ఐపీఎల్లో మంగళవారం మరో రసవత్తర పోరుకు రంగం సిద్ధమైంది. చెన్నై వేదికగా జరగనున్న ఈ మ్యాచ్లో కోల్కతా నైట్రైడర్స్తో ముంబయి ఇండియన్స్ తలపడనుంది. ఆదివారం సన్రైజర్స్ హైదరాబాద్పై గెలుపుతో జోష్లో ఉన్న మోర్గాన్ సేన.. తమ రెండో మ్యాచ్లోనూ అదే ఉత్సాహంతో విజయాన్ని దక్కించుకోవాలని సన్నాహాలు చేస్తోంది. అదే విధంగా తొలి మ్యాచ్లో ఆర్సీబీపై ఓడిన రోహిత్ సేన.. ఈ మ్యాచ్లో విజేతగా నిలిచి పూర్వవైభవాన్ని తెచ్చుకోవాలని చూస్తోంది. ఈ నేపథ్యంలో ఇరుజట్ల గురించి ఓసారి పరిశీలిద్దాం.
జోరు కొనసాగించేనా?
ఆదివారం టోర్నీలో సన్రైజర్స్ హైదరాబాద్తో కోల్కతా నైట్రైడర్స్ తలపడింది. ఈ మ్యాచ్లో ఎస్ఆర్హెచ్పై 10 పరుగుల తేడాతో కేకేఆర్ నెగ్గింది. ఇందులో కోల్కతా ఓపెనర్ నితీశ్ రానా అద్భుత ప్రదర్శన చేయగా.. శుభ్మన్ గిల్ ఫర్వాలేదనిపించాడు. మరో యువబ్యాట్స్మన్ రాహుల్ త్రిపాఠి అర్ధశతకంతో అలరించగా.. మిగిలిన వారంతా ఆకట్టుకునే ప్రదర్శన చేయలేకపోయారు.
బౌలింగ్ లైనప్లో ప్రసిద్ధ్ కృష్ణ రెండు వికెట్లు పడగొట్టగా.. షకిబుల్ హసన్, పాట్ కమిన్స్, అండ్రూ రస్సెల్ చెరో వికెట్ సాధించారు. గత మ్యాచ్ గెలిచిన క్రమంలో ప్రస్తుత జట్టులో దాదాపుగా ఎలాంటి మార్పులు ఉండకపోవచ్చు. ఒకవేళ సునీల్ నరైన్కు జట్టులో చోటు కల్పించాలని నిర్ణయిస్తే.. ఓ యువ ఆటగాడి విశ్రాంతి ఇచ్చే అవకాశం ఉంది.
రెండో మ్యాచ్లోనైనా..
ఐపీఎల్ ప్రస్తుత సీజన్ ప్రారంభ మ్యాచ్లో రాయల్ ఛాలెంజర్స్ బెంగళూరుతో ముంబయి ఇండియన్స్ జట్టు తలపడింది. అయితే ఈ మ్యాచ్లో చివరి వరకు విజయం కోసం పోరాడిన రోహిత్ సేనకు నిరాశే మిగిలింది. కానీ, ఈ సీజన్లో జట్టులోకి అరంగేట్రం చేసిన క్రిస్ లీన్ అద్భుతమైన బ్యాటింగ్ ముంబయికి భవిష్యత్ మ్యాచ్ల్లో కలిసొస్తుందనే చెప్పాలి. టాప్ఆర్డర్లో రోహిత్ శర్మతో క్రిస్ లీన్ ఉండగా.. మిడిల్ ఆర్డర్లో సూర్య కుమార్ యాదవ్, ఇషాన్ కిషన్, పాండ్య సోదరులు ఉన్నారు.
బౌలింగ్ లైనప్లో బుమ్రా, బౌల్ట్తో పాటు రాహుల్ చాహర్, క్రునాల్ పాండ్య వంటి స్పిన్నర్లూ ఉన్నారు. కోల్కతాతో జరిగే మ్యాచ్లో డికాక్ క్వారంటైన్ పూర్తి అయితే జట్టులో మార్పు జరిగే అవకాశం ఉంది.
జట్లు (అంచనా):
కోల్కతా నైట్రైడర్స్: ఇయాన్ మోర్గాన్ (కెప్టెన్), దినేశ్ కార్తిక్ (వికెట్ కీపర్), శుభ్మన్ గిల్, నితీశ్ రానా, అండ్రూ రస్సెల్, కుల్దీప్ యాదవ్, పాట్ కమిన్స్, ప్రసిద్ధ్ కృష్ణ, రాహుల్ త్రిపాఠి, వరుణ్ చక్రవర్తి, షకిబ్ అల్ హసన్. (సునీల్ నరైన్కు ఈసారి ఆడే అవకాశం రావొచ్చు)
ముంబయి ఇండియన్స్: రోహిత్ శర్మ (కెప్టెన్), సూర్యకుమార్ యాదవ్, క్రిస్ లీన్, జస్ప్రీత్ బుమ్రా, రాహుల్ చాహర్, ట్రెంట్ బౌల్ట్, హార్దిక్ పాండ్య, క్రునాల్ పాండ్య, ఇషాన్ కిషన్, క్వింటన్ డికాక్ (వికెట్ కీపర్), మార్కో జన్సెన్.
ఇదీ చూడండి: సన్రైజర్స్పై కోల్కతా నైట్రైడర్స్ విజయం
