గతేడాది ఐపీఎల్ ఆరంభానికి ముందు అంతర్జాతీయ క్రికెట్లో శిఖర్ ధావన్ పనైపోయిందన్న అభిప్రాయాలు బలంగా వినిపించాయి. బ్యాటింగ్లో నిలకడ లేమి, ఫిట్నెస్ సమస్యలకు తోడు వయసు పెరిగిపోవడం అతడికి ప్రతికూలతలుగా కనిపించాయి. కుర్రాళ్ల జోరు ముందు అతను నిలవలేడని, టీమ్ఇండియాలో చోటు నిలుపుకోవడం కష్టమే అని తేల్చేశారు చాలామంది. కానీ యూఏఈలో జరిగిన ఐపీఎల్లో ఈ సీనియర్ ఓపెనర్ చెలరేగిపోయాడు. ఒకటికి రెండు శతకాలు బాదేశాడు. మొత్తం 618 పరుగులతో ఆ ఐపీఎల్ టాప్స్కోరర్లలో రెండో స్థానం సాధించాడు. దీంతో ఆస్ట్రేలియా పర్యటనకు తనను ఎంపిక చేయక తప్పని పరిస్థితి సెలక్టర్లకు కల్పించాడతను. ఆ పర్యటనలో ఓ మోస్తరు ప్రదర్శన చేసిన ధావన్పై స్వదేశంలో ఇంగ్లాండ్తో టీ20 సిరీస్లో జట్టు యాజమాన్యం శీతకన్నేసింది.
ఒక మ్యాచ్లో ఆడించి పక్కన పెట్టేసింది. అయితేనేం ఇంగ్లాండ్తో వన్డే సిరీస్లో అతను అదరగొట్టాడు. ఒక మ్యాచ్లో 98 పరుగులు, మరో మ్యాచ్లో 67 పరుగులు చేశాడు. అయినప్పటికీ టీ20 జట్టులో అతడికి స్థానం కష్టమే అన్న అభిప్రాయాలు వ్యక్తమయ్యాయి. ఇంగ్లాండ్తో టీ20 సిరీస్లో సూర్యకుమార్, కిషన్ లాంటి కుర్రాళ్ల జోరు చూస్తే భారత జట్టు టీ20 ప్రపంచకప్ ప్రణాళికల నుంచి ధావన్ను తప్పించడం ఖాయమనే అనిపించింది. కానీ ఇప్పుడు ఐపీఎల్లో ధావన్ చెలరేగుతున్న తీరు చూస్తే.. అతను అంత తేలిగ్గా తన స్థానాన్ని వదిలేలా లేడు. ఆడిన తొలి మ్యాచ్లోనే (చెన్నైపై) 85 పరుగులు చేసిన ధావన్.. చెన్నైతో గత మ్యాచ్లో 92 పరుగులు సాధించడం విశేషం.
ఇదీ చదవండి: చెన్నై జోరును కోల్కతా నిలువరించేనా?
ఈ రెండు మ్యాచ్ల్లో విధ్వంసక బ్యాటింగ్తో ఆకట్టుకున్న ధావన్.. ముంబయితో బుధవారం బ్యాటింగ్ ఎంతో కఠినంగా సాగిన మ్యాచ్లో తన శైలికి భిన్నంగా ఆడాడు. అతను చూపించిన పట్టుదల అసామాన్యం. ఎప్పుడూ దూకుడుగా ఆడే శిఖర్.. పరిస్థితులకు తగ్గట్లుగా ఓపికతో ఆడాడు. సంయమనం కోల్పోలేదు. ప్రతి పరుగుకూ శ్రమించాడు. వీలు చిక్కినపుడు షాట్లు కొట్టాడు. జట్టు మెరుగైన స్థితికి చేరాక చకచకా మ్యాచ్ను ముగిద్దామని దూకుడుగా ఆడే ప్రయత్నం చేశాడు. ఆ ప్రయత్నంలో ఔటయ్యాడు. మ్యాచ్ ముగించకపోయినా.. దిల్లీ విజయంలో అతడి పాత్ర కీలకం. చేసింది 45 పరుగులే అయినా ఇంతకుముందు ఆడిన పెద్ద ఇన్నింగ్స్లకు ఏమాత్రం తీసిపోని, విలువైన ఇన్నింగ్స్ ఇది. ధావన్ జోరు చూస్తుంటే.. టీ20 ప్రపంచకప్ రేసులో నేనున్నా అని చాటుతున్నట్లే ఉంది.
ఇదీ చదవండి: 'దక్షిణాఫ్రికా బోర్డు సంక్షోభంలో జోక్యం చేసుకోం'
