదట నెమ్మదిగా ఆడిన డికాక్ తర్వాత రెచ్చిపోయాడు. ఎడాపెడా బౌండరీలతో విరుచుకుపడ్డాడు. దీంతో పవర్ప్లే ముగిసే సరికి 56 పరుగులు చేసింది ముంబయి. అనంతరం 10వ ఓవర్లో భారీ షాట్ ఆడబోయి నరైన్ బౌలింగ్లో ఔటయ్యాడు రోహిత్ (33). కాసేపటికే సూర్యకుమార్ (5) కూడా పెవిలియన్ చేరాడు. ఈ క్రమంలోనే సమయోచితంగా ఆడిన డికాక్ తన హాఫ్ సెంచరీని పూర్తి చేశాడు. మరో ఐదు పరుగులు జోడించిన ఇతడు 55 పరుగులు చేసి ప్రసిధ్ కృష్ణ బౌలింగ్లో ఔటయ్యాడు.
అనంతరం ఇషాన్ కిషన్ (14) భారీ షాట్కు ప్రయత్నించి ఫెర్గుసన్ బౌలింగ్లో క్యాచ్ ఔట్గా వెనుదిరిగాడు. చివర్లో కోల్కతా బౌలర్లు కట్టుదిట్టంగా బంతులేశారు. దీంతో పరుగులు రాబట్టడానికి కష్టపడ్డారు పొలార్డ్ (21), కృనాల్ (12) పాండ్యా. 6వ వికెట్కు 30 పరగులు జోడించిన వీరిద్దరూ ఫెర్గుసన్ వేసిన చివరి ఓవర్లో వరుస బంతుల్లో ఔటయ్యారు. చివరి బంతికి సౌరభ్ తివారి ఫోర్ బాదడం వల్ల ముంబయి ఇన్నింగ్స్ 155 పరుగుల వద్ద ముగిసింది.
కోల్కతా బౌలర్లలో ఫెర్గుసన్, ప్రసిధ్ చెరో 2 వికెట్లతో రాణించగా నరైన్కు ఒక వికెట్ దక్కింది.
ఇదీ చూడండి: డికాక్ హాఫ్ సెంచరీ.. కోల్కతా లక్ష్యం 156
