దిల్లీ X హైదరాబాద్​: పైచేయి ఎవరిదో?

ఐపీఎల్​లో భాగంగా ఆదివారం దిల్లీ-హైదరాబాద్​ మధ్య పోరు జరగనుంది. చెన్నైలోని చెపాక్ స్టేడియం ఇందుకు వేదిక కానుంది. రాత్రి 7.30 గంటలకు మ్యాచ్​ ప్రారంభం.

ఐపీఎల్​లో దిల్లీ క్యాపిటల్స్​- సన్​రైజర్స్​ హైదరాబాద్​ మధ్య నేడు ఆసక్తికర పోరు జరగనుంది. ఇప్పటికే ఇరు జట్లు నాలుగేసి మ్యాచ్​లు ఆడాయి. మూడు విజయాలు, ఓ పరాజయంతో పాయింట్ల పట్టికలో మూడో స్థానంలో నిలిచిన పంత్​ సేన.. మరింత మెరుగైన ప్రదర్శన చేయాలని భావిస్తోంది. మూడు పరాజయాలు, ఒకే ఒక గెలుపుతో పట్టికలో చివరి నుంచి రెండో స్థానంలో ఉంది సన్​రైజర్స్​.

హైదరాబాద్​ కొనసాగించేనా?

మొదటి మూడు మ్యాచ్​ల్లో గెలుపు అంచుల వరకు వచ్చి ఓటమి పాలైన వార్నర్​ సేన.. ఎట్టకేలకు నాలుగో మ్యాచ్​లో విజయాన్ని నమోదు చేసింది. చివరగా పంజాబ్​తో జరిగిన మ్యాచ్​లో 9 వికెట్ల తేడాతో నెగ్గి ఆత్మవిశ్వాసాన్ని మూటగట్టుకుంది. ఓపెనర్లు డేవిడ్ వార్నర్, బెయిర్ స్టో స్థిరంగా రాణిస్తున్నప్పటికీ.. వీరివురి అనంతరం బ్యాటింగ్ ఆర్డర్​ పేకమేడను తలపిస్తుంది. దీంతో గత మ్యాచ్​ ద్వారా ఈ సీజన్​లో తొలి మ్యాచ్​ ఆడిన కేన్ విలియమ్సన్ జట్టులోకి రావడం హైదరాబాద్​కు అతిపెద్ద సానుకూలాంశం. వీరితో పాటు మనీష్ పాండే, సమద్​ రాణిస్తే సన్​రైజర్స్​కు తిరుగుండదు.

ఇక బౌలింగ్ విషయానికొస్తే ఐపీఎల్​లో అత్యుత్తమ బౌలింగ్ లైనప్​ ఉన్న జట్లలో ఎస్​ఆర్​హెచ్​ ముందు వరుసలో ఉంటుంది. భువనేశ్వర్​ కుమార్, రషీద్ ఖాన్, నబీ, హోల్డర్​ వంటి గొప్ప బౌలర్లున్నప్పటికీ వారు స్థిరంగా రాణించకపోవడమే.. వార్నర్​ సేనకు ఉన్న అసలైన సమస్య. భువనేశ్వర్​ ఇంతవరకు చెప్పుకోదగ్గ ప్రదర్శన చేయలేదు. మోకాలి గాయం కారణంగా నటరాజన్ లీగ్​కు దూరం కావడం సన్​రైజర్స్​కు పెద్ద లోటే. సమష్టిగా రాణిస్తే దిల్లీని ఓడించడం హైదరాబాద్​కు అంత కష్టమేమీ కాదు.

ఇదీ చదవండి: రాణించిన రాజస్థాన్ బౌలర్లు.. కోల్​కతా 133/9

దిల్లీకి ఎదురుందా?

ఈ సీజన్​లో అత్యుత్తమంగా రాణిస్తున్న జట్లలో దిల్లీ ఒకటి. లీగ్ ఆరంభానికి ముందు పూర్తి స్థాయి కెప్టెన్ శ్రేయస్ అయ్యర్​ గాయపడ్డప్పటికీ.. యువ సారథి పంత్​ టీమ్​ను బాగానే నడిపిస్తున్నాడు. గత మ్యాచ్​లో ముంబయిని స్వల్ప స్కోరుకే కట్టడి చేసింది. ఛేదనలో విజయవంతమైంది. అంతకుముందు పంజాబ్​తో మ్యాచ్​లో భారీ స్కోరును అవలీలగా కొట్టేసింది. బ్యాటింగ్​లో టాపార్డర్​తో పాటు మిడిలార్డర్​ రాణిస్తోంది. పృథ్వీ షా, శిఖర్​ ధావన్, స్టీవ్ స్మిత్, స్టోయినిస్, లలిత్ యాదవ్, పంత్​లతో బ్యాటింగ్ ఆర్డర్​ దుర్భేద్యంగా ఉంది.

ఇక బౌలింగ్​లోనూ దిల్లీ సత్తా చాటుతోంది. ముంబయితో మ్యాచ్​లో అమిత్ మిశ్రా, అవేశ్ ఖాన్ మెరిశారు. క్రిస్ వోక్స్, కగిసో రబాడా ఫర్వాలేదనిపిస్తున్నారు. వీరితో పాటు టామ్ కరన్, స్టోయినిస్ కట్టుదిట్టంగా బౌలింగ్ చేస్తే పంత్ సేనకు ఎదురుండదు.​

ఇదీ చదవండి: 'ఆత్మవిశ్వాసం నింపడంలో శాస్త్రిని మించినా వారు లేరు'